آزادی اساݙے کیتے خوشی، شکرگزاری، فخر تے عزم دی تجدید دا ݙینھ اے، وفاقی وزیرِاحسن اقبال

اسلام آباد (اے پی پی) وفاقی وزیرِ منصوبہ بندی، ترقی و خصوصی اقدامات احسن اقبال یومِ آزادی دی 79ویں سالگنڈھ تے اپݨے پیغام وچ قوم کوں پاکستان دے یومِ آزادی دی دلی مبارخ پیش کریندے آکھیے جو یومِ آزادی اساݙے کیتے خوشی، شکرگزاری، فخر تے عزم دی تجدید دا ݙینھ اے۔ وزارتِ منصوبہ بندی توں جاری بیان وچ وفاقی وزیر آکھیا جو اڄ دا ݙینھ اللہ تعالیٰ دے حضور شکر کرݨ تے قومی کامیابیاں تے خوشیاں مناوݨ دا ݙینھ ہے۔ احسن اقبال آکھیا جو اساں معرکہ حق وچ کامیابیاں تے اللہ تعالیٰ دا شکر ادا کریندے ہوئے یومِ آزادی دا جشن منیندے پیوں۔ انہاں آکھیا جو اڄ اساں کوں آزادی دی حفاظت دے نال معرکہ معیشت وچ وی پاکستان دا لوہا منواوݨا اے، اساں کوں بحیثیت قوم ھک تھی تے معاشی میدان وچ پاکستان کوں ہک مضبوط تے باوقار ملک بݨاوݨا اے، پاکستان دی ترقی، خوشحالی تے معاشی خودمختاری کیتے پوری قوم کوں ھک تھی تے اڳوں ودھݨا ہوسی ۔ پروفیسر احسن اقبال آکھیا جو اڄ اساں صرف پاکستان دے یومِ آزادی دی 79ویں سالگنڈھ نی منیندے پئے بلکہ بانیِ پاکستان قائدِ اعظم محمد علی جناحؒ تے علامہ محمد اقبالؒ دے 150ویں یومِ پیدائش دی خوشیاں وی منیندوں۔ انہاں آکھیا جو قائدِ اعظم محمد علی جناحؒ تے علامہ محمد اقبالؒ نے ہک آزاد تے خودمختار پاکستان دا خواب ݙٹھا، یومِ آزادی اساں کوں قائدِ اعظم محمد علی جناحؒ تے علامہ محمد اقبالؒ دی عظیم جدوجہد، بصیرت تے قربانیاں کوں خراجِ تحسین پیش کرݨ دا موقع ݙیندے، اساں کوں قائدِ اعظمؒ دے اتحاد، ایمان تے نظم و ضبط دے اصولاں کوں اپݨی قومی زندگی دا حصہ بݨاوݨا ہوسی۔ وفاقی وزیرِ منصوبہ بندی، ترقی و خصوصی اقدامات احسن اقبال آکھیا جو اڄ دے ݙینھ اساں کوں عہد کرݨا اے جو اساں پاکستان کوں ہک مضبوط، خوشحال، خودمختار تے ترقی یافتہ ملک بݨاوݨ کیتے اپݨی ساری صلاحیتیاں بروئے کار گھن آؤسوں۔ پروفیسر احسن اقبال آکھیا جو آزادی دی حفاظت صرف سرحداں تے نی، معاشی، علمی، سائنسی تے ٹیکنالوجی دے میداناں وچ کامیابی نال وی تھیندی اے۔