وزیراعلیٰ پنجاب دی اڳواݨی اچ صاف پاݨی بارے اجلاس، واٹر فلٹریشن پلانٹس دے منصوبیاں دا جائزہ

لاہور۔18اگست(اے پی پی)وزیراعلیٰ پنجاب مریم نواز دی اڳواݨی اچ صاف پاݨی دے حوالے نال اجلاس تھئے جیندے اچ صوبے اچ واٹر فلٹریشن پلانٹس دے منصوبیاں دا جائزہ ڳھدا ڳیا۔ اجلاس اچ بہاولنگر، بہاولپور، راجن پور، رحیم یار خان سودھا مختلف اضلاع اچ واٹر فلٹریشن پلانٹس دے منصوبیاں تے بریفنگ ݙتی ڳئی۔ وزیراعلیٰ منصوبیاں کوں ویلھے تے مکمل کرݨ دی ہدایت کیتی۔ اجلاس کوں ݙسایا ڳیا جو 9 اضلاع اچ 2778 نویں واٹر فلٹریشن پلانٹس دے منصوبیاں تے کم جاری اے، جݙاں جو رحیم یار خان، بہاولپور، خوشاب اتے ڈیرہ غازی خان اچ واٹر بوٹلنگ پراجیکٹس تے وی پیشرفت تھئی اے۔ ہر واٹر بوٹلنگ پوائنٹ توں روزانہ تقریباً 2500 بوتلاں صاف پاݨی عوام کوں ملدا پئے، جݙاں جو بوٹلنگ پلانٹس فی گھنٹہ 5 ہزار لیٹر صاف پاݨی ݙیوݨ دی صلاحیت رکھیندن۔ بریفنگ موجب صاف پاݨی پراجیکٹ دے کلسٹر ون اچ راجن پور اتے رحیم یار خان دے 702 ڄاہیں اچوں 570 واٹر فلٹریشن پلانٹس مکمل تھی چکین۔ ݙوہیں اضلاع دے کھارے پاݨی والے علاقیاں اچ 95 آر او تے 52 یو ایف پلانٹس لائے ویسن۔ کلسٹر 14 اچ بہاولپور اتے بہاولنگر دے 892 سائٹس اچوں 749 مکمل تھی چکین۔ ݙوہیں اضلاع دے کھارے پاݨی والے علاقیاں اچ 130 آر او، 64 یو ایف اتے ایم ایف پلانٹس لائے ویسن۔ بریفنگ دے مطابق چشتیاں، منچن آباد، ہارون آباد اتے فورٹ عباس اچ 482 سائٹس اچوں 368 مکمل تھی چکین، جݙاں جو بہاولپور، یزمان، احمد پور اتے حاصل پور اچ 410 سائٹس اچوں 351 تے کم مکمل تھی چکیے۔