دشمن دے مذموم عزائم قوم دے اجتماعی عزم تے ریاست دی غیر متزلزل، پرعزم تے فیصلہ کن کارروائی دے ذریعے ناکام بݨائے ویسن: فیلڈ مارشل سید عاصم منیر

راولپنڈی۔21اگست (اے پی پی) چیف آف آرمی سٹاف تے چیف آف ڈیفنس فورسز فیلڈ مارشل سید عاصم منیر، نشانِ امتیاز (ملٹری)، ہلالِ جرأت ایں عزم دا اعادہ کیتے جو دشمن دے مذموم عزائم قوم دے اجتماعی عزم تے ریاست دی غیر متزلزل، پرعزم تے فیصلہ کن کارروائی دے ذریعے ناکام بݨائے ویسن، دشمن دے پراپیگنڈے دا جامع تے بلا جھجھک مقابلہ کرݨ، کوڑے بیانیاں کوں بے نقاب کرݨ تے بلوچستان تے ایں دے عوام دی حقیقی صلاحیت، ترقی تے امنگاں کوں اجاگر کرݨ دی لوڑھ اے۔ جمعے کوں پاک فوج دے شعبہِ تعلقاتِ عامہ (آئی ایس پی آر) توں جاری بیان دے مطابق چیف آف آرمی سٹاف تے چیف آف ڈیفنس فورسز فیلڈ مارشل سید عاصم منیر، نشانِ امتیاز (ملٹری)، ہلالِ جرأت بلوچستان دی ممتاز شخصیتاں تے سیاسی قیادت نال ملاقات کیتی جئیں اچ چیف آف آرمی سٹاف و چیف آف ڈیفنس فورسز ایں ڳالھ تے زور ݙتا جو بلوچستان تے پاکستان دا حال تے مستقبل ہک اے تے ہمیشہ ہک راہسی۔ انہاں آکھیا جو بلوچستان باصلاحیت، ثابت قدم، محبِ وطن تے باوقار لوکاں دی سرزمین اے۔ انہاں آکھیا جو واضح قومی بیانیہ، دیرپا امن تے استحکام صوبے دی حقیقی معاشی صلاحیتاں کوں ورتݨ، سرمایہ کاری کوں راغب کرݨ تے بلوچستان دے وافر انسانی تے قدرتی وسائل کوں عوام دی حقیقی خوشحالی اچ تبدیل کرݨ کیتے بنیادی اہمیت رکھیندن۔ فیلڈ مارشل زور ݙتا جو بلوچستان دے نوجواناں اچ صلاحیت تے موقعیاں دی کوئی ڳھٹکی کائنی، نوجوان اساݙے معاشرے دا سب توں متحرک تے امید افزا طبقہ ہن۔ انہاں آکھیا جو نوجواناں کوں بااختیار بݨاوݨ تے انہاں کوں ملکی ترقی اچ آپݨا کردار ادا کرݨ دے موقعے فراہم کرݨ پائیدار ترقی کیتے مرکزی حیثیت رکھیندے۔ چیف آف آرمی سٹاف و چیف آف ڈیفنس فورسز آکھیا جو فتنۃ الخوارج تے فتنۃ الہندوستان غیر ملکی سرپرستی اچ کم کرݨ آلے پراکسیز ہن جنہاں کوں دشمن عناصر بلوچستان کوں عدم استحکام نال دوچار کرݨ، ایں دی ترقی اچ رکاوٹ پاوݨ تے ریاست تے عوام وچال خلیج پیدا کرݨ کیتے استعمال کریندے پئن۔ انہاں ایں عزم دا اعادہ کیتا جو دشمن دے اے عزائم قوم دے اجتماعی عزم تے ریاست دی غیر متزلزل، پرعزم تے فیصلہ کن کارروائی دے ذریعے ناکام بݨائے ویسن۔ فیلڈ مارشل سید عاصم منیر بلوچستان دی ممتاز شخصیتاں اتے سماجی رہنماواں دے امن دے فروغ، سماجی ہم آہنگی دے استحکام تے تعمیری قومی مکالمے کوں اڳوں ودھاوݨ اچ کردار کوں سراہیا۔ انہاں زور ݙتا جو دشمن دے پراپیگنڈے دا جامع تے بلا جھجھک مقابلہ کرݨ، کوڑے بیانییاں کوں بے نقاب کرݨ تے بلوچستان تے ایں دے عوام دی حقیقی صلاحیت، ترقی تے امنگاں کوں اجاگر کرݨ دی لوڑھ اے۔ انہاں واضح کیتا جو بلوچستان دی تقدیر صرف بلوچستان دی عوام دے ہتھاں اچ اے۔ ممتاز شخصیتاں تے شرکاء بلوچستان تے پاکستان دے امن، ترقی تے خوشحالی کیتے آپݨے عزم دا اعادہ کیتا۔