وفاقی وزیرِ تجارت نال شامی وزیرِ خارجہ دی ملاقات، سانجھی دلچسپی دے امور تے ڳالھ مہاڑ

اسلام آباد۔20اگست (اے پی پی) وفاقی وزیر تجارت جام کمال خان نال شام دے وزیرِ خارجہ اسعد حسن الشیبانی اعلیٰ سطحی وفد دے رلے ملاقات کیتی جیں دوران سانجھی دلچسپی دے امور تے ڳالھ مہاڑ کیتی ڳئی۔ ترجمان وزارتِ تجارت موجب جام کمال خان شامی وزیرِخارجہ تے انہاں دے وفد دا پرتپاک استقبال کیتا۔ جام کمال خان آکھیا جو پاکستان شام دے نال پراݨے برادرانہ تعلقات کوں قدردی نگاہ نال ݙیکھدے۔ݙوہیں وزراء پاکستان تے شام وچال ݙوطرفہ تجارت، سرمایہ کاری تے اقتصادی تعاون کوں مزید ودھاوݨ تے اتفاق کیتا۔ وزیرِ تجارت شامی عوام نال اظہارِ یکجہتی، شام دے امن، استحکام تے تعمیرِ نو کیتے نیک خواہشات دا اظہار کیتا۔ جام کمال خان شامی وزیرِخارجہ کوں پاکستان دی اقتصادی تے برآمدی استعداد دا ݙسایا۔انہاں آکھیا ٹیکسٹائل، دوائیں، چمڑے، کھیݙاں دے سامان، آئی ٹی تے زرعی مصنوعات وچ تعاون دے وسیع امکانات موجود ہن، ݙوہیں ملکاں دے نجی شعبیں وچال رابطیں تے سانجھے منصوبیں کوں ودھارا ݙیوݨ دی لوڑھ اے۔شامی وزیرِخارجہ شام دی تعمیرِ نو تے ترقیاتی ترجیحات دا وزیرِ تجارت کوں ݙسایا۔ انہاں آکھیا جو شام وچ رہائش، رئیل سٹیٹ، توانائی، ٹرانسپورٹ، بندرگاہواں، زراعت تے صنعت وچ تعاون دے وسیع امکانات موجود ہن۔ انہاں پاکستان شام مشترکہ کاروباری کونسل دے قیام تے دمشق وچ پاکستان شام مشترکہ سرمایہ کاری فورم منعقد کرݨ دی تجویز ݙتی۔ انہاں آکھیا جو شام دی وزارتِ معیشت دا وفد ݙوطرفہ تعاون دے موقعیں دا جائزہ گھنݨ کیتے پاکستان دا دورہ کریسی۔ ملاقات وچ ترجیحی شعبیں دی نشاندہی تے عملی اقتصادی روڈ میپ، پاکستانی تے شامی کاروباری اداریں وچال ورچوئل ملاقاتاں، پاکستان شام مشترکہ وزارتی کمیشن تے متعلقہ ورکنگ گروپس بحال کرݨ، ݙوہیں ملکاں دے چیمبرز آف کامرس وچال رابطیں تے کاروباری وفد دے تبادلیں کوں فعال کرݨ دیاں تجویزاں وی پیش کیتیاں ڳئن جنہاں تے تفصیلی ڳالھ مہاڑ کیتی ڳئی۔