جنوبی پنجاب سیکرٹریٹ وچ جشنِ آزادی دی مرکزی تقریب

ملتان (اے پی پی) جشنِ آزادی پاکستان دی مرکزی تقریب جنوبی پنجاب سیکرٹریٹ ملتان وچ منعقد کیتی ڳئی، ایڈیشنل چیف سیکرٹری جنوبی پنجاب فواد ہاشم ربانی جشنِ آزادی تقریب دے مہمانِ خصوصی ہن۔ تقریب وچ اقلیتی برادری دے نمائندیں بشپ لیو روڈرک پال، پادری عاطف شہزاد، بشپ یوسف سوہان، سیموئل کلیمنٹ، فادر ڈینیئل، مسٹر عابد ہائیسنٹ پیٹر، ڈاکٹر بینجمن برکت تے ٻئے اقلیتی برادری دے نمائندیں خصوصی طور تے شرکت کیتی تے تقریب وچ جنوبی پنجاب دے سپیشل سیکرٹریز، افسراں، نیب افسراں، ملازمین، سول سوسائٹی تے طلبہ بھرپور شرکت کیتی۔ تقریب دا باقاعدہ آغاز سائرن وڄا تے ہک منٹ دی چُپ اختیار کرتے تے پرچم کشائی دی پروقار رسم نال تھیا۔ ایڈیشنل چیف سیکرٹری جنوبی پنجاب فواد ہاشم ربانی اقلیتی برادری دے نمائندیں تے ٻئے مہماناں دے رلے پرچم کشائی کیتی۔ ایں موقع تے قومی ساوے ہلالی پرچم کوں پنجاب پولیس، ریسکیو 1122 تے بوائز سکاؤٹس دے چاق و چوبند دستیں سلامی ݙتی۔ بعد وچ جشنِ آزادی دی مناسبت نال تے وزیرِاعلیٰ پنجاب مریم نواز شریف دی ہدایات تے اقلیتی برادری دے قومی ہفتہ تقریبات دی مناسبت نال خصوصی کیک وی کٹیے ڳئے تے ’’سرسبز پاکستان‘‘ مہم دے تحت تقریب دے دوران جنوبی پنجاب سیکرٹریٹ دے احاطے وچ خصوصی شجرکاری وی کیتی ڳئی۔ جشنِ آزادی تقریب دی کمپیئرنگ محکمہ سکول ایجوکیشن جنوبی پنجاب دی سیکشن افسر بریحہ زینب کیتی تے تقریب وچ مختلف سرکاری سکولاں دے ٻالاں ملی نغمے پیش کیتے۔ تقریب وچ شریک اقلیتی برادری دے نمائندیں دی طرفوں ایڈیشنل چیف سیکرٹری جنوبی پنجاب فواد ہاشم ربانی کوں خصوصی سوینئر پیش کیتا ڳیا۔ تقریب نال خطاب کریندے ایڈیشنل چیف سیکرٹری جنوبی پنجاب فواد ہاشم ربانی آکھیا جو پاکستان دا یومِ آزادی اساݙے کیتے خوشی، فخر، تشکر تے تجدیدِ عہد دا ݙینھ اے۔ میں تساں ساریں کوں دل دی گہرائیاں نال یومِ آزادی دی مبارک پیش کرینداں ، 14 اگست 1947 او تاریخی ݙینھ اے جݙاں برصغیر دے مسلماناں قائدِ اعظم محمد علی جناح دی قیادت وچ ہک آزاد وطن حاصل کیتا۔ پاکستان دا قیام ہک طویل جدوجہد، بے شمار قربانیاں تے لکھاں مسلماناں دی لازوال قربانیاں دا ثمر اے۔ انہاں اکھیا جو اڄ دے ݙینھ اساں اپݨی اقلیتی برادری، جیڑھی جو ساریں توں پہلے ہک محبِ وطن پاکستانی اے، کوں خراجِ تحسین پیش کریندوں، جنہاں قیامِ پاکستان توں گھن تے اڄ تئیں ملک دی تعمیر و ترقی تے خوشحالی وچ اپݨا فعال کردار ادا کیتے۔ قائدِ اعظم دا پاکستان او پاکستان اے جتھاں ہر پاکستانی بھاویں ایں دا مذہب، عقیدہ یا برادری کوئی وی ہووے برابر دا شہری اے۔ ایں مساوی شہریت دے تصور کوں اڳوں ودھاوݨا اساݙی حقیقی قومی ذمہ واری اے۔ مکہ دفاعی معاہدے بارے ڳالھ مہاڑ کریندے ایڈیشنل چیف سیکرٹری جنوبی پنجاب فواد ہاشم ربانی آکھیا جو اڄ 2026ء دا یومِ آزادی ایں کیتے وی زیادہ قابلِ فخر اے جو وزیراعظم پاکستان محمد شہباز شریف تے فیلڈ مارشل سید عاصم منیر دی انتھک محنت پاروں پاکستان، ترکیہ تے سعودی عرب وچال مکہ وچ مشترکہ دفاعی معاہدہ جیندے وچ ہک رکن ملک دے خلاف مسلح جارحیت کوں ترائے ملکاں دے خلاف جارحیت سمجھیا ویسے تے ایں توں علاوہ ملکی سطح تے ڈیفنس کارپوریشن، انٹیلی جنس، ٹیکنالوجی تے سکیورٹی پروٹیکشن وچ وی سانجھی معاونت نال ایں معاہدے دے ݙُو رس اثرات تھیسن۔ اپݨے خطاب وچ نوجواناں کوں مخاطب کریندے انہاں اکھیا جو پاکستان دا مستقبل تساݙے ہتھاں وچ اے ۔ اپݨی تعلیم، صلاحیت تے ہنر کوں ملک دی تعمیر و ترقی کیتے وقف کرو۔  جنوبی پنجاب خطے بارے وچ ڳالھ کریندے انہاں آکھیا جو جنوبی پنجاب دی زرخیز زمین، مہمان نواز عوام، شاندار ثقافت تے تاریخی ورثہ پاکستان دی ترقی وچ منفرد مقام رکھیندن۔ جیندے کیتے جنوبی پنجاب سیکرٹریٹ دی اولین ترجیح اے جو عوام کوں موثر، شفاف تے وقتی سرکاری خدمات ݙیوݨ ہر صورت یقینی بݨائی ونڄے تے اساں کوں اے عہد کرݨا ہوسی جو اساں پاکستان کوں صرف ہک ملک نی بلکہ ہک ذمہ واری سمجھوں۔ اساں اپݨے فرائض ایمانداری نال ادا کروں، قومی املاک دی حفاظت کروں، قانون دا احترام کروں تے معاشرے وچ امن، بھرپی تے برداشت کوں ودھارا ݙیوں، تے ملک وچ موجود سماجی برائیاں دے خلاف اساں ساریں کوں اپݨا کردار ادا کرݨا ہوسی۔ کرپشن دے تدارک کیتے پُرعزم کردار ویلھے دی اہم لوڑھ اے تاں جو ملک تے سارے اداریاں کوں کرپشن دے ناسور توں محفوظ بݨایا ونڄ سڳے۔