ملتان دے تاریخی ورثے دی بحالی تے سیاحت دے فروغ کیتے والڈ سٹی اتھارٹی دے تحت میگا منصوبیاں تے کم تیزی نال جاری

ملتان۔ 03 اگست (اے پی پی) ملتان دے تاریخی ورثے دی بحالی تے سیاحت دے فروغ کیتے والڈ سٹی اتھارٹی دے تحت میگا منصوبیاں تے کام تیزی نال جاری اے۔ ایں سلسلے اچ ڈپٹی کمشنر ملتان ڈاکٹر فیصل سلیم دی صدارت اچ والڈ سٹی اتھارٹی دا جائزہ اجلاس تھیا، جئیں اچ قلعہ کہنہ، دمدمہ، لنگر خانہ، قدیمی لائبریری، کیفے تے فوڈ سٹریٹ سمیت مختلف منصوبیاں تے پیش رفت دا تفصیلی جائزہ گھدا ڳیا۔ اجلاس اچ ایڈیشنل ڈپٹی کمشنر فنانس محسن نثار، والڈ سٹی اتھارٹی دے افسراں تے متعلقہ محکمیاں دے نمائندیاں شرکت کیتی۔ حکام منصوبیاں دی رفتار، مالیاتی امور تے تعمیراتی پیش رفت بارے بریفنگ ݙیندیں ہوئیں ݙسایا جو مختلف منصوبیاں تے کام تیزی نال جاری اے۔ ڈپٹی کمشنر ڈاکٹر فیصل سلیم اجلاس نال خطاب کریندیں ہوئیں آکھیا جو ملتان صدیاں تے محیط تہذیبی، تاریخی تے ثقافتی ورثے دا امین شہر اے، جئیں دی بحالی حکومتِ پنجاب دی ترجیحات اچ شامل اے۔ انھاں آکھیا جو قلعہ کہنہ، دمدمہ تے قدیمی لائبریری دی اپ گریڈیشن نال نہ صرف شہر دی تاریخی سنڄاݨ مزید نمایاں تھیسی بلکہ نویں نسل کوں آپݨے شاندار ماضی توں آگاہی وی حاصل تھیسی۔ انھاں آکھیا جو انھاں منصوبیاں دی تکمیل نال شہریاں کوں معیاری تفریحی تے ثقافتی سہولیات میسر آسن جڈانجو ملکی و غیر ملکی سیاحاں دی آمد اچ وی اضافہ تھیسی۔ اجلاس اچ ݙسایا ڳیا جو لنگر خانہ 188 ملین روپے، قدیمی لائبریری 43 ملین روپے، کیفے 39 ملین روپے تے فوڈ سٹریٹ 129 ملین روپے دی لاگت نال تعمیر کیتی ویندی پئی اے، جڈانجو والڈ سٹی اتھارٹی دے تحت تاریخی فصیل دی مکمل اپ گریڈیشن 463 ملین روپے دی لاگت نال کیتی ویسے۔ ڈپٹی کمشنر تمام متعلقہ اداریاں کوں ہدایت کیتی جو منصوبیاں دی بروقت تکمیل، تعمیراتی معیار تے شفافیت کوں ہر صورت یقینی بݨایا ونڄے تانجو ملتان دا تاریخی ورثہ محفوظ تھیوݨ دے نال نال شہر سیاحت، ثقافت تے معاشی سرگرمیاں دا مزید اہم مرکز بݨے۔