چیف الیکشن کمشنر دی صدارت اچ اجلاس، پنجاب وچ بلدیاتی انتخابات کراوݨ دی تاریخ مقرر کرݨ تےغور

اسلام آباد۔20اگست (اے پی پی) الیکشن کمیشن پنجاب حکومت دی طرفوں بلدیاتی انتخابات دے انعقاد کیتے 15 دسمبر 2026ء توں 15 جنوری 2027ء دیاں تاریخاں کوں مناسب قرار ݙیندے ایں نال اتفاق کیتے جݙاں جو پنجاب حکومت کوں آکھیا ڳئے جے او مرحلہ وار انتخابات کراوݨ چاہندی اے تاں اوہ تکھے توں تکھے ایں حوالے نال مشاورت کیتے آپݨا منصوبہ کمیشن دے سامݨے پیش کرے۔ الیکشن کمیشن توں جاری پریس ریلیز موجب ترجمان الیکشن کمیشن آکھیا جو الیکشن کمیشن وچ چیف الیکشن کمشنر سکندر سلطان راجہ دی سربراہی وچ صوبہ پنجاب وچ بلدیاتی انتخابات دے انعقاد دی تاریخ مقرر کرݨ متعلق اہم اجلاس تھیا۔ اجلاس وچ معزز ممبران الیکشن کمیشن نثاراحمد دُرانی، شاہ محمد جتوئی، بابر حسن بھروانہ تے جسٹس (ر) اکرام اللہ شریک تھئے۔پنجاب گورنمنٹ دی طرفوں چاررکنی کابینہ کمیٹی ذیشان رفیق منسٹر لوکل گورنمنٹ دی سربراہی وچ شریک تھئی جیں وچ سردار شیر علی گورچانی وزیرمائنز اینڈ منرل، سید محمد عاشق حسین شاہ وزیرایگریکلچر، رانا سکندر حیات وزیرایجوکیشن شامل ہن۔ اجلاس وچ چیف سیکرٹری پنجاب تے سپیشل سیکرٹری لوکل گورنمنٹ وی شریک تھئے۔ ایں توں علاوہ سیکرٹری الیکشن کمیشن تے الیکشن کمیشن دے ٻئے سینئر افسراں وی اجلاس وچ شرکت کیتی۔چیف الیکشن کمشنر بلدیاتی حکومتاں دے قیام دی اہمیت تے روشنی پاتی تے آکھیا جو آئینِ پاکستان دے آرٹیکل 140-A دے تحت بلدیاتی انتخابات دا انعقاد ہک آئینی تقاضا اے تے الیکشنز ایکٹ دی دفعہ 219(4) دے تحت بلدیاتی حکومتاں دی میعاد ختم تھیوݨ دے 120 ݙینھاں دے اندر الیکشن کمیشن بلدیاتی انتخابات کراوݨ دا پابند اے۔ الیکشن کمیشن کوں بریف کیتا ڳئے جو پنجاب وچ حلقہ بندی دا عمل مکمل تھی چکیے۔ الیکشنز ایکٹ 2017ء دی دفعہ 219(3) تے پنجاب لوکل گورنمنٹ ایکٹ دی دفعہ 59 دے تحت بلدیاتی انتخابات دی تاریخ دے اعلان کیتے صوبائی حکومت نال مشاورت ضروری اے۔پنجاب مشاورت کمیٹی دے کنوینئر ذیشان رفیق منسٹر لوکل گورنمنٹ الیکشن کمیشن کوں بریف کیتا جو وزیراعلیٰ پنجاب صوبہ پنجاب وچ بلدیاتی انتخابات کراوݨ کیتے پرعزم ہن تے انہاں ایں کمیٹی کوں مشاورت دا مکمل اختیار ݙتے۔ انہاں مزید آکھیا جو صوبائی حکومت بلدیاتی انتخابات دا پراسس شروع کرݨا اے۔ تے وسائل دی مناسب فراہمی کیتے وی ویلھا درکاراے۔ ایں توں علاوہ بلدیاتی انتخابات دے انعقاد دے عمل وچ ٹیچنگ سٹاف دیاں خدمات زیادہ درکار ہوندن۔ بلدیاتی انتخابات 15 دسمبر 2026ء توں 15 جنوری 2027ء کوں کراوݨ زیادہ مناسب اے کیوں جو ایں دوران ٻالاں دے امتحانات وی تھی چکیے ہوسن تے صوبے وچ کوہیڑ دا مسئلہ وی نہ ہوسی۔چیف سیکرٹری الیکشن کمیشن کوں بریف کیتا جو صوبائی حکومت مذکورہ بالا تاریخاں دے دوران صوبے وچ مرحلہ وار انتخابات کراوݨ چاہندی اے تاں جو ایں انتخابات کیتے مناسب سکیورٹی ݙیوݨ تے بہتر انتظامات کیتے ونڄ سڳن۔ الیکشن کمیشن صوبائی حکومت دی 15 دسمبر 2026ء توں 15 جنوری 2027ء دے دوران بلدیاتی انتخابات کراوݨ دی تجویز نال اصولی طور تے اتفاق کیتا تے آکھیا جے صوبائی حکومت مرحلہ وار بلدیاتی انتخابات کراوݨ چاہندی اے تاں ایں سلسلے وچ تکھے توں تکھے آپݨا پلان الیکشن کمیشن دے سامݨے مشاورت کیتے پیش کرے۔ چیف الیکشن کمشنر پنجاب وچ بلدیاتی انتخابات دے انعقاد دے سلسلے وچ پنجاب کابینہ دی کمیٹی دیاں تجویزاں دی تعریف کیتی تے آکھیے جو ایں نال ہک آئینی ذمہ واری کوں مکمل کرݨ دا رستہ ہموار تھیسی۔