خلیجی ملکاں توں یکم مارچ 2026ء تئیں 21 ہزار 951 پاکستانی ڈی پورٹ تھئے، اسلام آباد وچ ’ایجوکیشن سٹی‘بݨایا ویندا پئے،ڈاکٹر طارق فضل چوہدری

اسلام آباد۔20اگست (اے پی پی) وفاقی وزیرپارلیمانی امور ڈاکٹر طارق فضل چوہدری قومی اسمبلی کوں ݙسائے یکم مارچ 2026ء تئیں خلیجی ملکاں توں مختلف وجوہات تے قانون دیاں خلاف ورزیاں تے مجموعی طور تے 21 ہزار 951 پاکستانیاں کوں ڈی پورٹ کیتا ڳئے جݙاں جو اسلام آباد وچ تعلیمی اداریں دے دٻاؤ کوں گھٹ کرݨ کیتے سی ڈی اے دے سیکٹر ایریا توں ٻاہروں ھک جدید “ایجوکیشن سٹی” قائم کرݨ دی منصوبہ بندی کیتی ویندی پئی اے۔ او قومی اسمبلی دے اجلاس وچ وقفہ سوالات دے دوران ارکانِ اسمبلی دے مختلف سوالاں تے ضمنی سوالاں دے جواب ݙیندے پئے ہن۔رکنِ قومی اسمبلی حمید حسین دے سوال دا جواب ݙیندے ڈاکٹرطارق فضل چوہدری واضح کیتا جو حکومتی ریکارڈ وچ صرف او بندے شامل ہوندن جنہاں کوں متعلقہ ملک دی حکومت باقاعدہ حراست وچ گھن تے سفارتخانے توں ایمرجنسی ٹریول دستاویزات بݨوا تے ڈی پورٹ کریندی اے، آپݨی مرضی یا عام پاسپورٹ تے ول آوݨ آلے ایں فہرست وچ شمار نی تھیندے۔ انہاں ݙسایا جو سعودی عرب، متحدہ عرب امارات، قطر، کویت، بحرین تے عمان سودھے سارے خلیجی ملکاں توں یکم مارچ 2026ء تئیں کل 21,951 پاکستانیاں کوں ڈی پورٹ کیتا ڳئے۔ انہاں لوکاں دی ڈی پورٹیشن دیاں وجوہات وچ اقامہ تے ویزا قانون دیاں خلاف ورزیاں، غیرقانونی رہائش، منشیات، مفرور تھیوݨ تے امیگریشن قانون دیاں ٻئیاں خلاف ورزیاں شامل ہن۔ سارے ملکاں دی تفصیلی فہرست ایوان دے ریکارڈ وچ جمع کرا ݙتی ڳئی اے۔شاہدہ بیگم دے ضمنی سوال تے وفاقی وزیر آکھیا جو کیپٹل ڈویلپمنٹ اتھارٹی (سی ڈی اے) دا بنیادی کم سیکٹراں دی ترقی اے جیں وچ ایچ-سیکٹراں کوں خصوصی طور تے تعلیمی تے طبی اداریں تے یونیورسٹیاں کیتے مختص کیتا ڳیا ہئی۔ انہاں ݙسایا جو وفاقی دارالحکومت وچ 300 توں ودھ نجی تے ٻئے تعلیمی اداریں کوں ریگولیٹ تے منظم کرݨ دے سلسلے وچ سپریم کورٹ دے احکام تے مکمل عملدرآمد کیتا ویندا پئے۔ ایں مسئلے دے مستقل حل کیتے سی ڈی اے سیکٹراں توں ٻاہروں ھک جامع “ایجوکیشن سٹی” قائم کرݨ دی منصوبہ بندی کریندا پئے تاں جو اندرلے شہر ٹریفک تے رہائشی علاقیں تے دٻاؤ گھٹ تھی سڳے تے اداریں کوں جدید سہولتات دے نال اتھاں منتقل کیتا ونڄ سڳے۔رکنِ اسمبلی ثمینہ خالد گھرکی دے سوال تے ڈاکٹر طارق فضل چوہدری یقین ݙیوائے جو حکومت تے ساری وزارتاں پارلیمانی بزنس کوں ٻہوں سنجیدگی نال گھندن تے ارکان پارلیمان دے سارے سوالات دے مکمل، جامع تے مدلل جواب وقتی ݙیوݨ کیتے پوری تیاری دے نال ایوان وچ حاضر تھیندن۔