پنجاب حکومت نوجواناں کوں بااختیار بݨاوݨ کیتے عملی اقدامات کریندی پئی اے، مریم نواز

لاہور۔ 12 اگست (اے پی پی) وزیرِ اعلیٰ پنجاب مریم نواز شریف آکھیا جو پاکستان دی 65 فیصد نوجوان آبادی ملک دا قیمتی اثاثہ اے، نوجواناں کوں تعلیم تے ہنر نال آراستہ کر تے دنیا اچ انھاں دا مثبت کردار یقینی بݨایا ونڄ سڳدے۔ پنجاب حکومت نوجواناں کوں درپیش تمام مسائل دے حل تے انھاں کوں بااختیار بݨاوݨ کیتے عملی اقدامات کریندی پئی اے۔ یوتھ دے عالمی ݙینھ دے موقع تے آپݨے سنیھے اچ وزیرِ اعلیٰ مریم نواز شریف آکھیا جو یوتھ ڈے دا مقصد ملکی تعمیر و ترقی اچ نوجواناں دے کردار کوں اجاگر کرݨ اے۔ ملک دے بہتر مستقبل تے ترقی دی راہ تے گامزن کرݨ کیتے نوجواناں دی سرپرستی ضروری اے۔ انھاں نوجواناں کوں ملک نال محبت تے گالی گلوچ دی سیاست توں ہمیشہ پرے رہوݨ دی تلقین کریندیں ہوئیں آکھیا جو نوجوان اپنی جسمانی تے ذہنی صحت دا خیال رکھن تے نشے جہیں لعنت توں دور رہن۔مریم نواز شریف آکھیا جو پنجاب حکومت پہلی وار نوجواناں کوں اڳوں ودھݨ کیتے سہارا بݨدی پئی اے۔ ایگریکلچر انٹرن شپ، لیپ ٹاپ، ای ٹیکسیز، آسان فنانس سکیم تے آسان کاروبار سکیم اچ نوجواناں کوں شامل کیتا ڳئ۔ پرواز کارڈ دے ذریعے ہنرمند تے غیر ہنرمند نوجواناں کوں بیرونِ ملک روزگار کیتے بلاسود قرضے فراہم کیتے ویندے پئن۔