آندے 24 گھنٹے ٻہوں سارے ضلعیں اچ مینھ دا امکان ،متعلقہ محکمیں کوں الرٹ جاری،ترجمان

لاہور۔17اگست(اے پی پی)آندے 24 گھنٹے اچ صوبے دے ٻہوں سارے ضلعیں اچ مینھ وسݨ دا امکان اے ، متعلقہ محکمیں کوں الرٹ جاری کرݙتا ڳئے۔ ترجمان پی ڈی ایم اے موجب آندے چووی گھنٹے دے دوران راولپنڈی، مری، گلیات، جہلم، چکوال، تلہ گنگ، اٹک، سیالکوٹ، نارووال، منڈی بہاؤالدین، گجرات، گوجرانوالہ، حافظ آباد تے وزیرآباد وچ مینھ وسݨ دی پیشگوئی اے، ایویں صوبائی دارالحکومت لاہور، قصور، اوکاڑہ، شیخوپورہ، ننکانہ صاحب، سرگودھا، خوشاب، میانوالی تے نورپور تھل وچ وی مینھ متوقع اے جݙاں جو فیصل آباد، جھنگ، ٹوبہ ٹیک سنگھ، لیہ، بھکر، ساہیوال، پاکپتن، بہاولنگر، بہاولپور تے ڈی جی خان وچ 20 تے 21 اگست کوں مینھ وسݨ دا امکان اے۔ ترجمان موجب 17 توں 20 اگست تئیں راولپنڈی، گوجرانوالہ، گجرات، سیالکوٹ تے لاہور دے نشیبی علاقیں وچ زور دے مینھ پاروں اربن فلڈنگ دا ݙر اے جݙاں جو ساوݨ مینھ دا چھیواں سپیل 21 اگست تئیں جاری رہسی۔ ڈی جی پی ڈی ایم اے محمد سیف انور آکھیے جو مینھ پاروں مری، گلیات تے پہاڑی علاقیں وچ لینڈ سلائیڈنگ دا ݙر اے، تے صوبے دے کمشنرز تے ڈپٹی کمشنرز کوں الرٹ جاری کر ݙتا ڳئے۔ ڈی جی سیف انورجپہ آکھیے جو وݙے شہراں وچ ساوݨ مینھ پاروں اربن فلڈنگ دے پیشِ نظرانتظامیہ پیشگی الرٹ رہے، کیوں جو برساتی نالیں وچ فلیش فلڈنگ دا وی خطرہ اے، سیف انور جپہ آکھیے متوقع مینھ دے حوالے نال محکمہ صحت، آبپاشی، تعمیر و مواصلات، لوکل گورنمنٹ تے لائیوسٹاک کوں وی الرٹ جاری کرݙتا ڳئے۔ انہاں شہریاں توں اپیل کیتی اے جو خراب موسم دی صورتحال وچ احتیاطی تدابیر اختیارکرن، بوسیدہ تے کچے مکاناں وچ رہائش نہ رکھن۔ انہاں آکھیے اندھاری طوفان دی صورت حال اچ محفوظ جاہ تے رہو غیرضروری سفر نہ کرو، شہری آسمانی بجلی توں بچݨ کیتے محفوظ جہیں تے رہن ، ٻالاں دا خاص خیال رکھن تے انہاں کوں بجلی دیاں تاراں تے کھمبے دے نیڑے اصلوں نہ ونڄݨ ݙیون۔ ایمرجنسی صورتحال وچ پی ڈی ایم اے ہیلپ لائن 1129 تے رابطہ کرن