ججاں تے وکلا دی پیشہ ورانہ تربیت تے استعدادِ کار ودھاوݨ کیتے پاکستان، برطانیہ دے عدالتی تے قانونی اداریں وچ تعاون ضروری اے، چیف جسٹس پاکستان

اسلام آباد۔18اگست (اے پی پی) چیف جسٹس پاکستان جسٹس یحییٰ آفریدی آکھیے جو پاکستان تے برطانیہ دے عدالتی تے قانونی اداریں وچال تعاون نال ججاں تے وکلا دی پیشہ ورانہ تربیت، قانونی تعلیم تے استعدادِ کار کوں مزید بہتر بݨایا ونڄ سڳدے، انہاں ایں امید دا اظہار کیتا جو برطانیہ دے عدالتی تے قانونی اداریں دے نال ڳالھ مہاڑ عملی تے دیرپا ادارہ جاتی تعاون دا ذریعہ بݨسی۔ چیف جسٹس پاکستان اے ڳالھ سپریم کورٹ وچ انگلینڈ اینڈ ویلز ہائی کورٹ دے کنگز بینچ ڈویژن دے جج جسٹس مارٹن گریفتھس نال ملاقات اچ آکھی۔ جسٹس مارٹن گریفتھس ایں ݙینہاں پاکستان دے دورے تے ہن تے برطانیہ دی آنریبل سوسائٹی آف دی اِنر ٹیمپل دی بین الاقوامی کمیٹی دے رکن جݙاں جو جوڈیشل کالج دی ویلز ٹریننگ کمیٹی دے چیئرمین وی ہن۔ ملاقات وچ سپریم کورٹ دے ججز جسٹس محمد شفیع صدیقی تے جسٹس میاں گل حسن اورنگزیب، فیڈرل جوڈیشل اکیڈمی دے ڈائریکٹر جنرل تے ڈائریکٹر، سپریم کورٹ بار ایسوسی ایشن دے صدر تے پاکستان بار کونسل دے ڈائریکٹر لیگل ایجوکیشن وی موجود ہن۔ ملاقات وچ پاکستان تے برطانیہ وچال عدالتی تربیت، پیشہ ورانہ ترقی تے استعدادِ کار ودھاوݨ دے شعبیں وچ ادارہ جاتی تعاون دے ودھارے تے ڳالھ مہاڑ کیتی ڳئی ۔ ایں موقع تے فیڈرل جوڈیشل اکیڈمی تے انگلینڈ اینڈ ویلز دے جوڈیشل کالج وچال ججاں دی تربیت تے عدالتی تعلیم کیتے منظم تعاون دے امکانات دا جائزہ گھدا ڳیا جݙاں جو تربیتی طریقہ کار، ادارہ جاتی تجربے تے بہترین عملی طریقیں دے تبادلے دی اہمیت تے وی زور ݙتا ڳیا۔ ملاقات وچ اِنر ٹیمپل تے پاکستان دی قانونی برادری وچال وکلا دی تربیت، مسلسل قانونی تعلیم تے پیشہ ورانہ ترقی دے شعبیں وچ تعاون دے امکانات تے وی غور کیتا ڳیا۔ چیف جسٹس پاکستان برطانیہ دے عدالتی تے قانونی اداریں دے نال رابطے دے موقع دی تعریف کریندے آکھیے ایں طرح دے رابطے عدالتی تے قانونی شعبیں وچ پیشہ ورانہ استعداد مزید بہتر بݨاوݨ وچ معاون ثابت تھیسن۔