حضرت غوث بہاؤالدین زکریا ملتانیؒ دے 787 ویں عرس دی ترائے ݙینھ دی تقریبات شروع تھی ڳئن

ملتان۔ 20 جولائی (اے پی پی) برصغیر دے عظیم روحانی پیشوا حضرت غوث بہاؤالدین زکریا ملتانیؒ دے 787 ویں عرس دی ترائے ݙینھ وار تقریبات دا آغاز تھی ڳئے۔ عرس تقریبات 20، 21 تے 22 جولائی 2026ء (5، 6 تے 7 صفر المظفر 1448ھ) کوں تھیسن۔ تفصیل موجب عرس مبارک دی افتتاحی تقریب دے دوران اتھاں قلعہ کہنہ قاسم باغ تے واقع درگاہِ حضرت غوث بہاؤالدین زکریا ملتانیؒ دے مزارِاقدس کوں غسل ݙے تے عرس تقریبات دا آغاز کیتا ڳئے۔حضرت غوث بہاؤالدین زکریا ملتانیؒ (1170ء تا 1267ء) سلسلۂ سہروردیہ دے عظیم صوفی بزرگ، عالمِ دین تے روحانی پیشوا ہن، آپ آپݨے ویلھے اچ ملتان کوں علم و تصوف دے ہک وݙے مرکز دے طور تے نمایاں مقام عطا کیتا تے آپ دی تعلیمات اچ محبت، رواداری، خدمتِ خلق تے اخلاقی تربیت کوں بنیادی اہمیت حاصل ہئی، جیں دی وجہ توں آپ دا فیض صدیاں بعد وی جاری اے۔ عرس مبارک اچ ملک توں ہزاراں عقیدت مند زائرین شرکت کریندے پئن، ضلعی انتظامیہ ولوں زائرین کیتے رہائش، پاݨی، صفائی سودھے مختلف انتظامات ڄݙاں جو پولیس دی طرفوں سکیورٹی تے ٹریفک دی روانی کیتے بہترین انتظامات کیتے ڳئن تاں جو آوݨ آلے لوکاں کوں بہترین سکیورٹی و ٻئی سہولتاں ݙتیاں ونڄ سڳن۔حضرت بہاؤالدین زکریا ملتانیؒ دے 787ویں سالانہ عرس دے موقع تے ضلعی انتظامیہ ولوں 22 جولائی کوں مقامی تعطیل دا اعلان وی کیتا ڳئے، 22 جولائی کوں ضلع ملتان دے سارے سرکاری دفتر، سرکاری ادارے تے ضلعی دفتر بند رہسن۔ سی پی او ملتان صادق علی ڈوگر دی ہدایت تے ایس ایس پی آپریشنز ملتان دی زیرِ نگرانی عرس تقریبات دے دوران ملتان پولیس دی طرفوں تقریباً 1131 دے نیڑے افسران و اہلکار شفٹ وائز سکیورٹی ڈیوٹی دے فرائض سر انجام ݙیندے پئن۔ملتان پولیس دی طرفوں عرس ڈیوٹی کوں مانیٹر کرݨ کیتے ہک انڄ کنٹرول روم سی پی او آفس اچ بݨایا ڳئے ڄݙاں جو زائرین دی رہائش گاہواں دے ٻاہروی پولیس دے جوان ڈیوٹی امور سر انجام ݙیندے پئن تے کہیں وی قسم دی ہنگامی صورتِ حال نال نبڑݨ کیتے فائربریگیڈ تے 1122 دا عملہ وی الرٹ اے۔ گرمی دی شدت پاروں ملتان پولیس دی طرفوں زائرین کیتے ٹھڈے پاݨی دی واٹر کینن مختلف جہیں تے رکھیاں ڳئن ۔ کہیں وی ناخوشگوار واقعہ توں بچݨ کیتے عرس اچ شریک سارے لوکاں کوں مکمل چیکنگ دے بعد درگاہ دے احاطے اچ داخلے دی اجازت اے، عرس دے دوران فول پروف سکیورٹی یقینی بݨاوݨ کیتے ہر ممکن اقدامات چاتے ویندے پئن۔