پورے صوبے اچ مون سون بارشاں دے چوتھے سپیل دا الرٹ جاری، 29 جولائی توں 5 اگست تئیں بارشاں دا امکان اے: پی ڈی ایم اے

لاہور۔28جولائی (اے پی پی) پی ڈی ایم اے پنجاب صوبے بھر اچ مون سون بارشاں دے چوتھے سپیل دا الرٹ جاری کر ݙتے، 29 جولائی توں 5 اگست تئیں صوبے دے زیادہ تر ضلعیاں اچ بارشاں دی پیشگوئی اے۔ ترجمان پی ڈی ایم اے دے مطابق صوبائی دارالحکومت لاہور، قصور، شیخوپورہ، ننکانہ صاحب، فیصل آباد، جھنگ، ٹوبہ ٹیک سنگھ، چنیوٹ، خوشاب، میانوالی، لیہ، بھکر، نورپور تھل، سرگودھا، ساہیوال، اوکاڑہ، پاکپتن، بہاولپور، بہاولنگر، رحیم یار خان، خانیوال، ملتان، وہاڑی، لودھراں، مظفرگڑھ، کوٹ ادو، ڈیرہ غازی خان تے راجن پور اچ 31 جولائی توں 3 اگست تئیں موسلا دھار بارشاں دی پیشگوئی، اینویں راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد، وزیرآباد، سیالکوٹ تے نارووال اچ وی موسلا دھار بارش دا امکان اے جڈانجو لاہور، راولپنڈی، گوجرانوالہ، گجرات، سیالکوٹ، فیصل آباد تے ملتان اچ اربن فلڈنگ دا امکان اے۔ ایں دوران مری، گلیات تے پہاڑی علاقیاں اچ لینڈ سلائیڈنگ دا خدشہ اے۔ ڈی جی پی ڈی ایم اے عمر میلہ وزیرِ اعلیٰ پنجاب دی ہدایت دے مطابق ضلعی انتظامیہ کوں الرٹ جاری کر ݙتے۔ ڈی جی پی ڈی ایم اے آکھیا جو وݙے شہراں اچ مون سون بارشاں پاروں اربن فلڈنگ دے پیشِ نظر انتظامیہ پیشگی الرٹ راہوے، کیونجو بالائی کیچمنٹس اچ متوقع بارشاں دے باعث مشرقی دریاواں تے انھاں نال ملحقہ نالیاں دے بہاؤ اچ اضافے دا خدشہ اے۔ اینویں برساتی نالیاں اچ فلیش فلڈنگ دا خطرہ اے۔ ڈی جی پی ڈی ایم اے محکمہِ صحت، آبپاشی، تعمیر و مواصلات، لوکل گورنمنٹ تے لائیوسٹاک کوں وی الرٹ جاری کر ݙتے۔ انھاں شہریاں توں اپیل کیتی جو خراب موسم دی صورتحال اچ احتیاطی تدابیر اختیار کرن، بوسیدہ تے کچے مکاناں اچ ہرگز رہائش نہ رکھن۔ مون سون سیزن اچ کچے تے بوسیدہ مکاناں دے ڈہوݨ نال زیادہ اموات رپورٹ تھئیاں ہن۔ اندھاری تے طوفان دی صورتحال اچ محفوظ مقامات تے رہن، غیر ضروری سفر توں گریز کرن۔ ڈی جی پی ڈی ایم اے آکھیا جو شہری آسمانی بجلی توں بچاؤ کیتے محفوظ مقامات تے رہن، ٻالاں دا خاص خیال رکھن انھاں کوں نشیبی علاقیاں اچ پاݨی تے بجلی دیاں تاراں تے کھمبیاں دے قریب ہرگز نہ ونڄݨ ݙین، عوام بجلی دی گرج چمک تے طوفانی صورتحال اچ کھلے آسمان تلے ہرگز نہ ونڄن، ایمرجنسی صورتحال اچ پی ڈی ایم اے ہیلپ لائن 1129 تے رابطہ کرن۔