دہشت گرداں دا کوئی رنگ، نسل یا مذہب نی ہوندا، تشدد دے ذریعے نظریات مسلط کرݨ کہیں صورت قابلِ قبول کائںی،عطاء اللہ تارڑ

اسلام آباد۔18اگست (اے پی پی) وفاقی وزیراطلاعات و نشریات عطاء اللہ تارڑ آکھیے جو دہشت گرداں دا کوئی رنگ، نسل یا مذہب نی ہوندا، تشدد دے ذریعے نظریات مسلط کرݨ کہیں صورت قابلِ قبول کائںی، پاکستان دہشت گردی دے خلاف جنگ وچ 90 ہزار قیمتی جاناں دی قربانی ݙتی اے، پاکستانی قوم، افواجِ پاکستان تے پورا معاشرہ دہشت گرداں تے دنیا وچال تکڑی ڈھال ہن، ریاستی اداریں، وفاقی و صوبائی الحکومتاں تے عوام دی مشترکہ کوششاں نال دہشت گردی دے خاتمے کیتے موثر اقدامات کیتے ڳئے، 2017ء وچ دہشت گردی دے خاتمے بعد ملک وچ سرمایہ کاری شروع تھئی تاں جو بعد وچ بدقسمتی نال پالیسی وچ تبدیلی نال انسدادِ دہشت گردی کیتے چار سال دی کوششاں کوں ضیان پُڄا، پالیسیاں دے تسلسل کیتے سیاسی جماعتاں وچ اتفاقِ رائے تھیوݨا چاہیدے، دہشت گردی دے خاتمے دی جدوجہد وچ بیانیے دا کرداراہم اے، معرکہ حق وچال پہلگام واقعے بعد بھارت پاکستان دے خلاف بے بنیاد الزامات لاتے اصل جنگ توں پہلے ہی بیانیے دی جنگ شروع کر ݙتی ہئی تاں جو پاکستان موثر انداز وچ بھارتی الزامات دا جواب ݙتا، وزیراعظم شہباز شریف دی طرفوں پہلگام واقعے دی بین الاقوامی سطح تے شفاف تحقیقات دی پیشکش نال بھارت بوکھلاہٹ دا شکار تھی ڳیا، پاکستان دا مثبت تشخص دنیا وچ ابھرئے، ایں کوں سفارتی سطح تے وݙیاں کامیابیاں حاصل تھئن تے پاکستان ہک قابلِ اعتماد ثالث دے طور تے سامݨے آئے۔ انہاں اے ڳالھ سسٹین ایبل سوشل ڈویلپمنٹ آرگنائزیشن (ایس ایس ڈی او) دے زیرِاہتمام بلوچستان، پنجاب تے سندھ دے اراکینِ پارلیمنٹ کیتے انسدادِ دہشت گردی دے فریم ورک، قانون سازی متعلق ذمہ واریاں دے موضوع تے کیپیسٹی بلڈنگ ورکشاپ نال خطاب کریندے آکھی۔وفاقی وزیر اطلاعات آکھیا جو اطلاعاتی جنگ تے بیانیے دے محاذ تے اے حقیقت پیشِ نظر رکھݨ ضروری اے جو تاثر اکثر حقیقت توں ودھ طاقتور ہوندے۔ بطور انفارمیشن منیجرز یا نیریٹو بلڈرز ساݙا کم تاثر تے حقیقت وچال موجود خلاء کوں گھٹ کرݨ اے۔ عطاء اللہ تارڑ آکھیا جو 2017ء وچ ملک توں دہشت گردی دا مکمل طور تے خاتمہ تھی چکیا ہئی، کراچی وچ امن و امان دی صورتحال، خیبرپختونخوا وچ دہشت گردی دیاں سرگرمیاں، بلوچستان دے کجھ علاقیں وچ دہشت گردی دی لہر تے جنوبی پنجاب توں وسطی پنجاب دے پاسے ودھدی تھئی شدت پسندی جیھے چیلنجز پاروں ایں ویلھے ریاست قومی ایکشن پلان گھن آوݨ دا فیصلہ کیتا جیں تے سارے متعلقہ فریقاں لبیک آکھیا۔ انہاں آکھیا جو وفاقی و صوبائی الحکومتاں، افواجِ پاکستان تے ٻئے اداریں رل تے دہشت گردی دے خلاف مشترکہ کوششاں کیتیاں جیں دے نتیجے وچ دہشت گردی دا وݙی حد تئیں خاتمہ ممکن تھیا، دہشت گردی دے خلاف ایں کامیاب جدوجہد وچ موثر بیانیے وی اہم کردار ادا کیتا۔وفاقی وزیر آکھیا جو پہلگام واقعے دے فوری بعد بھارت دی طرفوں پاکستان تے ایں واقعے وچ ملوث تھیوݨ دے الزامات لاتے ونڄݨ لڳے، ایں طرح اصل جنگ شروع تھیوݨ توں پہلے ہی تاثر تے بیانیے دی جنگ شروع تھی ڳئی۔ انہاں آکھیا جو ریاست بھارتی الزامات دا بھرپور تے موثر انداز وچ جواب ݙیندے اے سوالات چاتے جو پہلگام واقعہ پیش آوݨ بعد محض ادھے گھنٹے دے اندر ایف آئی آر کیویں درج تھی ڳئی تے جے بھارتی دعوے موجب حملہ آور پاکستان توں آئے ہن تاں لائن آف کنٹرول پہلگام توں تقریباً ݙڈھ سو کلو میٹر پرے ہووݨ تے درمیان وچ دشوار گزار پہاڑی علاقہ موجود تھیوݨ دے باوجود او اتنے کم ویلھے وچ اتھاں کیویں پڄے جݙاں جو بھارتی سکیورٹی انہاں کوں وقتی شناخت یا روکݨ وچ وی ناکام رہی۔ انہاں آکھیا جو وزیراعظم شہباز شریف پی ایم اے کاکول وچ خطاب وچال پہلگام واقعے دی بین الاقوامی سطح تے شفاف تحقیقات دی پیشکش کیتی جیں بعد بھارت بوکھلاہٹ دا شکار تھی ڳیا، ایں کنے کوئی موثر جواب نہ ہئی۔ انہاں آکھیا جو ایں بعد کئی ݙینہاں تئیں بیانیے دی جنگ جاری رہی تے انہاں بطور وزیر اطلاعات عالمی میڈیا دے مختلف اداریں جنہاں وچ سی این این، بی بی سی، اسکائی نیوز، سی این بی سی، الجزیرہ تے العربیہ شامل ہن، تے پاکستان دا موقف پیش کیتا۔ انہاں آکھیا جو عالمی میڈیا دے سامݨے سوال چاتا ڳیا جو جیں قوم دہشت گردی دے خلاف جنگ وچ 90 ہزار قیمتی جاناں دی قربانی ݙتی ہووے، او دہشت گردی دی حمایت کیویں کر سڳدی اے؟ انہاں آکھیا جو انہاں شہداء وچ افواجِ پاکستان دے جوان، سپاہی تے افسران، پولیس تے قانون نافذ کرݨ الے اداریں دے اہلکار، سیاستدان، عام شہری، انجینئرز، ڈاکٹرز تے ٻال شامل ہن جݙاں جو سانحہ اے پی ایس وچ وی ساݙے نشوم ٻالاں دہشت گردی دے خلاف جنگ وچ آپݨے خون دا نذرانہ پیش کیتا۔وفاقی وزیر اطلاعات آکھیا جو ہک پاسے پاکستان ایجھی قوم اے جیں دے ہر طبقے دہشت گردی دے خلاف جنگ وچ بے مثال قربانیاں ݙتن جݙاں جو ٻئے پاسے بھارت اے جو خود دنیا دے مختلف ملکاں وچ اقلیتاں کوں قتل کراوݨ وچ ملوث ریہے۔ انہاں آکھیا جو دہشت گردی دے عروج دے دور وچ پاکستان دے ہر ٻئے گھر وچ قربانی دی ہک لازوال داستان موجود ہئی، ایں دے باوجود بھارت پاکستان تے سرحد پار دہشت گردی دے الزامات لیندے حالانکہ پاکستان خود دہشت گردی دے خلاف جنگ لڑدا پئے تے ایں جنگ وچ بارا جانی ضیان کرچکیے۔ انہاں آکھیا جو بھارت دے ٻاہرلے ملک اقلیتاں کوں نشانہ بݨاوݨ دے واقعات دنیا دے سامݨے ہن، کینیڈا وچ ہک سکھ شہری دے قتل وچ وی بھارت دے ملوث تھیوݨ دے شواہد سامݨے آچکن جݙاں جو مختلف ملکاں وچ بھارتی حکومت دی طرفوں اقلیتی برادری دے لوکاں کوں نشانہ بݨائے ونڄݨ دے واقعات سامݨے آچکن۔ انہاں آکھیا جو ہک پاسے بھارت پاکستان تے سرحد پار دہشت گردی دے الزامات لیندے جݙاں جو ٻئے پاسے خود بھارتی حکومت ٻاہرلے ملک اقلیتاں دے قتل وچ ملوث رہی اے۔ انہاں آکھیا جو عالمی میڈیا دے سامݨے پاکستان حقائق تے دستیاب شواہد دی بنیاد تے آپݨا بیانیہ موثر انداز وچ پیش کیتا جو جیں ملک دہشت گردی دے خلاف جنگ وچ قربانیاں ݙتیاں ہوون، ایں دا موازنہ ایہوجیھے ملک نال نی کیتا ونڄ سڳدا جو خود دہشت گردی کوں ودھارا ݙیوݨ وچ ملوث ہووے۔انہاں اکھیا جو پاکستان کنے آپݨے موقف دے حق وچ ٹھوس شواہد موجود ہن جنہاں وچ بلوچستان توں بھارتی جاسوس کلبھوشن یادیو دی گرفتاری وی شامل اے جو پاکستان وچ دہشت گردی دیاں سرگرمیاں تے دہشت گرداں دی سہولت کاری وچ ملوث ہئی۔ وفاقی وزیر آکھیا جو جݙاں اے حقائق تے شواہد عالمی میڈیا دے سامݨے رکھیے ڳئے تاں بھارت کنے انہاں دا کوئی موثر جواب کائناں ہئی ۔ انہاں آکھیا جو بلوچستان دے حوالے نال بھارتی میڈیا تے اتھاؤں دے کجھ تجزیہ کاراں دے بیانیے دا جائزہ ڳھدا ونڄے تاں بھارت دی طرفوں ایں صوبے کوں مسلسل ہدف بݨاوݨ دا رجحان واضح نظر آندے۔ انہاں آکھیا جو کلبھوشن یادیو دی بلوچستان توں گرفتاری ایں ڳالھ دا واضح ثبوت اے جو بھارت پاکستان دے اندر دہشت گردی تے بدامنی دیاں سرگرمیاں دی سرپرستی وچ ملوث ریہے۔عطاء اللہ تارڑ آکھیا جو دہشت گردی دے خلاف پاکستان دا بیانیہ مرکزی حیثیت رکھیندے، جے پاکستانی قوم تے افواجِ پاکستان دہشت گردی دے خلاف جنگ نہ لڑدیاں تاں اے دہشت گرد دنیا دے مختلف ملکاں وچ گھمدے پھردے پئے ہوندے۔ انہاں آکھیا جو پاکستانی قوم، افواجِ پاکستان تے پورا پاکستانی معاشرہ دہشت گرداں تے باقی دنیا وچال ہک تکڑی ڈھال ہن، ایں کیتے جݙاں کوئی پاکستانی دہشت گردی دے خلاف جنگ وچ شہید تھیندے تاں او صرف آپݨے ملک تے آپݨے مقصد کیتے قربانی نی ݙیندا بلکہ دنیا کوں ہک محفوظ تے پرامن جاہ بݨاوݨ کیتے وی آپݨی جان دا نذرانہ پیش کریندے۔ انہاں آکھیا جو بیانیے دے محاذ تے انسدادِ دہشت گردی دے حوالے نال پاکستان ہک موثر جنگ لڑی، جیں وچ اللہ تعالیٰ وݙی کامیابی عطا کیتی، بین الاقوامی سطح تے پاکستان دا موقف تکڑا تھئے تے دنیا پاکستانی بیانیے کوں تسلیم کیتا۔ انہاں آکھیا جو ایں کامیابی وچ وزارتِ اطلاعات و نشریات، آئی ایس پی آر تے پاکستانی میڈیا اہم کردار ادا کیتا۔وفاقی وزیر آکھیا جو معرکہ حق وچال بھارتی میڈیا دی طرفوں لاہور تے ملتان دیاں بندرگاہواں دی تباہی سودھے ٻہوں سارے بے بنیاد دعوے کیتے ڳئے تاں جو پاکستانی میڈیا ذمہ دارانہ صحافت دا مظاہرہ کریندے حقائق کوں سامݨے رکھیا۔ انہاں آکھیا جو قوم متحد ہئی تے حقائق و اعداد و شمار دی بنیاد تے پاکستان آپݨا موقف دنیا دے سامݨے پیش کیتا جیں دے نتیجے وچ اللہ تعالیٰ کامیابی عطا فرمائی۔وفاقی وزیراطلاعات آکھیا جو 2017ء وچ دہشت گردی دے خاتمے بعد کراچی توں خیبر تئیں امن و امان دی صورتحال بہتر تھئی تے ملک وچ سرمایہ کاری دا عمل وی شروع تھیا تاں جو بدقسمتی نال بعد وچ دہشت گرداں تے انہاں دے سہولت کاراں کیتے ہمدردی پیدا کیتی ڳئی تے انہاں کوں ول آباد کرݨ تے انہاں نال مذاکرات دی پالیسی اختیار کیتی ڳئی جیں نال دہشت گردی دے خاتمے کیتے چار سال تئیں جاری رہݨ آلی قومی کوششاں کوں ٻہوں ضیان پڄا۔ انہاں آکھیا جو پالیسی وچ ایں تبدیلی دے فیصلے تے سیاسی جماعتاں کوں اعتماد وچ نی ڳھدا ڳیا حالانکہ قومی سلامتی تے دہشت گردی جیھے اہم معاملیں تے سیاسی جماعتاں وچال اتفاقِ رائے ضروری ہوندے۔ انہاں آکھیا جو اڄ ملک وچ دہشت گردی دی جو صورتحال درپیش اے، او 2017ء بعد پالیسی وچ تبدیلی دا نتیجہ اے۔وفاقی وزیر آکھیا جو اللہ تعالیٰ دا شکر اے جو گزریل ڈھائی توں ترائے سالاں وچال قومی ایکشن پلان دے تحت متعدد ایریاز وچ نمایاں بہتری آئی اے۔ دہشت گرد ہݨ اوکھے اہداف دی بجائے نسبتاً سافٹ ٹارگٹس دا رخ کریندے پئن۔ انہاں آکھیا جو جعفرایکسپریس دی طرز دا واقعہ پہلے کݙاہیں رونما نی تھیا، ساݙی سکیورٹی ایجنسیاں پیشہ ورانہ مہارت نال ریسکیو آپریشن مکمل کیتا۔ انہاں آکھیا جو دہشت گردی دے نتیجے وچ تھیوݨ آلے نقصان دی بنیادی وجہ پالیسی وچ تبدیلی رہی جݙاں جو دہشت گردی دیاں اڄوکیاں کارروائیاں وچ ٻاہرلے ہتھ دے ملوث تھیوݨ وچ وی کوئی شک و شبہ نی کیوں جو ٻاہرلی مداخلت دے بغیر ایں نوعیت دیاں سرگرمیاں ممکن کائنی۔انہاں آکھیا جو اطلاعات دے شعبے وچ قوانین موجود ہن جݙاں جو سائبر کرائمز نال نبڑݨ کیتے ایف آئی اے دے تحت قائم ونگ کوں ہݨ نیشنل سائبر کرائم انویسٹی گیشن ایجنسی وچ تبدیل کیتا ڳئے۔ انہاں آکھیا جو ڈیجیٹل پلیٹ فارمز تے کہیں بندے دی طرفوں ہک پوسٹ وی کہیں ٻئے شخص دی زندگی کوں خطرے وچ پا سڳدی اے جݙاں جو انسدادِ دہشت گردی، خوامخواہ زنانیاں کوں ہراساں کرݨ، ٻالاں نال بدسلوکی متعلق وی سنگین مسئلے درپیش ہن۔ وفاقی وزیر آکھیا جو ڈیجیٹل شعبے وچ غلط معلومات تے گمراہ کن مواد معاشرے تے لوکاں دی جان و مال کیتے خطرہ بݨ سڳدے، ایں کیتے ایہوجیھے معاملیں کوں روکݨ کیتے مؤثر قانونی ڈھانچے تے نظام دی لوڑھ محسوس کیتی ڳئی۔ انہاں آکھیا جو قومی ایکشن پلان دے تحت بیانیہ تشکیل ݙیوݨ دے عمل وچ قانون دا نفاذ وی ہک اہم عنصر اے جیں کیتے قانون سازی، ضابطہ کاری تے ایہوجیھے نظام وضع کرݨ شامل اے جنہاں دے ذریعے ریاست مخالف بیانیے تے پروپیگنڈے دے ذریعے لوکاں دی ذہن سازی دا موثر طور تے تدارک کیتا ونڄ سڳے۔انہاں ماہ رنگ بلوچ دا حوالہ ݙیندے آکھیا جو او ریاستی وسائل تے حکومتی معاونت نال تعلیم حاصل کرتے ڈاکٹر بݨی، جیں ریاست انہاں کوں تعلیم مکمل کرݨ تے معاشرے دا تعلیم یافتہ فرد بݨݨ دے موقع ݙتے، انہاں ایں ریاست دے خلاف مہم چلائی۔ وفاقی وزیر سوال چاتا جو ماہ رنگ بلوچ دے دھرنے تے اسلام آباد آوݨ سودھے ٻئی سرگرمیاں کیتے مالی وسائل کتھوں آندن تے انہاں سرگرمیاں دی مالی معاونت کون کریندے؟وفاقی وزیراطلاعات آکھیا جو دہشت گردی تے ریاست مخالف سرگرمیاں وچ ٻاہرلے ہتھ دے ملوث تھیوݨ دے شواہد موجود ہن، بلوچستان توں کلبھوشن یادیو دی گرفتاری ایں حوالے نال مستند شواہد وچ شامل اے۔ انہاں آکھیا جو قومی ایکشن پلان دے تحت انسدادِ دہشت گردی حکومت دی اہم ترجیحات وچ شامل اے، ایں مقصد کیتے قانونی ڈھانچہ موجود اے جیں وچ ویلھے دے تقاضیں موجب مزید بہتری گھن آئی ویندی پئی اے ۔ انہاں آکھیا جو بیانیے دی جنگ وچ وفاق تے سارے صوبیں دی مشترکہ شرکت ناگزیر اے تاں جو ریاست مخالف پروپیگنڈے تے لوکاں دی ذہن سازی دیاں کوششاں دا موثر تے مربوط انداز وچ مقابلہ کیتا ونڄ سڳے۔وفاقی وزیرآکھیا جو ایں حوالے نال اقدامات جاری ہن تاں جو موجودہ نظام وچ مزید بہتری دی گنجائش موجود اے۔ قومی ایکشن پلان دے تحت موجودہ قانونی ڈھانچے کوں مزید موثر بݨاوݨ تے تاثر سازی دے محاذ تے ریاست دا مثبت کردار مضبوط کرݨ ضروری اے۔ انہاں آکھیا جو ایں عمل وچ صوبائی اسمبلیاں دا اہم کردار اے جنہاں انسدادِ دہشت گردی تے ریاستی بیانیے دے تحفظ کیتے قانون سازی کیتی اے۔ انہاں آکھیا جو بلوچستان حکومت وی ریاست مخالف پروپیگنڈے دا مقابلہ کرݨ تے آپݨا موقف موثر انداز وچ پیش کرݨ کیتے قابلِ ذکر اقدامات کیتن۔عطاء اللہ تارڑ آکھیا جو حکومت قواعد وچ تبدیلی دے ذریعے جدید خطوط تے استوار نواں ڈیجیٹل کمیونیکیشن ڈیپارٹمنٹ قائم کیتے جیں دا مقصد ڈیجیٹل شعبے وچ ابلاغ، میڈیا مانیٹرنگ تے قومی بیانیے کوں موثر بݨاوݨ کیتے جدید ٹیکنالوجی توں فیدہ چاوݨ اے۔ انہاں آکھیا جو پاک چائنہ فرینڈ شپ سینٹر وچ قائم جدید ڈیجیٹل سیٹ اپ معرکہ حق وچال وی موثر کردار ادا کیتا۔ انہاں آکھیا جو ایں مرکز وچ مصنوعی ذہانت دی بنیاد تے میڈیا مانیٹرنگ دا نظام موجود اے جیں دے ذریعے الیکٹرانک میڈیا تے نشر تھیوݨ آلی اہم خبراں تے قابلِ توجہ امور دی نشاندہی کیتی ویندی اے۔وفاقی وزیر آکھیا جو وفاقی حکومت صوبائی حکومتاں کوں وی ڈیجیٹل کمیونیکیشن ڈیپارٹمنٹ دے قیام وچ معاونت دی پیشکش کیتی اے۔ انہاں آکھیا جے کوئی صوبہ آپݨا نظام خود تشکیل ݙیوݨ چاہے تاں حکومت ایں کوں مطلوبہ ٹیکنالوجی تے ماہرین دی معاونت ݙیسی تاں جو صوبے آپݨیاں ضرورتاں موجب اے نظام خود تیار کرسڳن۔ انہاں آکھیا جو ملک وچ مختلف چھوٹے چھوٹے سوشل میڈیا سیلز تاں کم کریندے پئن تاں جو وفاق تے صوبیں وچ مربوط تے منظم ڈیجیٹل ڈھانچے دی کمی ہئی جیں کوں ہݨ جدید ڈیجیٹل نظام دے ذریعے دور کیتا ویندا پئے۔ انہاں آکھیا جو حکومت پاکستان ٹی وی دے ناں توں وی ہک نواں ڈیجیٹل اقدام شروع کیتے جیں دے تحت ثقافت، موسیقی، کھاݨیں، فنون تے سیاحت سودھے مختلف شعبیں تے مواد تیار کیتا ویندا پئے۔ ایں اقدام دا مقصد ڈیجیٹل شعبے وچ پاکستان دے مثبت تے سافٹ امیج کوں دنیا دے سامݨے اجاگر کرݨ اے۔عطاء اللہ تارڑ اکھیا جو آندے ݙو توں ݙڈھ سال اچ ڈیجیٹل شعبے وچ پاکستان دے مثبت تشخص کوں اجاگر کرݨ، بین الصوبائی رابطہ، ہم آہنگی تے تعاون ودھاوݨ کیتے مزید موثر اقدامات کیتے ویسن تاں جو دنیا دے سامݨے پورے پاکستان دا مثبت تے جامع تشخص پیش کیتا ونڄ سڳے۔ وفاقی وزیرآکھیا جو جنوبی پنجاب تے بلوچستان وچ ٹی وی چینلز دے بیوروز دا قیام ضروری اے کیوں جو کجھ علاقیں وچ سویل دی خبر رات کوں مرکز تئیں پڄدی اے جیڑھا ہک وݙا چیلنج اے۔ انہاں نجی ٹی وی چینلز کوں آکھیا جو او ایں حوالے نال آپݨیاں تجویزاں پیش کرن۔وفاقی وزیر آکھیا جو پاکستان دا سافٹ امیج پوری دنیا وچ ابھرئے، سفارتی سطح تے پاکستان کوں وݙیاں کامیابیاں ملئن ملک ہک موثر ثالث دے طور تے سامݨے آئے جیں کوں عالمی سطح تے قدر دی نگاہ نال ݙٹھا ویندا پئے۔ انہاں آکھیا جو وزارتِ اطلاعات و نشریات بیانیے دی طاقت کوں بروئے کار گھن آندے دنیا وچ پاکستان دے مثبت تشخص کوں مزید اجاگر کرݨ کیتے بھرپور کوششاں کریندی پئی اے جݙاں جو پرتشدد انتہا پسندی مکاوݨ کیتے پی آئی ڈی وچ خصوصی سیل وی بݨایا ڳئے۔وفاقی وزیر آکھیا جو دہشت گرداں دا کوئی رنگ، نسل یا مذہب نی ہوندا، دہشت گرد دی نہ کوئی قومیت ہوندی اے، نہ رنگ، نسل یا مذہب، ایں کوں صرف تشدد دی زبان سمجھ آندی اے تے او تشدد دے ذریعے آپݨے نظریات مسلط کرݨ دی کوشش کریندے۔مملکتِ خداداد پاکستان کیتے ساݙے وݙیں وݙیاں قربانیاں ݙتن، ہجرت کیتی تے جان و مال دی قربانی ݙتی، اے ملک 27 رمضان المبارک دی رات معرضِ وجود وچ آیا تے انشاء اللہ قیامت تئیں قائم رہسی۔ انہاں آکھیا جو پاکستان کوں ملݨ آلی عزت تے کامیابیاں ایں ڳالھ دی نوید ہن جو ملک مزید ترقی کریسی تے قوم اتحاد دے نال ایں کوں اڳوں گھن تے ویسی۔وفاقی وزیر آکھیا جو بلوچستان دی ترقی ہمیشہ حکومت دی ترجیحات وچ شامل رہی اے، بلوچستان دا فیڈریشن وچ وݙا حصہ اے، وزیراعظم محمد شہباز شریف تے فیلڈ مارشل سید عاصم منیر بلوچستان دے حقوق، ترقی تے خوشحالی دے حوالے نال خصوصی احساس رکھیندن تے بلوچستان دی ترقی کوں پالیسی سازی وچ اہمیت ݙتی ویندی اے۔ وزیراعظم محمد شہباز شریف دی طرفوں این-25 شاہراہ دی تعمیر و بحالی دے اعلان دا پورے ملک خیرمقدم کیتا تے کہیں ایں فیصلے دی مخالفت نی کیتی۔ پنجاب، سندھ تے خیبر پختونخوا سودھے پورے ملک بلوچستان کیتے ایں اہم اقدام دی حمایت کیتی۔ انہاں آکھیا جو وزیراعظم دے بلوچستان دے حوالے نال جذبات محض موجودہ دور تئیں محدود نی بلکہ طویل عرصے توں او صوبے دی ترقی تے حقوق کیتے آواز چیندے ریہے تے ہر اجلاس وچ ترقیاتی منصوبیں وچ بلوچستان دے مفادات کوں سامݨے رکھݨ دی ہدایت کریندن۔عطاء اللہ تارڑ آکھیا جو وزیراعظم محمد شہباز شریف بطور وزیراعلیٰ پنجاب بلوچستان دے طلبہ تے جامعیں کیتے خصوصی کوٹے تے موقع یقینی بݨائے تے پنجاب دی ترقیاتی پالیسیاں وچ بلوچستان دے طلبہ کیتے مخصوص حصہ مختص کیتا۔ انہاں آکھیا جو وزیراعلیٰ پنجاب مریم نواز شریف وی انسدادِ دہشت گردی کیتے بلوچستان حکومت کوں 15 ارب روپے ݙتے جیں تے بلوچستان حکومت اضافی فنڈز مختص کرݨ تے پنجاب حکومت دا شکریہ ادا کیتا۔وفاقی وزیر آکھیا جو ملک وچ کجھ بنیادی تے قومی پالیسیاں دے تسلسل تے سیاسی جماعتاں وچال اتفاقِ رائے تھیوݨا چاہیدے، الیکشن وچ کوئی وی جماعت کامیاب ہووے، چنڳی تے قومی مفاد دی پالیسیاں دا تسلسل برقرار رہݨا چاہیدے۔ انہاں ریسکیو 1122 دی مثال ݙیندے آکھیا اگرچہ چوہدری پرویز الٰہی سیاسی طور تے ساݙے مخالف ہن تاں جو ریسکیو 1122 انہاں دا ہک بہترین منصوبہ اے تے ایں دا کریڈٹ ہمیشہ انہاں کوں ݙتا ویسی۔ انہاں آکھیا جو وزیراعظم محمد شہباز شریف بطور وزیراعلیٰ پنجاب ریسکیو 1122 کوں مزید وسعت ݙتی تے بعد وچ ایں دا دائرہ بلوچستان، خیبر پختونخوا تے سندھ تئیں کھنڈا ݙتا ڳیا، عطاء اللہ تارڑ آکھیا جو ایہوجیھاں ٻہوں مثالاں موجود ہن جتھاں آوݨ آلی حکومتاں سیاسی اختلاف دے باوجود سابق حکومت دے چنڳے منصوبیں کوں ختم کرݨ دی بجائے انہاں کوں جاری رکھیا۔ ملک وچ ایہوجیہا سیاسی اتفاقِ رائے پیدا کرݨ دی لوڑھ اے جیں دے تحت سابق حکومتاں دے چنڳے منصوبیں تے قومی مفاد دی پالیسیاں کوں تسلسل دے نال اڳوں ودھایا ونڄے۔ انہاں آکھیا جو ماضی وچ جݙاں سیاسی رہنماواں دی ہک وݙی تعداد جیلاں وچ ہئی تے اپوزیشن دی صفِ اول دی قیادت موجود نہ ہئی، ایں ویلھے وی شہباز شریف بطور اپوزیشن لیڈر قومی مفاد وچ میثاقِ معیشت دی تجویز پیش کیتی ہئی۔وفاقی وزیرآکھیا جو جیویں 2017ء وچ کراچی توں دہشت گردی دا خاتمہ تے امن و امان دی صورتحال وچ نمایاں بہتری گھن آئی ڳئی، ایویں کراچی دی ترقی کیتے وی ساریاں سیاسی قوتاں کوں رَل تے کم کرݨا ہوسی۔