پورٹ قاسم وچ 400 ایکڑ تے ‘اپیرل زون’ بݨاوݨ دا اعلان

اسلام آباد۔17اگست(اے پی پی) وفاقی وزیربحری امور محمد جنید انوار چوہدری پورٹ قاسم وچ 400 ایکڑ رقبے تے محیط ’اپیرل زون‘ (ملبوسات دی صنعت دا مرکز) بݨاوݨ دے اہم منصوبے دا اعلان کیتے۔ ایں منصوبے دے پہلے مرحلے توں 1 لکھ 38 ہزار توں ودھ نوکریاں پیدا تھیسن تے سالانہ تقریباً 2.2 ارب ڈالر دی برآمدات متوقع ہن۔ ایں اقدام دا بنیادی مقصد ملبوسات دی اوسط برآمدی مالیت کوں 8 ڈالر فی پیس تئیں ودھاوݨ اے۔وزیربحری امورجنید انوار چوہدری ݙسائے جو اے برآمدی صنعتی کلسٹر اعلیٰ معیار دے ملبوسات دی تیاری تے توجہ مرکوزکریسی تے نجی سرمایہ کاری کوں راغب کریسی۔ پہلے مرحلے دا رقبہ 250 ایکڑ ‎ہوسی، جیندے وچوں 35 فیصد حصہ سڑکاں، بنیادی سہولتاں تے ساوے علاقیں کیتے مختص کیتا ویسی۔ ایں منصوبے کوں پبلک پرائیویٹ پارٹنرشپ دے تحت بݨایا ویندا پئے۔پورٹ قاسم اتھارٹی (پی کیو اے) بنیادی ڈھانچہ تے سہولتاں ݙیسی، جیندے وچ ہرصنعتی یونٹ کوں پاݨی، بجلی تے صنعتی گیس ݙیوݨ یقینی بݨایا ویسی۔ منصوبے تحت پاکستان دی ٹیکسٹائل کمپنی ’آرٹسٹک ملینرز‘ 18 ملین ڈالر توں ودھ دی سرمایہ کاری کریسی۔ ایں توں انڄ برآمد کنندگان کیتے ‘ون ونڈو’ نظام، کسٹمز ڈیسک تے مخصوص ٹرانسپورٹ کوریڈورز دیاں سہولتاں وی شامل تھیسن تاں جو برآمدی عمل کوں سوکھا بݨایا ونڃ سڳے