پاکستان تے ایتھوپیا دا زراعت دے شعبے وچ ݙوپاسے تعاون ودھاوݨ تے اتفاق

اسلام آباد۔19اگست (اے پی پی) پاکستان تے ایتھوپیا سانجھی تجارت تے سرمایہ کاری دے ودھارے، ٹیکنالوجی دی منتقلی، غذائی تحفظ تے لائیو سٹاک دے شعبیں وچ پیشرفت کیتے زراعت دے شعبے وچ ݙوپاسے تعاون مزید تکڑا بݨاوݨ تے اتفاق کیتے، ایں سلسلے وچ ایتھوپیا دے سفیر ڈاکٹرعمرحسین اوبا وفاقی وزیرِغذائی تحفظ رانا تنویر حسین نال اسلام آباد وچ ملاقات کیتی۔ ملاقات وچ زرعی تعاون دے ودھارے دے مختلف پہلواں دا جائزہ ڳھدا ڳیا جنہاں وچ ݙوہیں ملکاں دے زرعی اداریں وچال علم تے تجربے دے تبادلے کوں ادارہ جاتی شکل ݙیوݨ کیتے زرعی معاہدے دی تجویز وی شامل ہئی۔ پریس ریلیز موجب سفیر ڈاکٹر عمر حسین اوبا ایتھوپیا دی معیشت دے زرعی خدوخال تے ایں شعبے کوں حکومتِ ایتھوپیا دی طرفوں ݙتی ونڄݨ آلی ترجیح دا ذکر کریندے ݙوہیں ملکاں وچال زرعی تعاون دے وسیع امکانات تے روشنی پاتی۔ انہاں ایتھوپیا دے گرین لیگیسی انیشی ایٹو کوں پائیدار ترقی، زرعی نمو، غذائی تحفظ تے گرین اکانومی دے ودھارے دا ہک جامع پروگرام قرار ݙتا۔ سفیر آکھیا جو ایتھوپیا ایں منصوبے دا تجربہ پاکستان دے نال ونڈ سڳدے۔ انہاں پاکستانی زرعی کاروباری شخصیات کوں ایتھوپیا دے زرعی شعبے وچ سرمایہ کاری دے موقع تلاش کرݨ دی دعوت ݙتی۔ انہاں وفاقی وزیر کوں 2027 وچ ادیس ابابا وچ تھیوݨ آلی کوپ-32 دی میزبانی دے حوالے نال ایتھوپیا دی تیاریاں دا وی ݙسایا۔وفاقی وزیر زرعی تحقیق، جدید کاشتکاری دی ٹیکنالوجی، زرعی مشینری، آبپاشی، لائیو سٹاک دی ترقی تے ایگرو پروسیسنگ دے شعبیں وچ پاکستان دی مہارت دا ذکر کیتا تے آپݨے تجربے تے تکنیکی معاونت ایتھوپیا دے نال ونڈݨ کیتے آمادگی ظاہر کیتی۔ انہاں آکھیا جو ݙوہیں ملک فصلاں دی پیداواری صلاحیت، بجاں دی تیاری، موسمیاتی اثرات توں محفوظ زراعت تے مشینی کاشتکاری دے شعبیں وچ تعاون کوں نمایاں طور تے وسعت ݙے سڳدن۔