وزیراعلیٰ پنجاب دا یومِ آزادی تے خصوصی پیغام وچ قوم کوں مبارخ تے اظہارِ تشکر

لاہور۔14 اگست (اے پی پی) وزیراعلیٰ پنجاب مریم نواز یومِ آزادی تے خصوصی پیغام وچ پاکستان دی سالڳنڈھ تے قوم کوں مبارخ ݙتی تے اظہارِ تشکر کیتے۔ وزیراعلیٰ قائدِ اعظم، علامہ اقبال، محترمہ فاطمہ جناح، زعماء کرام تے سارے اکابرین کوں خراجِ عقیدت پیش کیتے۔ وزیراعلیٰ قیامِ پاکستان، تعمیرِ پاکستان تے تحفظِ پاکستان دی جدوجہد دے شہداء تے غازیاں کوں وی خراجِ عقیدت پیش کیتے۔ وزیراعلیٰ مریم نواز پاکستانی قوم دے ہر فرد، حصولِ آزادی توں تحفظِ آزادی تئیں، معرکہ حق وچ دفاعِ وطن کوں ناقابلِ تسخیر بݨاوݨ تے غیور افواجِ پاکستان تے سرحداں دی حفاظت تے مامور ہر جانباز سپاہی کوں سلام پیش کیتے۔ وزیراعلیٰ اساتذہ، طلباء و طالبات، مزدوراں، کارکناں، محنت کشاں تے ورکراں کوں یومِ آزادی دی مبارخ ݙتی۔ انہاں اکھیا جو یومِ آزادی تے اساں ساریں کوں تعمیرِ وطن وچ اپݨا اپݨا بھرپور کردار ادا کرݨ دا وعدہ نبھاوݨا ہوسی۔ آوݨ آلیاں نسلاں کوں بہتر تے محفوظ پاکستان ݙیوݨ چاہندوں۔ جے ہر بندہ اپݨے اپݨے حصے دا چراغ روشن کرے تاں پورے وطن وچ چانݨ کھنڈ ویسی۔ سوہݨی دھرتی کوں چار چندر لاوݨ کیتے اخلاص، احساسِ ذمہ واری ہی حقیقی حب الوطنی اے۔ وزیراعلیٰ آکھیا جو نوجوان نسل کیتے یومِ آزادی مستقبل نال عہدِ وفا نبھاوݨ دا ݙینھ اے۔ نوجواناں دے ہتھ قلم، کتاب تے لیپ ٹاپ ݙیکھݨ چاہندوں۔ طلباء دا دل لا تے پڑھݨ، اساتذہ دا دلجمعی نال پڑھاوݨ، معالجے دا احساس، تاجر دی دیانتداری ہی حقیقی حب الوطنی اے۔ وزیراعلیٰ مریم نواز آکھیا جو پاکستانی قوم دنیا دی بہترین قوم تے پاکستان دنیا دا بہترین ملک اے۔ میں سمجھدی ہاں جو ہر فرد کیتے حقیقی ترقی اوہا اے جیں وچ کوئی پچھوں نہ رہ ونڄے۔ ݙینھ رات محنت کر تے امید دے ݙیوے ٻال تے خواباں کوں حقیقت بݨیندے پیوں۔