صدرِ مملکت آصف علی زرداری نال فوسپاہ دی محتسب فوزیہ وقار دی ملاقات

اسلام آباد۔19اگست (اے پی پی)صدرِ مملکت آصف علی زرداری کم دی ڄاہ تے ہراسانی دیاں شکایتاں دے فوری اتے موثر ازالے کیتے داخلی طریقہِ کار اتے نگرانی نظام کوں ودھ تکڑا ٻݨاوݨ تے زور ݙتے۔ او ایوان صدر اسلام آباد اچ وفاقی محتسب برائے تحفظِ خواتین کوں کم دی ڄاہ تے ہراسانی توں تحفظ (فوسپاہ) دی محتسب فوزیہ وقار نال  ملݨ ویلھے آکھی۔ فوزیہ وقار صدر کوں ادارے دی سالانہ رپورٹ 2025ء پیش کیتی۔ صدرِ مملکت (فوسپاہ) دے کردار کوں سراہندے ادارے دیاں خدمات بارے عوامی آگاہی مہماں ودھاوݨ تے زور ݙتے۔ صدرِ مملکت کوں ݙسیا ڳیا جو 2024-25 اچ فوسپاہ کوں ہراسانی دیاں 1,119 شکایتاں ملین جیندے اچوں 1,047 شکایتاں دے فیصلے کیتے ڳئن۔ جائیداد توں محرومی بارے 352 شکایتاں ملین جنہاں اچوں 238 شکایتاں نمٹا ݙتیاں ڳئن۔ صدرِ مملکت کوں پیش کیتی ڳئی رپورٹ موجب پچھلے سال دے مقابلے اچ شکایتاں دے اندراج اچ 375 فیصد ودھارا تھئے۔ صدرِ مملکت ہدایت کیتی جو شکایتاں دا منصفانہ اتے میرٹ تے جائزہ گھدا ونڄے اتے قانونی تقاضیاں دے مطابق مناسب طریقہِ کار اختیار کیتا ونڄے تاں جو ہراسانی دے حقیقی واقعات دا فوری ازالہ تھیوے جݙاں جو الزاماں دا قانون دے مطابق احتیاط نال جائزہ ڳھدا ونڄے۔