انسانی ہمدردی، اخوت تے آپسی احترام فلاحی معاشرے دی حقیقی بنیاد ہن: سپیکر قومی اسمبلی

اسلام آباد۔19اگست (اے پی پی) سپیکر قومی اسمبلی سردار ایاز صادق آکھیا جو انسانی ہمدردی، اخوت تے آپسی احترام فلاحی معاشرے دی حقیقی بنیاد ہن۔ انسانی جان، عزت تے وقار دا تحفظ مہذب معاشرے دی بنیادی سنڄاݨ اے۔ بدھ کوں انہاں انسانیت دے عالمی ݙینہہ دے موقع تے آپݨے سنیھے اچ انسانیت دی خدمت کرݨ آلے فلاحی اداریاں تے فلاحی کم کرݨ آلی شخصیتاں کوں خراجِ تحسین پیش کیتا اتے آکھیا جو دینِ اسلام انسانیت، ہمدردی، مساوات تے خدمتِ خلق دا درس ݙیندے۔ پاکستان گزریل کئی ݙہاکیاں توں انسانی بنیاداں تے افغان مہاجرین دی خدمت کریندا پئے۔ پاکستان دنیا بھر اچ عالمی تنازعات تے جنگ توں متاثرہ ملکاں وچ اقوامِ متحدہ دے امن مشن وچ حصہ گھندا پئے۔ انسانیت دی خدمت، احترام تے تحفظ اساں ساریاں دی مشترکہ ذمہ واری اے۔ انہاں آکھیا جو انسانیت دا عالمی ݙینہہ اساکوں انسانی اقدار دے فروغ دا درس ݙیندے۔ جنگاں، تنازعات تے قدرتی آفات توں متاثرہ افراد دی مدد اساݙی اخلاقی ذمہ واری اے۔