ہیپاٹائٹس سی دی سکریننگ دا عمل تیز کر ݙتے، اے ہر پاکستانی کوں کراوݨی ہوسی: مصطفیٰ کمال

اسلام آباد (اے پی پی) وفاقی وزیر برائے صحت مصطفیٰ کمال آکھیا جو ملک بھر وچ ہیپاٹائٹس سی دی سکریننگ دا عمل تیز کیتا ویندا پئے، ہر پاکستانی کوں آپݨی سکریننگ کراوݨی ہوسی، وزارتِ صحت دے تمام ملازماں کیتے ہیپاٹائٹس سی دا ٹیسٹ لازمی قرار ݙتا ڳئے۔ اے ڳالھیں انہاں منگل کوں میڈیا بریفنگ دے دوران کیتا۔ مصطفیٰ کمال خود وی ہیپاٹائٹس سی دا ٹیسٹ کروایا، جئیں دا نتیجہ منفی آیا۔ انہاں اکھیا جو وزارتِ صحت دے تمام ملازماں کیتے سکریننگ لازمی ہوسی، ٹیسٹ نہ کراوݨ آلے ملازماں دے خلاف ضابطے دے مطابق کارروائی کیتی ویسی۔ مصطفیٰ کمال آکھیا جو اسلام آباد وچ ہیپاٹائٹس سی دی سکریننگ کیتے 17 پوائنٹس قائم کیتے ڳئن، نجی ہسپتالاں کوں سکریننگ کیتے کٹس تے ضروری آلات فراہم کیتے ویسن تانجو اتھاں وی شہریاں دی سکریننگ کیتی ونڄ سڳے۔ وفاقی وزیر اکھیا جو ہیپاٹائٹس سی دی سکریننگ دا دائرہ پورے پاکستان تئیں ودھایا ویسی، ایں سلسلے وچ تمام وفاقی وزارتاں کوں مراسلے جاری کیتے ویندے پئن جنہاں دے تحت وزراء سمیت تمام وزارتاں دے ملازماں دی سکریننگ لازمی قرار ݙتی ویسی۔ انہاں اکھیا جو پاکستان وچ تقریباً ہک کروڑ ݙاہ لکھ افراد ہیپاٹائٹس سی توں متاثر ہن، اے خطرناک بیماری اے جئیں دا اکثر دیر نال پتہ لگدے اتے بروقت تشخیص نہ تھیوݨ دی صورت وچ اے جگر دے کینسر دا باعث بݨ سڳدی اے۔ وفاقی وزیر آکھیا جو وزیراعظم دے پروگرام دے تحت ہیپاٹائٹس سی دے علاج دی دوائیاں مفت فراہم کیتی ویسن اتے عوام کوں ایں سہولت توں بھرپور فائدہ چاوݨا چاہیدے۔ انہاں اکھیا جو گلگت بلتستان تے اسلام آباد وچ وی ٻہوں وݙے پیمانے تے سکریننگ کیتی ویسی جݙاں جو ملک وچ واپس آوݨ آلے ڈی پورٹ افراد دی سکریننگ وی لازمی قرار ݙتی ڳئی ہے، آندے ترائے مہینیاں تئیں تمام پروازاں توں آوݨ آلے مسافراں کوں وی سکریننگ دے عمل توں گزراوݨ دا منصوبہ اے۔