وفاقی وزیر خزانہ سینیٹر محمد اورنگزیب دی زیر صدارت اقتصادی رابطہ کمیٹی دا اجلاس

اسلام آباد۔19اگست(اے پی پی)وفاقی وزیر خزانہ و محصولات سینیٹر محمد اورنگزیب دی زیر صدارت اقتصادی رابطہ کمیٹی (ای سی سی) دا اجلاس وزارت خزانہ اچ تھیا۔ اجلاس اچ وزارت قومی غذائی تحفظ و تحقیق دی پیش کیتی ڳئی سمری تے غور کیتا ڳیا جیںدے اچ ٹریڈنگ کارپوریشن آف پاکستان (ٹی سی پی) کولو موجود 108,000 میٹرک ٹن چینی دی برآمد کیتے بین الاقوامی ٹینڈر منڳݨ دی اجازت منگی ڳئی ہئی۔ اے چینی پچھلے سال درآمد کیتی ڳئی 3 لکھ میٹرک ٹن چینی دے باقی رہ ونڄݨ آلے ذخیرے دا حصہ اے۔ چینی دی درآمد پچھلے سال کابینہ دی منظوری نال ٻݨائی ڳئی سٹیئرنگ کمیٹی برائے شوگر دی سفارش تے کیتی ڳئی ہئی۔ ای سی سی بین الاقوامی ٹینڈر دے عمل کوں پبلک پروکیورمنٹ ریگولیٹری اتھارٹی (پیپرا) رولز 2004ء دے مطابق سختی نال مکمل کرݨ تے زور ݙتے۔ اجلاس اچ وفاقی وزیر قومی غذائی تحفظ و تحقیق رانا تنویر حسین، وفاقی وزیر سرمایہ کاری قیصر احمد شیخ، وزیراعظم دے مشیر برائے صنعت و پیداوار ہارون اختر خان، وفاقی سیکرٹریز اتے متعلقہ وزارتاں اتے ڈویژنز دے سینئر حکام شرکت کیتی۔