حضرت بہاؤالدین زکریا ملتانیؒ دے 787ویں عرس دی تقریبات کل توں شروع تھیسن ،انتظامات مکمل

ملتان۔ 19 جولائی (اے پی پی) شیخ الاسلام حضرت بہاؤالدین زکریا ملتانیؒ دے 787ویں سالانہ عرس مبارک دی ترائے ݙینھ وار تقریبات سنوار توں شروع تھیسن، جئیں کیتے ضلعی انتظامیہ انتظامی، سکیورٹی، صفائی، ٹریفک تے ٻئی سہولتاں دے جامع انتظامات مکمل کر ڳھدن۔ ڈپٹی کمشنر ڈاکٹر فیصل سلیم دی زیرِ صدارت دربار حضرت بہاؤالدین زکریاؒ تے منعقدہ اجلاس اچ عرس دے انتظامات تے سکیورٹی پلان دا تفصیلی جائزہ ڳھدا ڳیا۔ اجلاس اچ ایڈیشنل ڈپٹی کمشنر (ریونیو) حافظ محمد مدثر، ایڈیشنل ڈپٹی کمشنر (فنانس) محسن نثار، اسسٹنٹ کمشنر سٹی ازکیٰ سحر سودھے متعلقہ محکمیں دے افسراں شرکت کیتی۔ڈپٹی کمشنراجلاس توں خطاب کریندیں آکھیا جو عرس مبارک دے موقع تے ملک توں آوݨ آلے زائرین دی بھرپور مہمان نوازی کیتی ویسی تے بہترین صفائی، مؤثر سکیورٹی تے مربوط انتظامات دے ذریعے انھاں کوں خوشگوار ماحول ݙتا ویسی۔ انھاں آکھیا جو زائرین کیتے بہترین قیام و طعام دے انتظامات کیتے ڳئن ڄݙاں جو ٹریفک دی روانی برقرار رکھݨ کیتے جامع ٹریفک پلان وی بݨایا ڳئے۔ انھاں ہدایت کیتی جو سارے متعلقہ ضلعی محکمے عرس دے ترائے ݙینھ قلعہ کہنہ قاسم باغ اچ آپݨے کیمپ قائم رکھن تاں جو زائرین کوں سہولتاں ݙتیاں ونڄ سڳن۔ڈاکٹر فیصل سلیم آکھیا جو کہیں وی ہنگامی صورتِ حال نال نبڑݨ کیتے پولیس تے ٻئے قانون نافذ کرݨ آلے ادارے مکمل طور تے چوکس رہسن۔ انھاں ݙسایا جو دربار شریف دے آسے پاسے، قیام گاہواں تے ٻئیاں اہم جہیں دی مکمل اسکریننگ کیتی ڳئی اے جݙاں جو گرمی پاروں زائرین دی سہولت کیتے ٹھڈے پاݨی دیاں سبیلاں وی قائم کیتیاں ڳئن۔ انھاں متعلقہ محکمیں کوں ہدایت کیتی جو عرس دی تقریبات دے دوران سارے انتظامات کوں مؤثر انداز اچ یقینی بݨایا ونڄے تاں جو زائرین کوں ہرممکن سہولت ݙتی ونڄ سڳے۔