وزیرِاعظم محمد شہباز شریف دی صدارت اچ کابینہ کمیٹی توانائی دا اجلاس، مربوط توانائی پلان دے ہائی لیول ڈیزائن (2027-2060) تے نیشنل الیکٹریسٹی پلان 2023-2027 وچ ترامیم دی منظوری

اسلام آباد۔18اگست (اے پی پی) وزیرِاعظم محمد شہباز شریف دی زیرِ صدارت کابینہ کمیٹی توانائی پاور ڈویژن دی طرفوں پیش کیتی ڳئی مربوط توانائی پلان دے ہائی لیول ڈیزائن (2027-2060) تے نیشنل الیکٹریسٹی پلان 2023-2027 وچ ترامیم دی منظوری ݙیندے ہدایت کیتی اے جو انہاں ترامیم تے خیبر پختونخوا دی حکومت تے نیشنل الیکٹرک پاور ریگولیٹری اتھارٹی توں مزید مشاورت وی کیتی ونڄے۔ وزیراعظم دی زیرِ صدارت کابینہ کمیٹی توانائی دا اجلاس وزیراعظم ہاؤس وچ تھیا۔ وزیراعظم دفتردے میڈیا ونگ توں جاری بیان موجب کابینہ کمیٹی توانائی دے اجلاس وچ پاور ڈویژن دی طرفوں نیشنل الیکٹریسٹی پلان 2023-2027 وچ ترامیم پیش کیتیاں ڳئیاں۔ اے ترامیم توانائی کیتے مربوط منصوبہ بندی، بجلی دی پیداوار وچ ودھارے ، پرے دے علاقیں اچ قابلِ تجدید ذرائع توں پیدا کیتی ونڄݨ آلی بجلی ݙیوݨ، بجلی دی سرحد پارتجارت، ترسیلی نظام وچ وسعت، ٹیرف ڈیزائن، بجلی دی بچت، سسٹم اینڈ مارکیٹنگ آپریشنز، خطرات دی نشاندہی تے ایں حوالے نال انتظامی امور، ایندھن تے ٹیکنالوجی دی مقامی سطح تے استعداد بہتربݨاوݨ، ریسرچ و ڈویلپمنٹ تے ڈیجیٹائزیشن متعلق ہن۔ کابینہ کمیٹی انہاں ترامیم دی منظوری ݙیندے اے ہدایت کیتی جو انہاں ترامیم دے حوالے نال حکومتِ خیبر پختونخوا تے نیشنل الیکٹرک پاور ریگولیٹری اتھارٹی توں مزید مشاورت وی کیتی ونڄے۔ کابینہ کمیٹی توانائی پاور ڈویژن توں پیش کیتی ڳئی مربوط توانائی پلان دے ہائی لیول ڈیزائن (2027-2060) دی منظوری وی ݙتی۔ مذکورہ توانائی پلان وچ وفاقی تے صوبائی الحکومتاں دے علاوہ ٻئے سٹیک ہولڈرز شامل ہوسن۔ ایں پلان دا مقصد انرجی سکیورٹی تے بجلی/توانائی دے شعبے وچ معاشی مسابقت کوں یقینی بݨاوݨ اے۔ ایں پلان دے تحت بجلی کوں مناسب قیمتاں تے صنعتی تے گھریلو صارفین تک پڄاوݨ دے حوالے نال حکمتِ عملی وی ترتیب ݙتی ویسی۔ایں توں انڄ گھٹ کاربن اخراج ݙیوݨ آلی توانائی تے بجلی دی پیداوار، ماحول دوست تے موسمیاتی تبدیلیاں نال مطابقت رکھݨ آلے توانائی ذرائع کوں ودھارا ݙتا ویسی۔ کابینہ کمیٹی توانائی کوں پاور ڈویژن دی طرفوں پاور سیکٹر وچ گردشی قرضے دے حوالے نال مالی سال 2025-2026 دی رپورٹ پیش کیتی ڳئی۔ کابینہ کمیٹی توانائی کوں پٹرولیم ڈویژن دی طرفوں گیس سیکٹر دے گردشی قرضیں مالی سال 2025-2026 دی رپورٹ وی پیش کیتی ڳئی۔