ماہی گیری دے شعبے وچ 10 بلین ڈالر دی صلاحیت توں فیدہ چاوݨ کیتے پالیسی تے کم جاری اے وفاقی وزیرمحمد جنید انوار چوہدری

اسلام آباد۔20اگست (اے پی پی) وفاقی وزیربحری امورمحمد جنید انوار چوہدری آکھیے جو قومی فشریز اینڈ ایکوا کلچر پالیسی تے کم جاری اے، جیں دا مقصد جدید طریقہ کار، موثر پالیسیاں تے سرمایہ کاری وچ ودھارے دے ذریعے ماہی گیری دے شعبے دی استعداد توں فیدہ چا تے سالانہ 10 ارب ڈالر تئیں دی آمدݨ حاصل کرݨا اے۔ وفاقی وزیر وزارتِ بحری امور تے ایں دے ماتحت اداریں دی کارکردگی، پیش رفت تے کامیابیاں دا جائزہ گھنݨ کیتے منعقدہ اجلاس دی صدارت کیتی۔ وفاقی وزیر بحری شعبے وچ کاروبار کیتے سوکھ پیدا کرݨ تے زور ݙیندے ہوئیں آکھیے جو طریقہ کار کوں سادہ بݨایا ونڄے تے کاروباری برادری سودھے متعلقہ سٹیک ہولڈرز نال بامعنی مشاورت یقینی بݨائی ونڄے۔انہاں وزارت تے ایں دے ماتحت اداریں کوں ہدایت کیتی جو سمندری اقتصادی سرگرمیاں متعلق پالیسیاں تے اقدامات وچ متعلقہ شعبیں دی صلاح تے سفارشات کوں شامل کیتا ونڄے۔ محمد جنید انوار چوہدری گوادر پورٹ تے 100 ایکڑ رقبے تے آف ڈاک ٹرمینل دے قیام دا وی جائزہ ڳھدا۔ انہاں آکھیا جو اے منصوبہ وسطی ایشیائی ریاستاں نال تجارت کوں ودھارا ݙیوݨ تے علاقائی لاجسٹکس رابطیں کوں تکڑا بݨاوݨ وچ معاون ہوسی۔ ٹرمینل توں کارگو ہینڈلنگ تے لاجسٹکس سہولتاں بہتر تھیوݨ دے نال گوادر دی وسطی ایشیائی ملکاں نال تجارت کیتے گیٹ وے دی حیثیت مزید مستحکم تھیسی۔اجلاس کوں ݙسیا ڳیا جو سمندری حیاتیاتی تنوع تے ساحلی ماحولیاتی نظام دے تحفظ کیتے عالمی ماحولیاتی سہولت (جی ای ایف) دے تعاون نال 30 لکھ ڈالر دا منصوبہ وی جاری اے۔وفاقی وزیرمتعلقہ حکام کوں منصوبیں دی وقتی تکمیل تے سارے سٹیک ہولڈرز وچال رابطہ کاری مزید تکڑی بݨاوݨ دی ہدایت کیتی۔