ہر قیدی کیتے قانون ہک ہووݨا چاہیدے، بانی پی ٹی آئی کوں خصوصی سہولت ݙیوݨ دا مطالبہ قانون دے خلاف اے، سینیٹر اعظم نذیر تارڑ

اسلام آباد۔18اگست (اے پی پی) وفاقی وزیر قانون و انصاف تے انسانی حقوق سینیٹر اعظم نذیر تارڑ آکھیے جو ہر قیدی کیتے قانون ہک ہووݨا چاہیدے، بانی پی ٹی آئی کوں خصوصی سہولت ݙیوݨ دا مطالبہ قانون دے خلاف اے، کہیں کوں قانون توں بالاتر نی سمجھیا ونڄ سڳدا۔ سینیٹ اجلاس وچ سینیٹر اعظم سواتی دی طرفوں چاتے ڳئے نکات تے اظہارِ خیال کریندے انہاں اکھیا جو ملک وچ ہر معاملہ قانون تے ضابطے موجب ہووݨا چاہیدے ،کہیں بندے کیتے انڄ قانون نی بݨایا ونڄ سڳدا اعظم نذیر تارڑ آکھیا جو اے آکھݨ جو جیل دا دروازہ بھن تے کہیں کوں ٻاہرکڈھ ݙتا ڳیا ہئی، ایں کیتے ہݨ اساں وی ایں طرح ٻاہر ویسوں، قانون موجب، اساں خود قانون ساز ادارے وچ ٻیٹھے ہیسے تے اے قوانین ایں پارلیمان تے ایں توں پہلے آوݨ آلیاں پارلیماناں بݨائن۔ انہاں آکھیا جو دنیا دا ہر ملک قانون تے ضابطے موجب چلدے، جیل وچ ملاقاتاں دے حوالے نال وی قواعد موجود ہن، بانی پی ٹی آئی دی ملاقاتاں دا معاملہ سپریم کورٹ تے اسلام آباد ہائی کورٹ وچ زیرِ سماعت اے۔ وفاقی وزیرِ قانون آکھیا جو سپریم کورٹ وچ ایں معاملے تے اوپن کورٹ وچ سماعت وی تھئی، جتھاں عدالت متعلقہ معاملیں تے سوالات چاتے۔ انہاں ݙسایا جو بانی پی ٹی آئی دے وکیل سلمان صفدر بطور فرینڈ آف دی کورٹ وی رپورٹ پیش کیتی جیڑھی عدالتی ریکارڈ دا حصہ اے۔ ایں رپورٹ وچ جیل وچ بانی پی ٹی آئی کوں ݙتی ونڄݨ آلی خوراک، صفائی، ݙیکھ بھال، ورزش دے اوقات، سیل دیاں سہولتاں تے ٻئے معاملیں دا ذکر کیتا ڳیا ہئی۔ رپورٹ وچ اے شکایت وی سامݨے آئی جو انہاں دے علاج کیتے انہاں دی پسند دے ڈاکٹر کوں اجازت ݙتی ونڄے۔ انہاں اکھیا جے آئین دے آرٹیکل 25 دے تحت سارے شہری برابر ہن تاں کہیں ہک قیدی کوں خصوصی سہولت ݙیوݨ دی اجازت کیویں ݙتی ونڄ سڳدی اے؟ جے ہک شخص کوں خصوصی اجازت ݙتی ویسی تاں ول ایہو حق ملک دے ہر قیدی کوں ݙیوݨا پوسی۔ اعظم نذیر تارڑ آکھیا جو قانون ساریں کیتے برابر اے جیڑھا قانون عام شہری کیتے ہے اوہو عمران خان، نواز شریف تے بلاول بھٹو زرداری سودھے ہر شخص کیتے اے۔ کہیں کوں قانون توں بالاتر نی سمجھیا ونڄ سڳدا۔ انہاں اکھیا جو اساکوں کہیں شخصیت کوں دیوتا بݨا تے پیش نی کرݨا چاہیدا، قانون دی نظر وچ سارے برابر ہن، جیڑھا اصول عمران خان کیتے اے اوہو نواز شریف تے ٻئے سیاسی رہنماواں کیتے وی ہووݨا چاہیدے۔ وفاقی وزیرِ قانون آکھیا جو پارلیمان وچ ٻیٹھے لوکاں کوں چاہیدے جو او پہلے قانون پڑھن تے ول ایں موجب ڳالھ کرن، کیوں جو ملک کوں آئین تے قانون موجب ہی چلایا ونڄ سڳدے۔