احسن اقبال دا نیشنل انسٹیٹیوٹ آف ایکسیلنس ان ٹیچر ایجوکیشن دا دورہ، تعلیمی معیار دی بہتری دے اقدامات دا جائزہ ڳھدا

اسلام آباد۔21اگست (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال نیشنل انسٹیٹیوٹ آف ایکسیلنس ان ٹیچر ایجوکیشن دا دورہ کیتا تے ادارے دی سرگرمیاں، اساتذہ دی تربیت تے تعلیمی معیار دی بہتری کیتے جاری اقدامات دا جائزہ ڳھدا۔ ایں موقع تے ڳالھ کریندے وفاقی وزیر آکھیا جو تعلیم کہیں وی قوم دی ترقی تے خوشحالی دی ریڑھ دی ہݙی اے۔ ہر قوم دی بنیادی ضرورت اے جو او آپݨی نوجوان نسل کوں بہترین علم نال آراستہ کرے تے انہاں وچ پیداواری صلاحیت پیدا کرے۔احسن اقبال آکھیا جو 2013ء توں 2018ء دے دوران وزارتِ تعلیم کوں نصاب، امتحانی نظام تے اساتذہ دی تربیت وچ اصلاحات کیتے چاراہم منصوبے ݙتے ڳئن۔ اڄ نیشنل انسٹیٹیوٹ آف ایکسیلنس ان ٹیچر ایجوکیشن کوں ݙیکھ تے خوشی محسوس تھیندی پئی اے، اے وزارتِ منصوبہ بندی دا لاتا ہویا ٻوٹا اے جیڑھا اڄ ہک تناور وݨ بݨدا پئے ۔ انہاں آکھیا جو ساݙا نصاب اوں ویلھے موثر تے بہترین تھی سڳدے جݙاں ساݙے استاد جدید دور دے تقاضیں تے تدریسی طریقہ کار نال ہم آہنگ ہوون۔ استاد صرف نوکری نی بلکہ ہک مشن تے معاشرہ سازی دا ذریعہ اے۔وفاقی وزیر آکھیا جو پاکستان کوں کٹ اینڈ پیسٹ نالج دے کلچر توں نکل تے طالب علماں وچ تخلیقی تے تنقیدی سوچ پیدا کرݨی ہوسی۔ ساݙا مقصد صرف کتاباں پڑھݨ آلی نسل تیار کرݨ نی بلکہ اساکوں کتاب خواں توں صاحبِ کتاب نسل تیار کرݨی اے۔ احسن اقبال آکھیا جو جدید سائنس تے ٹیکنالوجی دی تعلیم دے نال نویں نسل کوں آپݨی قومی سنڄاݨ، تہذیب تے ثقافت توں وی روشناس کراوݨ ضروری اے۔ اساکوں آوݨ آلیاں نسلاں کوں پاکستان دے بااعتماد سفیر بݨاوݨا اے۔انہاں آکھیا جو ‘اڑان پاکستان’ دا مقصد صرف تعلیم دے دائرہ کار کوں وسعت ݙیوݨ نی بلکہ ایہو جیہا انسانی سرمایہ تیار کرݨ اے جو پاکستان کوں پیداواری، مسابقتی تے علم تے مبنی معیشت وچ تبدیل کر سڳے۔ وفاقی وزیر ایں عزم دا اظہار کیتا جو او ایہو جیہا اسٹیٹ آف دی آرٹ ٹیچر ٹریننگ سینٹر بݨاوݨ چاہندن جیڑھا جنوبی ایشیا دا بہترین ادارہ ہووے تے نہ صرف پاکستان بلکہ دنیا کیتے رول ماڈل بݨے