نوجواناں کوں معیاری تعلیم، جدید مہارتاں تے روزگار دے موقع ݙیوݨ ویلھے دی اہم لوڑھ اے، قیصر احمد شیخ

اسلام آباد۔19اگست (اے پی پی) وفاقی وزیر سرمایہ کاری قیصر احمد شیخ آکھیے جو تعلیم ترقی دی بنیاد تے لوکاں کوں غربت توں کڈھݨ دا ساریں توں موثر ذریعہ اے، نوجواناں کوں معیاری تعلیم، جدید مہارتاں تے روزگار دے موقع ݙیوݨ ویلھے دی اہم لوڑھ اے، پاکستان کوں پرکشش سرمایہ کاری منزل بݨاوݨ کیتے امن، استحکام تے دوستانہ عالمی تعلقات ناگزیر ہن۔ اے ڳالھ انہاں بین الاقوامی تعلیمی سربراہی اجلاس تے نمائش وچ بطور مہمانِ خصوصی خطاب کریندے آکھی جیں وچ عاطف اکرام شیخ، پروفیسر ڈاکٹر ایم اقبال چودھری تے زہرا زمرت سلجوق سودھے اہم شخصیات شرکت کیتی۔وفاقی وزیرآکھیا جو دنیا تکھے بدلدی پئی اے تے مصنوعی ذہانت، ڈیجیٹلائزیشن تے جدید ٹیکنالوجی عالمی معیشتاں دی سمت متعین کریندیاں پئن، ایہوجیھے ماحول وچ پاکستان دے تعلیمی نظام کوں جدید تقاضیں نال ہم آہنگ کرݨ تے طلبہ کوں عملی، تکنیکی تے ڈیجیٹل مہارتاں نال آراستہ کرݨ ناگزیر اے۔ انہاں آکھیا جو پاکستان وچ ہر ٻال تئیں معیاری تعلیم دی رسائی یقینی بݨاوݨ کیتے مزید وسائل تے توانائیاں صرف کرݨیاں ہوسن، تعلیم کوں محض ڈگری دے حصول تئیں محدود رکھݨ دے بجائے اینکوں روزگار، اختراع، کاروبار تے معاشی ترقی نال جوڑݨا ہوسی تاں جو نوجوان ملکی معیشت وچ موثر کردار ادا کرسڳن۔قیصراحمد شیخ آکھیا جو او آئی سی ملکاں وچ نوجواناں دی تعداد آندے سالاں وچ تقریباً 42 کروڑ 70 لکھ تئیں پڄݨ دا امکان اے، اے نوجوان مسلم دنیا کیتے ٻہوں وݙا اثاثہ ہن، جے انہاں کوں معیاری تعلیم، جدید ہنر تے روزگار دے مناسب موقع ݙتے ونڄن تاں او معاشی ترقی، جدت تے خوشحالی دا ذریعہ بݨ سڳدن۔ قیصر احمد شیخ آکھیا جو حکومت پاکستان کوں ہک پرکشش سرمایہ کاری منزل بݨاوݨ کیتے مسلسل اقدامات کریندی پئی اے، سرمایہ کاری دے ودھارے کیتے پالیسیاں وچ بہتری، کاروباری ماحول کوں سازگار بݨاوݨا تے سرمایہ کاراں کوں سہولتاں ݙیوݨ حکومت دی ترجیحات وچ شامل اے۔