وفاقی وزیرِ ہاؤسنگ و ورکس میاں ریاض حسین پیرزادہ دا گرین انکلیو ون تے لائف سٹائل ریزیڈنسی منصوبیں وچ تاخیر تے اظہارِ تشویش

اسلام آباد۔19اگست (اے پی پی) وفاقی وزیر ہاؤسنگ و ورکس میاں ریاض حسین پیرزادہ گرین انکلیو ون تے لائف سٹائل ریزیڈنسی منصوبیں دی تکمیل وچ غیر معمولی تاخیر تے شدید تشویش کریندے وفاقی سرکاری ملازمین ہاؤسنگ اتھارٹی (ایف جی ای ایچ اے) کوں مسئلیں دے حل تے منصوبیں دی تکمیل کیتے فوری تے موثر اقدامات دی ہدایت کیتی اے۔ اے ہدایات انہاں وفاقی سرکاری ملازمین ہاؤسنگ اتھارٹی دے 50ویں ایگزیکٹو بورڈ اجلاس دی صدارت کریندے ݙتی۔ اجلاس دے آغاز تے وفاقی وزیر منصوباں وچ غیر معمولی تاخیر تے ایف جی ای ایچ اے حکام توں سخت سوالات کیتے تے پیشرفت نہ تھیوݨ دیاں تفصیلی وجوہات منڳیاں۔وفاقی وزیر آکھیا جو انہاں کوں پارلیمانی تے سینیٹ کمیٹیاں سودھے مختلف نگرانی دے فورمز تے ان منصوبیں دی پیشرفت دے حوالے نال کئی واری جواب ݙیوݨا پئے تاں جو تقریباً ترائے سال گزرݨ دے باوجود منصوبے مطلوبہ پیشرفت حاصل نی کرسڳئے۔ گرین انکلیو ون دے الاٹیز دے احتجاج تے وفاقی محتسب نال رجوع کرݨ متعلق میڈیا رپورٹس دا نوٹس گھندے وفاقی وزیر آکھیا جو الاٹیز دے تحفظات کوں نظرانداز نی کیتا ونڄ سڳدا۔ اتھارٹی منصوبیں دی تکمیل کیتے شفافیت، احتساب تے موثر کارکردگی دا مظاہرہ کرے تے سارےممکنہ اقدامات بروئے کار گھن آوے۔انہاں سارے زیرِالتوا انکوائری رپورٹس مقررہ مدت وچ پیش کرݨ تے انہاں دی سفارشات تے عملدرآمد دی ہدایت کریندے آکھیا جو انکوائریاں وچ غیر ضروری تاخیر صورتحال کوں مزید اوکھی تے غیر یقینی بݨیندی اے۔ میاں ریاض حسین پیرزادہ آکھیا جو انھاں منصوبیں وچ سینئر بیوروکریٹس دے نال نال تلویں گریڈ دے افسراں تے ملازمین وی آپݨی محنت دی کمائی توں گھر حاصل کرݨ دی امید وچ سرمایہ کاری کررکھی اے، لیکن انہاں کوں لمبے عرصے توں منصوبیں دی تکمیل دا انتظار کرݨا پوندا پئے۔ وفاقی وزیر ایف جی ای ایچ اے بورڈ کوں انکوائری رپورٹس دیاں سفارشات تے نتائج دی روشنی وچ مناسب کارروائی کرݨ دی ہدایت کریندے آکھیا جو ساری کارروائی منصفانہ، شفاف، جائز تے وقتی ہووݨی چاہیدی اے۔ اجلاس وچ ایف جی ای ایچ اے دے ایگزیکٹو بورڈ مالی سال 2026-27 کیتے اتھارٹی دا سالانہ بجٹ وی زیرِغور گھن آندے منظورکرڳھدا۔