اڄ دے ݙینھ اساکوں اے عزم کرݨے جو پاکستان کوں اڳوں ودھاوݨ کیتے ساریں کوں رل تے کم کرݨا ہوسی، وزیرِ اطلاعات پنجاب عظمی بخاری

لاہور۔14 اگست (اے پی پی) وزیرِ اطلاعات پنجاب عظمیٰ بخاری یومِ آزادی دے موقع تے آکھیے جو اڄ دے ݙینھ اساں کوں ایں عزم دا ارادہ کرݨے جو پاکستان کوں اڳوں ودھاوݨ کیتے ساریں کوں کم کرݨے، پاکستان اساں کوں پلیٹ وچ رکھ تے نی ملیا، ایں ملک کوں حاصل کرݨ کیتے اساݙے وݙکیں ٻہوں قربانیاں ݙتیاں، 1947 توں اڄ تئیں دا سفر جیڑھا پاکستان طے کیتے، او ٻہوں قابلِ قدر اے۔ اے ڳالھ انہاں جشنِ آزادی دے موقع تے اپݨے ویڈیو پیغام وچ آکھی۔ عظمیٰ بخاری آکھیا جو پوری قوم کوں وزیراعلیٰ پنجاب مریم نواز تے میݙی طرفوں جشنِ آزادی مبارک ہووے، اڄ پاکستان کوں ہر فورم تے عزت ملدی پئی اے، دنیا وچ ثالثی دی ڳالھ ہووے، جنگ رکواوݨ دی ڳالھ ہووے یا وݙے فیصلے دی ڳالھ ہووے، ہر جاء تے پاکستان دا ناں آندے۔ عظمیٰ بخاری آکھیا جو پاکستان دنیا دے طاقتور ملکاں دی صف وچ کھڑے، وزیراعظم شہباز شریف تے فیلڈ مارشل سید عاصم منیر دی قیادت وچ پاکستان ترقی کرݨی اے۔ عظمیٰ بخاری مزید اکھیا جو وزیراعلیٰ پنجاب مریم نواز دی کارکردگی دا پورا پاکستان معترف اے، میݙی دعا اے جو پنجاب وانگوں باقی صوبیں وچ وی ترقی تھیوے۔ انہاں اکھیا جو دعا کریندی ہاں پاکستان دے لوک ایویں ہی اڳواں ودھن تے ترقی کرن۔