وزیراعظم دی ہدایت تے آئل ریفائنریز نال کامیاب مذاکرات پاروں ڈیزل دا ملھ ڳھٹاوݨ وݙا ریلیف اے، پوری معیشت تے چنڳے اثرات پوسن: عطاء اللہ تارڑ

اسلام آباد۔19اگست(اے پی پی)وفاقی وزیرِ اطلاعات و نشریات عطاء اللہ تارڑ آکھیے جو وزیراعظم محمد شہباز شریف دی ہدایت تے آئل ریفائنریز نال مذاکرات کامیاب تھئے جیندے نال ڈیزل دی قیمت اچ 32 روپے توں ودھ کمی متوقع اے، اے عوام کیتے وݙا ریلیف اتے ملکی معیشت تے مثبت اثرات کیتے اہم اقدام اے۔ وفاقی وزیرِ پٹرولیم علی پرویز ملک نال ایندھن دی قیمتاں بارے الیندے وفاقی وزیرِ اطلاعات اکھیا جو وزیراعظم دی زیرِ صدارت اج اہم اجلاس تھئے جیندے اچ وفاقی وزیرِ پٹرولیم، سیکرٹری پٹرولیم اتے متعلقہ حکام شرکت کیتی۔ اجلاس اچ وزیراعظم ہدایت کیتی جو آئل ریفائنریز نال باقاعدہ مذاکرات کیتے ونڄن اتے ہر ممکن ریلیف عوام تئیں منتقل کیتا ونڄے۔ انہاں آکھیا جو ڈیزل دا وݙا حصہ ملک اچ مقامی طور تے ریفائن اتے تیار کیتا ویندے، ایں سانڳے اوگرا ولوں ڈیزل دی قیمت اچ 32 روپے توں ودھ کمی متوقع اے۔ وزیراعظم خصوصی ہدایات جاری کیتن جو آئل ریفائنریز نال مذاکرات کیتے ونڄن جݙاں جو وفاقی وزیرِ پٹرولیم مذاکرات کوں کامیاب ٻݨاوݨ کیتے بھرپور محنت کیتی۔ عطاء اللہ تارڑ آکھیا جو حکومت کوں جنگی حالات پاروں پیدا تھیوݨ والیاں مشکلاں دا احساس اے، خطے اچ جنگ پاروں پوری دنیا اچ تیل دی قیمتاں اچ اضافہ تھیا ٻھل حکومت عوام کوں ہر ممکن سوکھ ݙتے، حکومت 130 ارب روپے دی لاگت نال ٹارگٹڈ سبسڈی وی ݙتی اتے مشکل ترین حالات اچ پٹرول دیاں قیمتاں اچ اضافے کوں روکݨ دی کوشش کیتی جیڑھی حکومت دی اولین ترجیح رہی اے۔ انہاں اکھیا جو ڈیزل دی قیمت اچ کمی ہک وݙا قدم اے اتے وزیراعظم ولوں عوام کیتے تحفہ اتے وݙا ریلیف اے۔ کاشتکار، گڈز ٹرانسپورٹرز اتے پبلک ٹرانسپورٹ ڈیزل استعمال کریندن، ایں سانڳے ڈیزل دی قیمت اچ کمی نال انہاں شعبیاں کوں براہِ راست فائدہ پڄسی۔ وفاقی وزیرِ اطلاعات اکھیا جو مقامی طور تے تیار تھیوݨ والے ڈیزل دے حوالے نال آئل ریفائنریز نال مذاکرات کامیاب تھئن۔ ڈیزل دی قیمت اچ 32 روپے توں ودھ کمی نال عوام اتے عائد مالی بوجھ گھٹ تھیسی اتے ایںدے معیشت تے مثبت اثرات مرتب ہوسن۔ انہاں اکھیا جو آوݨ والے ݙینھاں اچ عوام کوں مزید خوشخبریاں ملسن، اڄ دے مذاکرات دی کامیابی حکومت دی ہک وݙی کوشش اے اتے ڈیزل دی قیمت اچ کمی نال پوری معیشت تے مثبت اثرات پوسن۔