علاج دیاݨ بہتر سہولتاں ہر قیدی دا حق اے، مسلم لیگ (ن) کݙاہیں صحت دے معاملے تے سیاست نی کیتی، طلال چوہدری

اسلام آباد۔19اگست (اے پی پی) وزیرِمملکت داخلہ طلال چوہدری آکھیے جو علاج دی بہتر سہولتاں ہرقیدی دا حق ہن، وزیراعظم توں گھن تے مسلم لیگ (ن) دے کہیں کارکن کݙاہیں صحت دے معاملے تے سیاست نی کیتی، حکومت دا پہلے ݙینھ توں واضح موقف ریہے جو قیدیاں نال ملاقاتاں دا فیصلہ جیل مینوئل تے عدالتی احکامات موجب ہوسی۔ اے ڳالھ انہاں وفاقی وزیرِاطلاعات و نشریات عطاء اللہ تارڑ دے رلے میڈیا تے آکھی۔ طلال چوہدری آکھیا جو بیگم کلثوم نواز دی بیماری دے دوران پی ٹی آئی دی طرفوں جیں کم ظرفی دا مظاہرہ کیتا ڳئے او ساریں دے سامݨے ہے ، بیماری دا مذاق اݙاوݨ تے ایکوں سیاسی مقصد کیتے استعمال کرݨا پی ٹی آئی دا وطیرہ ریہے۔ انہاں آکھیا جو ساݙی قیادت ہمیشہ ظرف تے کردار دا مظاہرہ کیتا، کہیں دی میڈیکل رپورٹس یا بیماری تے سیاست نی کیتی تے نہ ہی اڳوں کریسوں۔طلال چوہدری آکھیا جو سارے سیاسی حربے استعمال کرݨ دے بعد بانی پی ٹی آئی کنے ہݨ صرف ہمدردی دا کارڈ رہ ڳئے، ٻالاں نال ملاقات، بیماری تے جان کوں خطرے جیھے معاملات کوں سیاسی بیانیے دے طور تے استعمال کیتا ویندا پئے۔ انہاں آکھیا جوعدالت وی آپݨے فیصلے وچ واضح کیتا جو ریلیف ملݨ دے بعد سیاست نہ کیتی ویسی۔ انہاں آکھیا جو عدالت جے کہیں قیدی کوں ریلیف ݙتے تاں ایں دا اختیار اے تے حکومت کوں ایں تے کوئی اعتراض کائںی تاں جو ایں فیصلے کوں سیاسی رنگ ݙیوݨ توں گریز کیتا ونڄݨا چاہیدے۔ انہاں آکھیا جو پہلے آکھیا ڳیا جو بانی پی ٹی آئی ہسپتال ویسن، ول بنی گالا، نتھیا گلی تے ٻیاں جہیں دیاں ڳالھیں کیتیاں ڳئن لیکن حقیقت اے ہے جو او جیل متعلق عدالتی فیصلے دے مطابق ہی رہسن۔طلال چوہدری آکھیا جو پی ٹی آئی کوں آپݨی سیاست دا محور این آراو، ترمیم تے بیماری دے بجائے عوامی کارکردگی کوں بݨاوݨا چاہیدے، خیبر پختونخوا وچ 17 سال توں حکومت دے باوجود عوام کوں کیا ݙتا ڳئے، ایں دا جواب وی ݙتا ونڄے۔ طلال چوہدری آکھیا جو پاکستان دے ریاستی ادارے تے سیاسی قیادت ملک کوں درپیش مسئلیں دے حل کیتے رَل تے کم کریندے پئن، اداریں دے سربراہان دے سامݨے صرف پاکستان تے پاکستانی عوام دے مسئلیں دا حل اے۔ انہاں آکھیا جو ریاستی اداریں تے سیاسی قیادت ماضی وچ وی پاکستان دے مفاد وچ فیصلے کیتن تے اڳوں وی ملک دے بہتر مستقبل کیتے فیصلے کیتے ویسن۔ طلال چوہدری واضح کیتا جو عدالت دے فیصلے دے پچھوں کوئی خفیہ کہانی یا این آر اوکائنی ، عدالت آپݨے اختیار دے تحت ریلیف ݙتے، اینکوں سیاسی سازش یا کہیں ڈیل نال جوڑݨ دی کوشش درست کائنی۔ انہاں آکھیا جو بانی پی ٹی آئی تے انہاں دے حامیاں کوں بیماری تے عدالتی فیصلے کوں سیاسی ایجنڈا بݨاوݨ دے بجائے آپݨی کارکردگی تے عوامی مسئلیں تے توجہ ݙیوݨی چاہیدی اے۔