قانون دی حکمرانی دے ودھارے کیتے مقننہ، انتظامیہ تے عدلیہ دا آپݨے آپݨے آئینی کردار مطابق کم کرݨ ناگزیر اے، چیف جسٹس پاکستان

اسلام آباد۔21اگست (اے پی پی) چیف جسٹس پاکستان جسٹس یحییٰ آفریدی پارلیمانی جمہوریت، اختیارات دی تقسیم تے آئینی حکمرانی دے اصولاں دی اہمیت اجاگر کریندے آکھیے جو قانون دی حکمرانی دے ودھارے کیتے مقننہ، انتظامیہ تے عدلیہ دا آپݨے آپݨے آئینی کردار دے مطابق کم کرݨ ناگزیر اے۔ شعبہ تعلقاتِ عامہ دے جاری اعلامیے موجب اے ڳالھ انہاں سول سروسز اکیڈمی لاہور وچ 54ویں کامن ٹریننگ پروگرام (سی ٹی پی) دے زیرِ تربیت افسراں دے وفد نال سپریم کورٹ وچ ملاقات دے دوران آکھی۔ وفد دی قیادت سول سروسز اکیڈمی دے ڈائریکٹر جنرل فرحان عزیز خواجہ کیتی جݙاں جو فیکلٹی ممبران وی وفد دے رلے ہن۔ملاقات دے دوران چیف جسٹس پارلیمانی جمہوریت تے ریاستی اداریں دے درمیان اختیارات دی تقسیم دے بنیادی خدوخال تے روشنی پاتی تے آئینی حکمرانی و قانون دی حکمرانی دے قیام وچ مقننہ، انتظامیہ تے عدلیہ دے سانجھی تکمیلی کردار دی وضاحت کیتی۔ چیف جسٹس افسراں کوں عدالتی نظام دے مختلف درجات تے مختلف عدالتاں دے دائرہ اختیار دا وی ݙسائے۔ انہاں ادارہ جاتی تعاون تے شعبہ انصاف وچ اصلاحات دے حوالے نال قومی جوڈیشل (پالیسی ساز) کمیٹی (این جے پی ایم سی) دے کردار تے وی روشنی پاتی تے ایں کوں اعلیٰ ترین عدالتی پالیسی فورم قرار ݙتا۔وفد کوں عدالتاں دے بنیادی ڈھانچے تے عوامی سہولت وچ بہتری سانڳے کیتے ونڄݨ آلے اقدامات دا ݙسایا ڳیا۔ انہاں اقدامات وچ بلا تعطل بجلی ݙیوݨ ، ای لائبریریاں، صاف پیوݨ دے پاݨی تے تریمت سائلین کیتے بہتر سہولتاں ݙیوݨ شامل اے، جنہاں کوں رسائیِ انصاف ترقیاتی فنڈ دے ذریعے معاونت حاصل اے۔ چیف جسٹس ݙسیا جو 2026-27ء کوں صنفی لحاظ نال حساس انصاف دے اقدام دے سال دے طور تے مختص کیتا ڳئے، جیں دے تحت تریمت دی سہولت دے مرکز دے قیام تے خصوصی توجہ ݙتی ویندی پئی اے۔ انہاں مراکزی دا مقصد تریمت سائلین کوں ہک ہی چھت تلے ضروری سہولتاں تے معاونت ݙیوݨ اے۔انہاں آکھیا جو اے اقدام انصاف تئیں رسائی کوں مزید سوکھا، جامع تے عوامی ضرورتاں نال ہم آہنگ بݨاوݨ کیتے عدلیہ دی وسيع تر کوششاں دا حصہ اے۔ ملاقات دے دوران مستقبل دی سول سروس قیادت نال سپریم کورٹ دے مسلسل رابطے، آئینی حکمرانی، ادارہ جاتی تعاون، شہری مرکز انصاف اصلاحات تے عوامی خدمت کوں موثر تے ذمہ دار بݨاوݨ دے عزم دا اعادہ کیتا ڳیا