پاکستان دی امن دی خواہش کوں کمزوری نہ سمجھیا ونڄے، اساں خطے وچ استحکام دی ضمانت بݨ چکیوں، وزیرِ اعظم محمد شہباز شریف دا یادگارِ فتح دی افتتاحی تقریب نال خطاب

اسلام آباد۔14 اگست (اے پی پی) وزیرِاعظم محمد شہباز شریف معرکہ حق وچ شاندار کامیابی تے پاکستان دی مسلح افواج تے قوم کوں مبارخ ݙیندے اکھیے جو پاکستان دی امن دی خواہش کوں کمزوری نہ سمجھیا ونڄے، اساں خطے وچ استحکام دی ضمانت بݨ چکیوں، پوری دنیا تئیں معرکہ حق دا پیغام پڄ چکیے، کہیں بھل تے وی پاکستان دی خودمختاری تے سلامتی کوں چیلنج کیتا تاں ایں توں زیادہ طاقت نال منہ بھن جواب ݙیسوں، پاکستان دے پاݨی دی ہک ہک بوند اساݙی ریڈ لائن اے، بھارت راہِ راست تے نہ آیا تاں براہِ راست جواب ݙیسوں، فلسطینیاں تے کشمیریاں دے حقِ خود ارادیت دی حمایت جاری رکھیسوں، افغانستان اپݨی سرزمین کوں دہشت گرداں دی پناہ گاہ بݨݨ توں فی الفور روکے، امن وچ وی قوم اتحاد دے جذبے کوں زندہ رکھیے۔ انہاں اے ڳالھ قومی اتحاد، وحدت، یکجہتی تے دفاعِ وطن دے عزمِ مصمم دی علامت یادگارِ فتح دی افتتاحی تقریب نال خطاب کریندے آکھی۔ صدرِ مملکت آصف علی زرداری تے وزیراعظم محمد شہباز شریف یادگارِ فتح دا افتتاح کیتا۔ ایں موقع تے نائب وزیراعظم و وزیرِ خارجہ محمد اسحاق ڈار، چیئرمین سینیٹ سید یوسف رضا گیلانی، سپیکر قومی اسمبلی سردار ایاز صادق، چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر تے مسلح افواج دی قیادت، سروسز چیفس، چیف جسٹس آف پاکستان جسٹس یحییٰ آفریدی، وفاقی وزراء، غیر ملکی سفارت کاراں، پنجاب تے خیبر پختونخوا دے گورنرز، وزیراعلیٰ پنجاب مریم نواز شریف، ارکانِ پارلیمنٹ تے وݙی تعداد وچ سول و عسکری حکام موجود ہن۔ وزیراعظم محمد شہباز شریف تقریب نال خطاب کریندے آکھیا جو پوری قوم کوں جشنِ آزادی دی مبارخ پیش کریندن۔ انہاں آکھیا جو اساں اللہ دے حضور سربسجود ہیسے جیں اساں کوں آزاد وطن نال نوازیا۔ اساݙے بزرگاں آزادی کیتے بے مثال قربانیاں ݙتیاں۔ وزیرِ اعظم آکھیا جو یادگارِ فتح اساݙے عزم و ہمت، مسلح افواج دی مہارت تے برتری دی علامت اے۔ وزیراعظم معرکہ حق وچ عظیم کامیابی تے صمیمِ قلب نال قوم کوں مبارخ ݙیندے آکھیا جو معرکہ حق وچ کامیابی تے فیلڈ مارشل سید عاصم منیر کوں خراجِ تحسین پیش کرینداں جنہاں دشمن دی اکھیں وچ اکھیں پا تے ایں دا غرور مٹی وچ ملا ݙتا۔ اے معرکہ تاریخ دا ناقابلِ فراموش باب اے۔ انہاں آکھیا جو معرکہ حق دی کامیابی وچ پاک فضائیہ تے پاک بحریہ دے سربراہیں دی قیادت وچ افواج دا کردار لائقِ تحسین اے۔ انہاں آکھیا جو 8 مہینے دے قلیل عرصے وچ یادگارِ فتح دی شاندار تعمیر فیلڈ مارشل دی ذاتی دلچسپی دا نتیجہ اے، اے یادگارِ فتح قومی اتحاد دی علامت اے۔ انہاں واضح کیتا جو اساں امن چاہندوں لیکن امن دی خواہش کوں کمزوری نہ سمجھیا ونڄے۔ وزیرِاعظم آکھیا جو اساں امن کیتے عزت تے وقار دے نال کھڑوں۔ معرکہ حق وچ کامیابی قوم دا سر فخر نال اچا کر ݙتا۔ دشمن معرکہ حق وچ عبرتناک شکست ہمیشہ یاد رکھیسی۔ انہاں معرکہ حق دے شہداء کوں خراجِ عقیدت تے غازیاں کوں وی خراجِ تحسین پیش کیتا۔ وزیرِ اعظم اکھیا جو پاکستان دی امن دی خواہش کوں کمزوری نہ سمجھیا ونڄے۔ اساں خطے وچ امن و استحکام دی ضمانت بݨ چکیوں۔ 2025 دے معرکے دا پیغام پوری دنیا وچ پڄ چکیے۔ دنیا جاݨدی اے جو ایں معرکے پاکستان دے وقار وچ ایجھا ودھارا کیتے جیں دی عصرِ حاضر دی تاریخ وچ مثال نی ملدی۔ اے حقیقت جے ہݨ وی کہیں دی سمجھ وچ نی آئی تاں اساݙا پیغام واضح اے جو او اپݨی عبرتناک شکست یاد رکھے۔ اڳوں بھل تے وی ملکی خودمختاری تے سلامتی کوں چیلنج کیتا تاں ایں کوں پہلے توں زیادہ قوت نال جواب ݙتا ویسی۔ وزیرِاعظم آکھیا جو بھارت سندھ طاس معاہدے کوں یکطرفہ تے غیر قانونی طور تے معطل کر تے خود کوں امن دا دشمن ثابت کیتے۔ انہاں اعلان کیتا جو پاکستان دے پاݨی دی ہک ہک بوند اساݙی ریڈ لائن اے۔ پاݨی دے معاملے تے کوئی سمجھوتہ نہ تھیسی۔ بھارت جے راہِ راست تے نہ آیا تاں ایں کوں براہِ راست جواب ݙیسوں۔ وزیرِاعظم نویں نسل کوں ترقی دے نویں موقع ݙیوݨ حکومت دی ترجیح قرار ݙیندے آکھیا جو معاشی ترقی کوں جدید ٹیکنالوجی نال ہم آہنگ کرݨا اے۔ نویں نسل کیتے ترقی دے دروازے کھولݨے ہن۔ انسانی وسائل کوں ترقی ݙے تے ترقی و خوشحالی دے نویں دور دا آغاز کرݨا اے۔ انہاں اکھیا جو ہک تبدیلی اواے جیڑھی سیاست تے معیشت دے میدان وچ آندی پئی اے تے ہک آئی ٹی تے اے آئی پیدا کیتی ے۔ نویں دنیا وچ جیوݨ دے طور طریقے وی نویں ہن۔ اڄ دی دنیا وچ او قوم زندہ رہسی جیڑھی اے آئی تے آئی ٹی دے نال جیوݨ دا ہنر جاݨدی ہوسی۔ انھاں تبدیلیاں دے مطابق خود کوں ڈھالݨا اے۔ وزیرِاعظم آکھیا جو اساݙی کوشش اے جو دنیا نویں جھیڑے توں محفوظ رہے۔ اساں جھیڑیں کوں اقوامِ متحدہ دے اصولاں تے انصاف دے تقاضیں دے مطابق حل کرݨ دی خواہش رکھیندوں۔ ایں جذبے نال پاکستان ایران-امریکہ جنگ دے خاتمے کیتے اپݨا کردار ادا کیتا۔ ایں سلسلے وچ فیلڈ مارشل دا تاریخی کردار ہمیشہ یاد رکھیا ویسی۔ وزیرِاعظم آکھیا جو پاکستان گزریل سال برادر اسلامی ملک سعودی عرب نال دفاعی معاہدہ کیتا۔ ہݨے پاکستان، سعودی عرب تے ترکیہ مکہ مشترکہ دفاعی معاہدے تے دستخط کیتے۔ اے دفاعی معاہدہ عالمِ اسلام کیتے امن دی نوید تے دنیا وچ استحکام دی علامت اے۔ انہاں اکھیا جو پاکستان فلسطینیاں دے حقوق کیتے اپݨے اصولی موقف تے قائم اے۔ کشمیر تے اساݙا ݙو ٹوک موقف اے۔ اساں کشمیریاں دی اخلاقی، سیاسی تے سفارتی حمایت جاری رکھیسوں۔ کشمیریاں دی قربانیاں ضائع نہ ویسن۔ وزیرِ اعظم نے اکھیا جو افغانستان وچ اساں امن و استحکام چاہندوں لیکن افغانستان دی سرزمین دا دہشت گردی کیتے استعمال ناقابلِ برداشت اے۔ اساں ہک ٻئے دے ہمسائے ہیسے تے رہݨا اے۔ افغان قیادت کوں مخلصانہ مشورہ اے جو او اپݨی سرزمین کوں دہشت گرداں دی پناہ گاہ بݨݨ توں فی الفور روکے۔ وزیرِاعظم نے اکھیا جو چین تے پاکستان دی دوستی ہمالیہ توں اچی تے چٹان توں زیادہ مضبوط اے۔ چین ہراوکھ اچ پاکستان دے نال چٹان وانگوں کھڑا ریہے۔ انہاں پاکستان تے بھارت وچال جنگ بندی وچ صدر ٹرمپ دے کردار کوں لائقِ تحسین قرار ݙتا تے آکھیا جو آوݨ آلے وقت وچ پاکستان تے امریکہ دے تعلقات مزید تکڑے تھیسن۔ انہاں سعودی عرب، قطر، کویت، ترکیہ، آذربائیجان تے ٻئے اسلامی بھرا ملکاں دے تعاد دا شکریہ ادا کیتا تے آکھیا جو انہاں نال اساݙے تعلقات ودھدے رہسن ۔ پاکستان اساں ساریں دا اے ۔انہاں اکھیا جو یادگارِ فتح دے بظاہر ساکت نظر آوݨ آلے ستون قوم دے جذبۂ تعمیر دی ترجمانی کریندن۔ اے جذبۂ تعمیر اڄ سارے چہریں تے وی نظر آندا پئے تے اساݙے روشن مستقبل دی نوید اے۔