یومِ آزادی، ایمان، آزادی، قومی عزم دی علامت اے، چیئرمین سینیٹ

اسلام آباد (اے پی پی) چیئرمین سینیٹ سید یوسف رضا گیلانی آکھیے جو یومِ آزادی محض ہک تاریخ نی بلکہ ایمان، آزادی، خودمختاری تے قومی عزم دی علامت اے۔ پاکستان دے 80ویں یومِ آزادی دے موقعے تے اتھاں کنونشن سینٹر وچ قومی یومِ آزادی دی تقریب نال خطاب کریندے انہاں اکھیا جو اے ݙینھ قوم کوں برصغیر دے مسلماناں دی تاریخی جدوجہد دی یاد ݙویندے۔ تقریب وچ وفاقی وزیر پارلیمانی امور ڈاکٹر طارق فضل چوہدری، ڈپٹی سپیکر قومی اسمبلی سید غلام مصطفیٰ شاہ، وفاقی پارلیمانی سیکرٹری اطلاعات و نشریات بیرسٹر دانیال چوہدری تے ٻئے اعلیٰ حکام وی شریک تھئے۔ تقریب وچ عوام، طلبا تے فنکاراں دی وݙی تعداد شرکت کیتی۔ ایں موقع تے طلبا تے فنکاراں ملی نغمے پیش کیتے۔ سید یوسف رضا گیلانی قائدِ اعظم محمد علی جناح تے تحریکِ پاکستان دے دوران جاناں قربان کرݨ آلیاں کوں خراجِ تحسین پیش کیتا۔ انہاں ملک دی سلامتی تے دفاع کیتے اپݨی جاناں دا نذرانہ پیش کرݨ آلے شہدا کوں وی خراجِ عقیدت پیش کیتا۔ انہاں اکھیا جو پاکستانی قوم کوں اپݨی بہادر مسلح افواج تے ماݨ اے۔ انہاں اکھیا جو ملک دے دفاع وچ پوری قوم مسلح افواج دے نال کھڑی اے۔ چیئرمین سینیٹ آکھیا جو تریمتاں ملکی ترقی وچ کلیدی طاقت ہن۔ انہاں خواتین کوں تعلیم، صحت دی ݙیکھ بھال، روزگار تے معاشی طور تے بااختیار بݨاوݨ کیتے ھکو سویں موقع ݙیوݨ تے زور ݙتا۔ انہاں نوجواناں کوں پاکستان دا ساریں توں قیمتی اثاثہ تے مستقبل قرار ݙتا۔ چیئرمین سینیٹ نوجواناں کیتے سائنس، ٹیکنالوجی تے ڈیجیٹل معیشت وچ تعلیم، مہارت تے مواقع ݙیوݨ دی لوڑھ تے زور ݙتا۔ انہاں اکھیا جو ملک کوں درپیش چیلنجز تے قابو پاوݨ کیتے قومی اتحاد، قانون دی حکمرانی، میرٹ تے انصاف ضروری اے۔ انہاں اکھیا جو قومی معیشت کوں تکڑا بݨاوݨ کیتے صنعت، زراعت، برآمدات تے جدید ٹیکنالوجی وچ سرمایہ کاری ضروری اے۔ انہاں اکھیا جو پائیدار ترقی کیتے تعلیم، صحت دی ݙیکھ بھال، روزگار تے کاروبار دے موقع کوں ودھاوݨا وی ضروری اے۔ سید یوسف رضا گیلانی آکھیا جو پاکستان محض زمین دا ہک ٹکڑا نی بلکہ ہک نظریہ تے قومی عزم اے۔ انہاں زور ݙتا جو قانون ساریں کیتے برابر ہووݨا چاہیدے۔ انہاں کمزور طبقیں دے تحفظ تے اقلیتاں دے حقوق دا احترام کرݨ تے وی زور ݙتا۔ چیئرمین سینیٹ آکھیا جو پنجاب، سندھ، خیبرپختونخوا، بلوچستان، گلگت بلتستان تے آزاد کشمیر پاکستان دے اتحاد دے رنگ ہن۔ انہاں آکھیا جو ملک دی متنوع زباناں، ثقافتاں تے روایتاں کمزوری نی بلکہ قومی طاقت ہن ۔ چیئرمین سینیٹ آکھیا جو پاکستان ہمسایہ ملکاں تے عالمی برادری نال تعاون تے سانجھے احترام تے مبنی پرامن تعلقات چاہندے۔ انہاں آکھیا جو پاکستان جنگ تے مذاکرات، تعاون تے سفارت کاری کوں ترجیح ݙیندے۔ سید یوسف رضا گیلانی مکہ دفاعی معاہدے کوں پاکستان کیتے ہک اہم سفارتی تے تزویراتی کامیابی قرار ݙتا۔ انہاں آکھیا جو ایں معاہدے نال علاقائی تعاون، اعتماد سازی تے اجتماعی سلامتی دے نویں موقع پیدا تھئن۔ انہاں آکھیا جو پاکستان دی سفارتی تے دفاعی کامیابیاں ایں دی سیاسی تے عسکری قیادت دے وژن دا نتیجہ ہن۔ انہاں آکھیا جو پاکستان، صدرِ مملکت آصف علی زرداری، وزیرِاعظم محمد شہباز شریف تے فیلڈ مارشل سید عاصم منیر دی قیادت وچ اڳوں ودھدا پئے۔ انہاں کشمیری عوام دے حقِ خود ارادیت کیتے پاکستان دی حمایت دا وی اعادہ کیتا۔