اسلام آباد وچ پاݨی دی گھٹکی پوری کرݨ کیتے ݙو نویں ڈیم آندے 4 سال وچ مکمل کریسوں، وزیر مملکت داخلہ طلال چوہدری

اسلام آباد۔18اگست (اے پی پی) وزیرمملکت داخلہ طلال چوہدری آکھیے جو اسلام آباد وچ پاݨی دی گھٹکی پوری کرݨ کیتے ݙو نویں ڈیم آندے چار سال وچ مکمل کریسوں، پراݨیاں پائپ لائناں بدلیسوں۔ قومی اسمبلی وچ تمکین اختر نیازی تے ٻنہاں دے اسلام آباد وچ پاݨی دی ودھدی گھٹکی، پاݨی صاف کرݨ تے ول قابلِ استعمال بݨاوݨ دے پلانٹس دی تنصیب دی لوڑھ بارے توجہ ݙیواؤ نوٹس تے وزیرمملکت داخلہ آکھیے جو اسلام آباد وچ پاݨی دا استعمال 240 ملین گیلن یومیہ اے، 80 ملین گیلن دستیاب اے، لوڑھ پوری کرݨ کیتے واپڈا دے ذریعے شاہدرہ ڈیم تے دوتارا ڈیم دی تعمیردی فزیبلٹی سٹڈی کرویندے پیوں، ایں دی ترائے توں 4 سال وچ تکمیل تھیسی تے آندے 30 توں 40 سال دی لوڑھ پوری تھیسی۔ انہاں آکھیا جو اساں قوانین وچ تبدیلی کیتی اے، پاݨی دی سطح بتدریج گھٹ تھیندی پئی اے، ہݨ رین واٹر ویلز بݨائے ویندے پئن، ایں دے بغیر نقشہ ہی منظور نی کریندے۔ انہاں انکشاف کیتا جو پوش ایریا ایف سیکٹرز وچ رہݨ آلے ماہانہ 240 روپے ٻل نی ݙیندے، اے لوگ آپݨے ملازم وی ٻاہروں گھن آندن۔ انہاں آکھیا جو اسلام آباد دے سارے سیکٹرز دیاں پراݨیاں پائپ لائناں کوں ݙڈھ سال وچ تبدیل کیتا ویسی، ایں دا پی سی ون بݨایا ڳئے۔ انہاں ارکان کوں آکھیا جو ریکوری 10 فیصداے، او ریکوری تے ٻلز دی ادائیگی کیتے ساݙے نال تعاون کرن، پاݨی دی بچت کرن، گھراں وچ گاݙیاں دھوتیاں ویندن، پاݨی ضائع کیتا ویندے۔ انہاں ݙسایا جو کہیں سکیم دی منظوری ݙتی ویندی اے تاں ایس او پیز وچ رین واٹر ہاروسٹنگ کوں سامݨے رکھ تے ایں دی منظوری ݙتی ویندی اے۔ انہاں آکھیا جو اسلام آباد کوں کچی آبادی بݨا ݙتا ڳئے، لہتراڑ روڈ تے اکثریتی علاقہ غیر قانونی اے، ایں دی سیوریج سارا پاݨی آلودہ کریندی اے، ایں علاقے وچ 30 توں 40 ارب روپے دا سیوریج ٹریٹمنٹ پلانٹ لاتا ویندا پئے۔ انہاں آکھیا جو اسلام آباد وچ آئی نائن وچ سیوریج ٹریٹمنٹ پلانٹ نصب کیتا ویندا پئے۔