توانائی دی طلب تے رسد اچ توازن، مقامی وسائل دا بہتر استعمال تے سرمایہ کاری کیتے سازگار ماحول حکومتی ترجیحات اچ شامل اے: علی پرویز ملک

اسلام آباد۔20اگست (اے پی پی) وفاقی وزیر برائے پٹرولیم علی پرویز ملک آکھیا جو پاکستان دی طویل مدتی توانائی سکیورٹی یقینی بݨاوݨ کیتے توانائی دے شعبے دے تمام حصیاں بالخصوص اپاسٹریم، مڈ سٹریم تے ڈاؤن سٹریم شعبیاں وچال موثر رابطہ تے ہم آہنگی ضروری اے، توانائی دا محفوظ تے پائیدار نظام ملکی معاشی ترقی دی بنیاد اے ایں کیتے توانائی دی طلب اتے رسد اچ توازن، مقامی وسائل دے بہتر استعمال تے سرمایہ کاری کیتے سازگار ماحول دی فراہمی حکومت دی اہم ترجیحات اچ شامل اے۔ اے ڳالھیں انہاں خمیس کوں پاکستان انرجی کانفرنس 2026ء نال خطاب کریندیں ہوئیں کیتا۔ علی پرویز ملک آکھیا جو وزیراعظم دی سربراہی اچ توانائی نال متعلق قائم کمیٹی دا ماہانہ بنیاد تے اجلاس تھیندے جئیں اچ ایں شعبے نال متعلق اہم معاملیاں تے پالیسی اقدامات دا جائزہ گھدا ویندے۔ وفاقی وزیر آکھیا جو توانائی دے شعبے اچ سرمایہ کاراں کیتے سازگار ماحول پیدا کیتا ویندا پئے کیونجو محفوظ تے قابلِ اعتماد توانائی دا نظام ملکی معاشی ترقی دی بنیاد اے، ایں شعبے اچ پائیداری تے معاشی ترقی کوں نال نال اڳوں ودھاوݨا پوسی۔ علی پرویز ملک آکھیا جو توانائی دی طلب تے رسد اچ توازن برقرار رکھݨ کیتے مربوط تے طویل مدتی منصوبہ بندی انتہائی اہم اے، حکومت توانائی اچ خودکفالت دی پالیسی تے عمل کریندی پئی اے اتے انرجی پالیسی کوں ٻیا موثر بݨاوݨ کیتے اقدامات کیتے ویندے پئن۔علی پرویز ملک ݙسیا جو کابینہ کمیٹی برائے توانائی دے بین الوزارتی پلیٹ فارم کوں ولا فعال کر ݙتا ڳئے جئیں دی سربراہی وزیراعظم محمد شہباز شریف خود کریندے پئن۔ گیس سیکٹر دے حوالے نال انہاں ورلڈ بینک دے تعاون کوں سراہندیں ہوئیں آکھیا جو عالمی بینک گیس دے شعبے کوں ان بنڈل کرݨ تے اصلاحات دے عمل اچ حکومت دی معاونت کریندا پئے، ایں عمل دے تحت انفراسٹرکچر دے کاروبار کوں انرجی دے کاروبار توں وکھرا کرݨ، شعبے وچ مسابقت ودھاوݨ، اپ سٹریم سیکٹر کیتے زیادہ لیکویڈٹی دی حوصلہ افزائی تے نظام وچ کارکردگی تے آپٹیمائزیشن لاوݨ تے کام کیتا ویندا پئے۔