پاکستان جنوبی کوریا 4 میچاں دی ٹیسٹ سیریز: پاکستان پہلے میچ اچ مہمان ٹیم کوں 1-3 گول توں ہرا ݙتے

اسلام آباد۔30جولائی(اے پی پی)پاکستان ہاکی ٹیم جنوبی کوریا نال چار میچاں دی ٹیسٹ سیریز دی شروعات شاندار جیت نال کیتی اے اتے پیلے میچ اچ مہمان ٹیم کوں 3 دے مقابلے اچ ہک گول توں ہرا ݙتے۔ اسلام آباد دے نصیر بندہ ہاکی سٹیڈیم اچ کھیݙے ڳئے میچ اچ پاکستان جارحانہ کھیݙدے ہوئے ݙوجھے کوارٹر اچ ݙو گول کیتن اتے تریجھے کوارٹر اچ ہک ٻیا گول کر تے اپݨی وتھی ودھا ڳھدی۔ پاکستان ولوں سفیان خان پنلٹی کارنرز تے ݙو گول کیتن ڄݙاں جو کپتان ابوبکر محمود ہک فیلڈ گول کیتے۔ جنوبی کوریا ولوں کلہا گول جی ہُن یانگ کیتے۔ ہاف ٹائم تک پاکستان کوں 1-2 گولاں دی وِتھی ہئی، تریجھے کوارٹر دے 36ویں منٹ اچ سفیان خان ہک ٻئے پنلٹی کارنر تے گول کر تے اپݨی ٹیم دی برتری 1-3 گول کر ݙتی، جیرھی چھیکڑ تئیں برقرار رہی۔ پاکستان اتے جنوبی کوریا دی ہاکی ٹیسٹ سیریز دا ݙوجھا میچ یکم اگست کوں اسلام آباد دے نصیر بندہ ہاکی سٹیڈیم اچ کھیݙیا ویسی۔ اے سیریز پاکستان دے آوݨ لے بین الاقوامی مقابلیاں دی تیاریاں دا حصہ اے۔