صومالیہ وچ بحری قزاق پاکستانی مغویاں دے بدلے 30 لکھ ڈالر تاوان دا مطالبہ کریندے پئن، متعلقہ وزارتاں تے پاکستانی مشنز انہاں کوں چھڑاوݨ سانڳے کوششاں کریندے پئن، وفاقی وزیرِ پارلیمانی امورڈاکٹرطارق فضل چوہدری

اسلام آباد۔19اگست (اے پی پی) وفاقی وزیرِ پارلیمانی امور ڈاکٹر طارق فضل چوہدری آکھیے جو صومالیہ وچ بحری قزاق پاکستانی مغویاں دے بدلے 30 لکھ ڈالر تاوان دا مطالبہ کریندے پئن، متعلقہ وزارتاں تے پاکستانی مشنز انہاں دی رہائی کیتے کوششاں کریندے پئن، تاوان دی رقم دی ادائیگی دے بعد نواں رستہ کھل ویسی، ایں رستے توں تیل بردار جہازاں دی وݙی تعداد دی آونڄ اے۔ صومالیہ وچ 10 پاکستانیاں دی حراست، انہاں دی وطن واپسی وچ تاخیر تے ٻاہرلے ملک پاکستانیاں کوں اوکھ تے توجہ کراؤ نوٹس دے جواب اچ وفاقی وزیرِ پارلیمانی امور ڈاکٹر طارق فضل چوہدری ایوان کوں ݙسیا جو جبوتی دے ذریعے صومالیہ نال رابطہ کرݨ دی کوشش کریندے پیوں، جتھاں انہاں کوں رکھیا ڳئے اتھاں تے صومالیہ دی حکومت دا کنٹرول کائنی، ساݙے لوک بحفاظت ہن، انہاں کوں یرغمال بݨاوݨ آلیں وݙی رقم دا مطالبہ کیتے، لندن وچ ساݙا سفارتخانہ وی فعال اے، پیرو دا جھنڈا لڳیا ہویا ہئی اے چھوٹا جہاز اے، کہیں ملک ایں دی ملکیت نی ڳھدی، وقتی پیشرفت متوقع اے۔عبدالقادر پٹیل دے سوال دے جواب وچ انہاں آکھیا جو ایوان وچ اعداد و شمار دے نال ڳالھ تھیندی اے، ہوا وچ ڳالھ نی تھیندی۔ انہاں ݙسیا جو صومالیہ دا ایں علاقے تے کنٹرول موثر کائنی ، بحری قزاقاں دے نال مذاکرات دے ترائے دور تھی چکئن، او 30 لکھ ڈالر منگدے پئن، ایں رستے وچ تسلسل دے نال آئل ٹینکرز دی آونڄ اے جے ایں تے ہک واری تاوان ݙے ݙتا ڳیا تاں ول اے معاملہ چل پوسی۔ انہاں ݙسیا جو وزارتِ خارجہ ایں معاملے تے چوکس اے۔میر شبیر علی بجارانی دے سوال دے جواب وچ وفاقی وزیر ݙسیا جو وزارتِ انسانی حقوق وی بین الوزارتی اجلاس منعقد کیتا، معاملے دی سنگینی دا ادراک اے، متاثرین دی فیملی دے کرب دا وی ادراک اے، کوشش کریسوں وقتی حل نکلے۔ شاہدہ رحمانی ݙسیا جو انہاں کوں 5 مہینے تھی ڳئن، انہاں دا خاندان اذیت وچ اے۔ انہاں دے سوال دے جواب وچ طارق فضل چوہدری ݙسیا جو وزارت کہیں جاہ تے غیر سنجیدہ کائنی، سارے آپشن استعمال کیتے ڳئن، تاوان دی رقم ادا کر ݙتی ڳئی تاں ول کوئی جہاز اتھوں پرامن نی گزرسڳسی۔ مرزا اختیار بیگ آکھیا جو 6 سیلرز دا تعلق کراچی توں اے، 13 اگست کوں ہک اجلاس وزیرِ خارجہ دی زیرِ صدارت منعقد تھیا ایں دی تفصیل ݙتی ونڄے۔ ایں دے جواب وچ انہاں ݙسیا جو اتھاں دے زعماء نال وی ڳالھ مہاڑ تھیندی پئی اے، جہاز دے مالک دا پتہ دٻئی دا ہئی جو درست کائنی، متعلقہ وزارتاں تے مشن ایں تے کم کریندے پئن، عبدالقادر پٹیل جے صومالیہ ونڄݨ چاہندن تاں حکومت انہاں دے سفری خرچے برداشت کریسی۔ڈاکٹر فاروق ستار آکھیا جو مغویاں نال کوئی رابطہ موجود اے؟ جہاز دا مالک یمنی اے، چار جہاز ایں دے بعد مزید اغوا کیتے ڳئن، کیا ان چار جہازاں دی تفصیل گھن تے متعلقہ محکمے عالمی قانون نافذ کرݨ آلے اداریں نال رابطے کرسڳدن، اساں ماضی وچ یرغمالیاں کوں رہا کرایا ہئی تاجراں توں پیسے جمع کیتے ہن، اساکوں اے ٹاسک ݙیو، اساں اے رقم ݙیسوں، اساں 22 ارکان آپݨے ترقیاتی بجٹ وچوں ہک ہک کروڑ ݙے ݙیسوں، بے حسی دا مظاہرہ نہ کیتا ونڄے، سندھ حکومت وی آپݨا حصہ پاوے، ترقیاتی بجٹ ایں مقصد کیتے نی ݙے سڳدے۔ طارق فضل چوہدری آکھیا جو ایم این ایز کوں کوئی ترقیاتی فنڈ مختص نی تھیندا ، اے واقعات ہݨ اتھاں معمول بݨ چکئن، متعلقہ لوک مشاورت نال ایں مسئلے دا حل کڈھݨ کیتے کوشاں ہن۔