طالبات کوں زیادہ تعلیم یافتہ بݨا تے ہی آندیاں نسلاں کوں باشعور بݨایا ونج سڳدے۔ ایڈیشنل چیف سیکرٹری جنوبی پنجاب فواد ہاشم ربانی

ملتان۔ 16 جولائی (اے پی پی) ایڈیشنل چیف سیکریٹری جنوبی پنجاب فواد ہاشم ربانی آکھیے جو طالبات کوں زیادہ تعلیم یافتہ بݨا تے ہی آندیاں نسلاں کوں باشعور بݨایا ونڄ سڳدے۔تفصیل موجب ایڈیشنل چیف سیکریٹری جنوبی پنجاب فواد ہاشم ربانی نال وائس چانسلر گورنمنٹ صادق خواتین کالج و یونیورسٹی بہاولپور پروفیسر ڈاکٹر شازیہ انجم انھاں دے دفتر اچ ملاقات کیتی۔ وائس چانسلر گورنمنٹ صادق خواتین کالج و یونیورسٹی بہاولپور پروفیسر ڈاکٹر شازیہ انجم فیکلٹی، داخلہ، انفراسٹرکچر سودھے مختلف امور بارے ایڈیشنل چیف سیکرٹری جنوبی پنجاب کوں تفصیلی بریفنگ ݙتی۔ ایں موقع تے یونیورسٹی ٹریژر پروفیسر ڈاکٹر محمد صادق، رجسٹرار ڈاکٹر صائمہ انجم، کنٹرولر امتحانات سیدہ تہمینہ اعجاز تے پرسنل اسٹاف افسر ٹو اے سی ایس غلام سرور وی موجود ہن۔بریفنگ اچ فواد ہاشم ربانی کوں ݙسایا ڳیا جو گورنمنٹ صادق خواتین کالج و یونیورسٹی بہاولپور دا آغاز بطور انٹر کالج 1944 اچ تھیا ہئی ڄݙاں جو بطور یونیورسٹی اپ گریڈیشن 2012 اچ تھئی، گورنمنٹ صادق کالج خواتین یونیورسٹی بہاولپور اچ 4 فیکلٹیز دے 21 ڈیپارٹمنٹس کم کریندے پئن، یونیورسٹی ولوں بی ایس (چار سالہ) دے 16، ایسویسی ایٹ ڈگری پروگرام دے 11، ایم ایس دے 8، ڄݙاں جو پی ایچ ڈی دے 6 مضامین اچ کل 31 پروگرام پیش کیتے ویندے پئن ڄݙاں جو یونیورسٹی اچ 6050 طالبات مختلف پروگراماں اچ تعلیم حاصل کریندیاں پئن۔بریفنگ اچ مزید ݙسایا ڳیا جو عملی تعلیم تے تجربے کیتے یونیورسٹی اچ کل 17 لیبارٹریز فنکشنل تے جدید ساز و سامان نال لیس ہن تے یونیورسٹی اچ ہݨ تئیں 550 توں ودھ ریسرچ پبلیکیشنز شائع تھی چکئن۔ ایں دوران ایڈیشنل چیف سیکریٹری جنوبی پنجاب فواد ہاشم ربانی گورنمنٹ صادق خواتین کالج و یونیورسٹی بہاولپور دے تعلیمی تے تحقیقی سفر دی تعریف کریندیں وائس چانسلر پروفیسر ڈاکٹر شازیہ انجم تے انھاں دی ٹیم کوں خراجِ تحسین پیش کیتا تے انھاں کوں مزید لگن تے محنت نال کم جاری رکھݨ دی تلقین کیتی۔ایڈیشنل چیف سیکریٹری فواد ہاشم ربانی یونیورسٹی دی زمین تے قبضے دا معاملہ ترجیحی بنیاداں تے حل کراوݨ تے یونیورسٹی کیتے خصوصی ترقیاتی اسکیماں کوں سالانہ ترقیاتی پروگرام اچ شامل کراوݨ کیتے متعلقہ حکام نال ڳالھ کرݨ دا یقین ݙیوائے ۔ فواد ہاشم ربانی آکھیا جو گورنمنٹ صادق کالج خواتین یونیورسٹی بہاولپور تاریخی اہمیت دی حامل قدیمی درسگاہ اے، طالبات کوں حصولِ تعلیم اچ بہترین سہولتاں ݙیوݨ وزیراعلیٰ پنجاب مریم نواز شریف دی اولین ترجیح اے۔ وزیراعلیٰ پنجاب مریم نواز شریف دی خصوصی ہدایات تے طالبات کوں حصولِ تعلیم اچ درپیش مسئلیں دے حل کیتے ہر ممکن اقدامات چاتے ویندے پئن۔