نائب وزیرِ اعظم محمد اسحاق ڈار دی اڳواݨی اچ دوست ملکاں، یورپی یونین نال تجارتی اتے اقتصادی رابطے ودھاوݨ بارے جائزہ اجلاس

اسلام آباد۔20اگست(اے پی پی)نائب وزیرِ اعظم و وزیرِ خارجہ سینیٹر محمد اسحاق ڈار دی اڳواݨی اچ دوست ملکاں خاص کر یورپی یونین (ای یو) نال تجارتی اتے اقتصادی رابطے ودھاوݨ بارے جائزہ اجلاس تھئے۔ اجلاس اچ متعلقہ حکام کوں ہدایت کیتی ڳئی جو پاکستان دی تجارتی اتے برآمدی کارکردگی ودھاوݨ تے ودھ توجہ ݙتی ونڄے۔ دفترِ خارجہ توں جاری بیان دے مطابق اجلاس اچ دوست ملکاں نال تجارتی اتے اقتصادی شراکت داری ٻئی تیز کرݨ دے طریقہ کار تے ڳالھ مہاڑ تھئی۔ ایں موقع تے مارکیٹ تک رسائی، برآمدی کارکردگی ودھاوݨ اتے متعلقہ فریقین وچال موثر رابطہ کاری دے معاملیاں تے غور کیتا ڳیا۔ نائب وزیرِ اعظم و وزیرِ خارجہ جی ایس پی پلس فریم ورک دے تحت کیتے ڳئے وعدیاں اتے کنونشنز تے موثر پیش رفت اتے انہاں تے عملدرآمد کرݨ تے زور ݙتے۔ انہاں پاکستان دی تجارتی و برآمدی کارکردگی ودھاوݨ تے توجہ ݙیوݨ اتے طے شدہ اقدامات تے ویلھے سر عملدرآمد دی ہدایت کیتی۔ اجلاس اچ وزیرِ تجارت، معاونِ خصوصی وزیرِ اعظم طارق باجوہ، وفاقی سیکرٹری خارجہ امور آمنہ بلوچ، وفاقی سیکرٹری تجارت، وفاقی سیکرٹری داخلہ، برسلز اچ پاکستان دے سفیر، چیئرمین سی ڈی اے اتے متعلقہ وزارتاں و محکمیاں دے وفاقی و صوبائی سینئر حکام شرکت کیتی۔