صدرِ مملکت دی انڈونیشیا دے صدر، حکومت تے عوام کوں انہاں دے یومِ آزادی تے مبارکباد

اسلام آباد (اے پی پی) صدرِ مملکت آصف علی زرداری انڈونیشیا دے صدر پرابوو سوبیانتو، حکومت تے عوام کوں انہاں دے یومِ آزادی تے مبارکباد دا سنیھا ݙتے۔ ایوانِ صدر دے پریس ونگ توں جاری بیان دے مطابق انڈونیشیا دے یومِ آزادی تے آپݨے تہنیتی خط اچ صدرِ مملکت آصف علی زرداری اکھیا جو اے تاریخی موقع انڈونیشیا دے عوام دے جذبے، استقامت تے عزم دے نال نال آزادی دی جدوجہد اچ انہاں دی قوم دے بانی رہنماؤاں دی قیادت دی یاد ݙیویندے۔ صدر آصف علی زرداری اکھیا جو پاکستان تے انڈونیشیا وچال مشترکہ تاریخ، آپسی اعتماد، مشترکہ عقیدے تے ݙوپاسہ، علاقائی تے بین الاقوامی سطح تے تعاون تے مبنی قریبی تے دوستانہ تعلقات قائم ہن۔ انہاں اکھیا جو ݙوہیں ملکاں تجارت، سرمایہ کاری، دفاع، صحت، تعلیم تے عوامی رابطیاں سودھے کئی شعبیاں اچ تعاون کوں مسلسل ودھارا ݙتے۔ صدرِ مملکت ایں اعتماد دا اظہار کیتا جو گزریل سال صدر پرابوو سوبیانتو دے دورۂ پاکستان توں ݙوہیں ملکاں تعلقات کوں نویں جہت ملی جئیں توں آپسی مفاد اچ تعاون کوں ٻیا گہرا کرݨ اچ مدد ملسی۔ انہاں انڈونیشیا دی عوام دے امن، ترقی تے خوشحالی کیتے نیک تمناواں دا اظہار کیتا۔