چیئرمین سینیٹ سید یوسف رضا گیلانی نال پاکستان وچ پرتگال دے سفیر دی ملاقات، پاکستان-پرتگال تعلقات مزید تکڑےبݨاوݨ تے زور، پرتگالی سرمایہ کاراں کوں پاکستان وچ سرمایہ کاری دی دعوت

اسلام آباد۔19اگست (اے پی پی) چیئرمین سینیٹ سید یوسف رضا گیلانی نال پاکستان وچ پرتگال دے سفیر پاؤلو میگوئل گیدیز ڈومنگیز منسٹرز انکلیو وچ انہاں دی رہائش گاہ تے ملاقات کیتی۔ ملاقات وچ ݙوطرفہ تعلقات، تجارت تے سرمایہ کاری، پارلیمانی تعاون تے عوامی رابطے سودھے سانجھی دلچسپی دے مختلف امور تے ڳالھ مہاڑ کیتی ڳئی۔ سینیٹ سیکرٹریٹ موجب چیئرمین سینیٹ سید یوسف رضا گیلانی آکھیا جو پاکستان پرتگال دے نال پراݨے تے دوستانہ تعلقات کوں اہمیت ݙیندے تے تجارت، سرمایہ کاری، زراعت، انفارمیشن ٹیکنالوجی، تعلیم، ثقافت تے بلیو اکانومی سودھے مختلف شعبیں وچ ݙوطرفہ تعاون کوں مزید ودھاوݨ چاہندے۔ انہاں ݙوہیں ملکاں وچال ودھدے تجارتی حجم دا ذکر کریندے آکھیا اقتصادی تعلقات کوں مزید وسعت ݙیوݨ دے وسیع امکانات موجود ہن جنہاں توں استفادہ کرݨ کیتے نویں موقع تلاش کرݨا ضروری اے۔ انہاں پرتگالی کمپنیاں تے سرمایہ کاراں کوں پاکستان وچ ابھردے اقتصادی تے کاروباری موقع توں فیدہ چاوݨ تے سانجھے مفاد تے مبنی شراکت داری قائم کرݨ دی دعوت ݙتی۔چیئرمین سینیٹ انٹر پارلیمانی سپیکرز کانفرنس (آئی ایس سی) دے کردار کوں وی اجاگر کریندے آکھیا جو اے کانفرنس خطے وچ امن، سلامتی تے ترقی دے ودھارے کیتے ہک اہم پلیٹ فارم اے۔ سید یوسف رضا گیلانی پرتگال وچ رہݨ آلے پاکستانی کمیونٹی دیاں خدمات دی تعریف کریندے آکھیے تقریباً 50 ہزار پاکستانی پرتگال وچ رہائش پذیر تے مختلف شعبیں وچ کم کریندے پئن۔ انہاں آکھیا جو پاکستانی کمیونٹی ݙوہیں ملکاں وچال پل دا کردار ادا کریندی پئی اےچیئرمین سینیٹ لیبر موبیلٹی پارٹنرشپ معاہدے کوں وقتی حتمی شکل ݙتے ونڄݨ دی امید ظاہر کریندے آکھیا جو اے معاہدہ ایں اہم شعبے وچ ݙوطرفہ تعاون کیتے ہک مؤثر فریم ورک ݙیسی۔ انہاں پاکستانی تے پرتگالی جامعات وچال طلبہ تے فیکلٹی دے تبادلیں تے مشترکہ تحقیقی پروگراماں دے ذریعے تعلیمی تعاون ودھاوݨ تے وی زورݙتا۔ پرتگال دے سفیر پاؤلو میگوئل گیدیز ڈومنگیز چیئرمین سینیٹ دی طرفوں گرمجوشانہ خیرمقدم تے شکریہ ادا کریندے پاکستان دے نال ݙوطرفہ تعلقات بالخصوص تجارت، سرمایہ کاری تے اقتصادی تعاون کوں مزید تکڑا بݨاوݨ وچ پرتگال دی دلچسپی دا اظہار کیتا۔ ملاقات دے اختتام تے ݙوہیں پاسوں پاکستان تے پرتگال وچال نیڑے رابطے، سانجھا تعاون تے ݙوطرفہ تعلقات کوں مزید مستحکم بݨاوݨ دے عزم دا اعادہ کیتا ڳیا۔