وزیراعظم دی اپوزیشن کوں ہک واری ولا مذاکرات دی پیشکش، ڈیزل دی قیمت وچ 32 روپے فی لیٹر ڳھٹکی خوش آئند، آندے ݙینھاں اچ صورتحال بہتر تھیسی: شہباز شریف

اسلام آباد۔20اگست (اے پی پی) وزیراعظم محمد شہباز شریف اپوزیشن کوں ہک واری ولا مذاکرات دی پیشکش کریندیں ہوئیں آکھیا جو ہݨ اپوزیشن تے منحصر اے جو او کتنی تکھے تعمیری ڳالھ مہاڑ کیتے تیار تھیندی اے، پاکستان دی معاشی ترقی تے جمہوریت کوں تقویت ݙیوݨ کیتے معاملیاں کوں بہہ تے طے کرݨا پوسی۔ خمیس کوں اتھاں وفاقی کابینہ دے اجلاس نال خطاب کریندیں ہوئیں وزیراعظم آکھیا جو وزارتِ پٹرولیم دی کوششاں نال ڈیزل دی قیمت وچ 32 روپے فی لیٹر ڳھٹکی کیتی ڳئی اے جو خوش آئند اے، حکومت عام آدمی کوں جتنا تھی سڳسی بچت کر تے ریلیف ݙیسی۔ انہاں آکھیا جو خلیج تے آبنائے ہرمز وچ جو صورتحال اے ایں وجہ نال نہ صرف پٹرولیم دی سپلائی وچ مشکلاں ہن بلکہ کئی ملکاں دی آپݨی ریفائنریز تے گیس دے پلانٹ بند پئن، پورا خطہ وݙی مشکل صورتحال توں گزردا پئے، پاکستان وی ایں دا شکار اے کیونجو اساݙا ملک توانائی دا وݙا خریدار اے۔ وزیراعظم آکھیا جو حکومت جنگ شروع تھیندے ای پی ایس ڈی پی تے کٹ لا تے 128 ارب روپے فراہم کیتن تانجو عوام کوں یکدم آسمان نال ڳالھیں کریندی پٹرولیم دی قیمتاں توں بچایا ونڄ سڳے، حکومت عام آدمی کوں بچاوݨ کیتے فوری اقدامات کیتے، صوبیاں وی ایں وچ آپݨا کردار ادا کیتا۔ انہاں ایں امید دا اظہار کیتا جو آئندہ ݙینھاں اچ صورتحال بہتر تھیسی۔ وزیراعظم اکھیا جو حکومت کل ریٹیلرز کیتے ایپ دا آغاز کیتے ایں توں امید اے جو تاجر برادری، جنہاں دی مشاورت نال اقدامات کیتے ڳئن، مطمئن ہوسی۔ ایف بی آر کوں واضح ہدایات ݙتن جو تاجریں دی مشاورت نال منصوبہ بندی کیتی ونڄے اتے انہاں کوں اگر کہیں تنگ کرݨ دی کوشش کیتی تاں او سزا کیتے تیار راہوے۔ انہاں ایں سلسلے وچ وزیرِ خزانہ تے وزیرِ مملکت برائے خزانہ تے انہاں دی ٹیم دی کارکردگی کوں سراہندے ہوئیں آکھیا جو تاجریں کیتے پہلی واری حکومت ہک چنڳٰ سکیم گھن تے آئی اے۔وزیراعظم اکھیا جو آئی ٹی دی برآمدات اچ بتدریج اضافہ تھیندا پئے، جولائی 2026ء وچ ایں وچ 18 فیصد اضافہ تھیا، اے ٻہوں وݙی کامیابی اے جئیں کیتے میں وفاقی وزیرِ انفارمیشن ٹیکنالوجی تے انہاں دی ٹیم کوں مبارکباد ݙینداں۔ وزیراعظم اکھیا جو گوگل دا ہک وفد پاکستان آیا ہوئے جئیں نال ݙو ݙینھ پہلے ملاقات تھئی ہئی، گوگل دے پاکستان اچ دفتر دا افتتاح تھی ڳئے، حکومت ہر شعبے اچ ڈیجیٹلائزیشن کیتے اقدامات کریندی پئی اے، گورننس دا سارا نظام ڈیجیٹل ہووݨا چاہیدے۔ وزیراعظم اکھیا جو حکومت اپوزیشن نال بامقصد ڳالھ مہاڑ کیتے تیار اے، قومی اسمبلی اچ وی میں ایں دی پیشکش کیتی ہئی اتے کابینہ اچ وی تے اج ولا اے ڳالھ دہراوݨ چاہنداں جو اساں تیار ہیسے اتے ایں فور م توں اپوزیشن کوں پیشکش کرینداں جو او آون اتے بہہ تے ڳالھ کرن، معاملیاں کوں ڳالھ مہاڑ نال طے کرن تانجو پاکستان دی معاشی ترقی تے جمہوریت کوں تقویت ݙے سڳوں لیکن تاڑی ݙوہیں ہتھاں نال وجدی اے ہݨ اپوزیشن تے اے جو او کتنی تکھے تعمیری ڳالھ مہاڑ کیتے تیار تھیندن۔