وزیراعظم شہباز شریف دی شہریاں کیتے سوکھیاں، موثر اتے جدید ڈیجیٹل خدمات ݙیوݨ کیتے خصوصی توجہ دی ہدایت

اسلام آباد۔17 اگست(اے پی پی)وزیراعظم محمد شہباز شریف شہریاں کیتے سوکھیاں، موثر اتے جدید ڈیجیٹل ݙیوݨ تے خصوصی توجہ دی ہدایت کریندے آکھیے جو سارے متعلقہ ادارے مربوط انداز اچ کم کرن، وفاقی حکومت دے ماتحت اداریاں اتے ایس او ایز اچ ای آفس دا استعمال یقینی بݨایا ونڄے۔ انہاں اے احکامات نیشنل انفارمیشن ٹیکنالوجی بورڈ اچ جاری اصلاحات اتے اسلام آباد ٹیکنالوجی پارک دی تعمیر بارے جائزہ اجلاس دی اڳواݨی کریندے آکھی۔ وزیراعظم آکھیا جو شہریاں کوں ویلھے سر، شفاف اتے آسان ڈیجیٹل خدمات کیتے متعلقہ ادارے مربوط انداز اچ کم کرن جو شہریاں کوں سرکاری خدمات اچ سوکھ ݙیوݨ حکومت دی ترجیح اے۔ انہاں سرکاری ڈیجیٹل پلیٹ فارمز کوں ٻیا موثر ٻݨاوݨ دی ہدایت کریندے آکھیا جو آئی ٹی اتے ڈیجیٹل اصلاحات اچ وفاقی وزارتاں دی ای آفس تے منتقلی ہݨ تک دی اہم ترین اصلاحات اچوں ہک اے۔ وزیراعظم آکھیا جو ساریاں سرکاری املاک دے ریکارڈ دی ڈیجیٹائزیشن تیکھے مکمل کیتی ونڄے۔ اسلام آباد ٹیکنالوجی پارک دی تکمیل اچ چرک تھیوݨ تے کوڑیندے ہوئے اسلام آباد ٹیکنالوجی پارک تیکھے مکمل کرݨ اتے فوری فعال کرݨ دی ہدایت کیتی۔ وزیراعظم آکھیا جو اسلام آباد ٹیکنالوجی پارک کوں چلاوݨ کیتے مکمل طور تے آؤٹ سورس کیتا ونڄے۔ وزیراعظم کوں بریفنگ ݙتی ڳئی جو این آئی ٹی بی دی رائٹ سائزنگ کیتی ونڄ چکی اے اتے اہم عہدیاں تے تعیناتی ہک شفاف طریقے نال کیتی ویندی پئی اے، ساریاں وفاقی وزارتاں ای آفس تے منتقل تھی چکین جݙاں جو ٻئے محکمیاں اتے سرکاری ملکیتی اداریاں اچ ایںدی ترویج تے کم جاری اے۔ اجلاس اچ اسلام آباد ٹیکنالوجی پارک دی تعمیر دی اڳونہی تے وی بریفنگ ݙتی ڳئی۔ اجلاس اچ وفاقی وزراء احسن اقبال، احد خان چیمہ، ڈاکٹر مصدق مسعود ملک، شزا فاطمہ خواجہ اتے متعلقہ اداریاں دے اعلیٰ افسران شریک ہن۔