صحت دے معاملے تے سیاست نی ہووݨی چاہیدی، بانی پی ٹی آئی کوں قانون موجب طبی سہولتاں ملدیاں پئن، علاج معالجے تے کوئی ابہام کائنی، نجی ہسپتال دے حوالے نال نظرثانی درخواست دائر ہووݨی چاہیدی اے، عطاء اللہ تارڑ

اسلام آباد۔19اگست (اے پی پی) وفاقی وزیرِ اطلاعات و نشریات عطاء اللہ تارڑ آکھیے جو صحت دے معاملے تے سیاست نی ہووݨی چاہیدی، ہر قیدی کوں آئین و قانون تے جیل مینوئل موجب صحت دیاں سہولتاں ݙیوݨ حکومت دی ذمہ واری اے، بانی پی ٹی آئی کوں وی اے سہولتاں ݙتیاں ویندیاں ریہاں تے اڳوں وی ݙتیاں ویسن تاں جو نجی ہسپتال دے حوالے نال نظرثانی دی درخواست دائر ہووݨی چاہیدی اے تاں جو اے واضح تھی سڳے جو آیا اے حق سارے قیدیاں کوں حاصل اے یا کائناں۔ وزیرِمملکت داخلہ طلال چوہدری دے رلے میڈیا نال ڳالھ کریندے وفاقی وزیرِاطلاعات آکھیا جو بانی پی ٹی آئی دے حوالے نال گزریل ݙینھ سپریم کورٹ دا فیصلہ آیا، مسلم لیگ (ن) بھاویں اقتدار وچ ہووے یا اپوزیشن وچ، ایں دی ہمیشہ اے پالیسی رہی اے جو صحت دے معاملے تے سیاست نی ہووݨی چاہیدی۔انہاں آکھیا جو جݙاں مسلم لیگ (ن) اپوزیشن وچ ہئی تاں تحریک انصاف برسراقتدار ہئی تے ایں ویلھے بانی پی ٹی آئی وزیراعظم ہن جیڑھے سٹیج تے کھڑے تھی تے اپوزیشن کوں طعنے ݙیندے ہن جو اے جݙاں جیل ویندن تاں بیمار تھی ویندن، اے جیل دے اندر گھر دے کھاݨے منگدن، ہک طوفانِ بدتمیزی برپا کیتا ڳیا تے آپݨی جماعت دے لوکاں کوں آکھیا ڳیا جو بیماری دے تے بھرپور سیاست کیتی ونڄے۔ انہاں آکھیا جو مسلم لیگ (ن) بانی پی ٹی آئی دے علاج معالجے تے صحت دے حوالے نال کݙاہیں ایہوجیہی کوئی ڳالھ نی کیتی جیں توں اے تاثر ملے جو حکومت صحت دے معاملے تے سیاست کریندی پئی اے۔ وفاقی وزیرآکھیا جو ہر قیدی کوں آئین و قانون تے جیل مینوئل موجب صحت دی سہولتاں ݙیوݨ دا حق حاصل اے، بانی پی ٹی آئی کوں وی اے سہولتاں ݙتیاں ویندیاں ریہاں تے اڳوں وی ݙتیاں ویسن، حکومت دی ذمہ واری اے جو او جیل وچ قیدیاں کوں جیل مینوئل دے مطابق طبی سہولتاں ݙیوے، اے ہک حق اے جو ہر قیدی کوں ملدے مگر کیا کہیں مخصوص نجی ہسپتال وچ علاج دی سہولت وی ہر قیدی کوں حاصل تھی سڳدی اے؟ وزیرِ قانون ایں حوالے نال واضح کیتے جو ایں معاملے تے نظرثانی دی درخواست دائر کیتی ویسی تاں جو ایں دی وضاحت تھی سڳے۔عطاء اللہ تارڑ آکھیا جو ساݙی قیادت یا اساں کݙاہیں بانی پی ٹی آئی دی صحت دے حوالے نال کوئی ایہوجہی ڳالھ نی کیتی جیں توں صحت دے معاملے تے سیاست دا تاثر ملے، صحت دا معاملہ کہیں دے نال وی تھی سڳدے تاں جو اللہ وݙے ٻول توں بچاوے۔ میکوں او ویلھا یاد آندے جݙاں بانی پی ٹی آئی واشنگٹن وچ کھڑے تھی تے منہ تے ہتھ پھیریندے آکھیا ہئی جو میں ونڄ تے انہاں دے گھر دا کھاݨا تے دوائیاں بند کرݙیساں۔ مختلف جلسیں وچ وی انہاں اے آکھیا جو جݙاں اے جیل ویندن تاں بیمار تھی ویندن، اللہ تعالیٰ توں ݙرݨا چاہیدے تے وݙے ٻول توں بچݨا چاہیدے۔ انہاں آکھیا جو نجی ہسپتال دے حوالے نال نظرثانی دی درخواست دائر ہووݨی چاہیدی اے تاں جو علاج معالجے دی سہولتاں ݙیوݨ دے حوالے نال کوئی ابہام کائنی۔ حکومت دا ایگزیکٹو فنکشن اے جو قیدی کوں جیل مینوئل موجب صحت دیاں سہولتاں ݙیوݨیاں ہن، اے سہولتاں ملدیاں ریہن تے اڳوں وی ملدیاں رہسن ، ایں وچ کوئی ابہام کائنی، اساں اے ذمہ واری پہلے وی نبھیندے آیوں اڳوں وی نبھیسوں۔عظمیٰ خان دی بانی پی ٹی آئی نال ملاقات دے حوالے نال انہاں آکھیا جو حکومت مسلسل اے اکھیندی رہی اے جو ایں معاملے تے سیاست تے سیاسی بیان بازی توں گریز کیتا ونڄے، عدالت وی قدغن لاتی جو سیاست نہ کرو، صحت دا معاملہ سیاست توں انڄ رہݨا چاہیدے تے حکومت آپݨی ذمہ واری نبھیندی رہسی۔ انہاں آکھیا جو وزیرِ قانون کل وی نجی ہسپتال دے حوالے نال ڳالھ کیتی اے، حکومت سمجھدی اے جو نظرثانی دی درخواست دائر ہووݨی چاہیدی اے، جے ایں طرح دی کوئی نظیر قائم تھیندی اے تاں ایں حوالے نال واضح ہووݨا چاہیدے جو اے حق سارے قیدیاں کوں حاصل ہوسی یا کائناں۔