چیئرمین پی سی بی محسن نقوی دی صدارت پی ایس ایل انتظامیہ تے فرنچائز مالکان دا اجلاس، پی ایس ایل یارہویں سیزن دی تیاریاں تے ڳالھ مہاڑ

لاہور۔31جولائی (اے پی پی) چیئرمین پاکستان کرکٹ بورڈ (پی سی بی) محسن نقوی دی صدارت پاکستان سپر لیگ (پی ایس ایل) انتظامیہ تے فرنچائز مالکان دا اہم جائزہ اجلاس جمعہ کوں تھیا، جئیں اچ ایچ بی ایل پی ایس ایل دے یارہویں سیزن دے کامیاب انعقاد تے آئندہ سیزن دی تیاریاں تے تفصیلی ڳالھ مہاڑ کیتی ڳئی۔ اجلاس اچ پی ایس ایل 11 کیتے ونڈو، پلیئنگ کنڈیشنز، ڈائریکٹ سائننگز تے کھڈاریاں دی ریٹینشنز توں متعلق امور دا جائزہ گھدا ڳیا۔ شرکا کوں ݙسایا ڳیا جو انھاں معاملات تے جلد ورکشاپس دا انعقاد کیتا ویسی تانجو آئندہ سیزن دی تیاریاں کوں حتمی شکل ݙتی ونڄ سڳے۔ اجلاس اچ یارہویں سیزن اچ متعارف تھیوݨ آلی تبدیلیاں تے وی غور کیتا ڳیا جڈانجو پی ایس ایل 11 دے 44 میچاں اچ کرکٹ دے معیار تے انتظامی امور دا جائزہ گھدا ڳیا۔ پی سی بی دے مطابق ایچ بی ایل پی ایس ایل 11 کوں سوشل میڈیا، سٹریمنگ پلیٹ فارمز تے ٹی وی تے ریکارڈ ویورشپ حاصل تھئی۔ اجلاس دے شرکا مشکل حالات اچ لیگ دے کامیاب انعقاد تے چیئرمین پی سی بی محسن نقوی تے انھاں دی ٹیم دی کارکردگی کوں سراہیا۔ اجلاس اچ آف سیزن تے پری سیزن دے دوران شائقینِ کرکٹ کیتے مختلف سرگرمیاں دے انعقاد تے وی گفتگو تھئی۔ ایں توں علاوہ پی ایس ایل تے تمام اٹھ فرنچائزز دے اشتراک نال لیگ دا آفیشل مرچنڈائز پلیٹ فارم لانچ کرݨ دا فیصلہ وی کیتا ڳیا۔ ترجمان پی سی بی دے مطابق پی ایس ایل گورننگ کونسل دا اہم اجلاس اگست دے آخری ہفتے اچ ہوسی، جئیں دی ڄاہ تے ویلھے دا اعلان بعد اچ کیتا ویسی۔ اجلاس اچ پی ایس ایل دے چیف ایگزیکٹو آفیسر سلمان نصیر، پی سی بی دے چیف فنانشل آفیسر جاوید مرتضیٰ، ڈائریکٹر پی ایس ایل عثمان واہلہ تے ٻئے حکام شرکت کیتی۔