شاعر تے ادیب معاشرے دی تعمیر و تشکیل وچ اہم کردارنبھیندن، وفاقی وزیر اورنگزیب خان کھچی

اسلام آباد۔21اگست (اے پی پی) وفاقی وزیر قومی ورثہ و ثقافت اورنگزیب خان کھچی آکھیے جو شاعر تے ادیب معاشرے دی تعمیر و تشکیل وچ اہم کردار نبھیندن جݙاں جو ادبی تقریبات معاشرے دی فکری تے تہذیبی ترقی وچ نمایاں کردار ادا کریندن۔ او اکادمی ادبیات پاکستان وچ مزاح نگار ڈاکٹر انعام الحق جاوید دی کلیاتِ مزاحیہ شاعری دی تقریبِ پذیرائی نال بطور مہمانِ خصوصی خطاب کریندے پئے ہن۔ تقریب دا اہتمام بزمِ ادب اسلام آباد اکادمی ادبیات پاکستان دے تعاون نال کیتا ہئی جیں وچ ممتاز ادیباں، شاعراں، دانشوراں تے اہل قلم شرکت کیتی۔وفاقی وزیر اورنگزیب خان کھچی آکھیا جو ایہوجیھاں ادبی تقریبات معاشرے دی فکری و تہذیبی بہتری تے ادبی شعور دے ودھارے وچ اہم کردار ادا کریندن تے ادب برائے زندگی دے تصور کوں تقویت ݙیندن۔ انہاں اکادمی ادبیات پاکستان کوں قومی ورثہ و ثقافت ڈویژن دے ذیلی اداریں دا ہک اہم تے سوہݨا گلدستہ قرار ݙتا۔ انہاں ڈاکٹر انعام الحق جاوید کوں انہاں دی کلیات دی اشاعت تے مبارخ تے بزمِ ادب تے اکادمی ادبیات کوں ادبی تقریب دے انعقاد تے خراجِ تحسین پیش کیتا۔تقریب دے مہمانِ اعزاز سابق آئی جی پولیس ذوالفقار احمد چیمہ ڈاکٹر انعام الحق جاوید کوں شائستہ مزاج تے منفرد مزاح نگار قرار ݙیندے آکھیا جو انہاں دی شاعری وچ تنوع، طنز تے معاشرتی مشاہدہ نمایاں اے۔ انہاں ڈاکٹر انعام الحق جاوید دی انتظامی صلاحیتاں دی وی تعریف کیتی ۔ سید طاہر شہباز آکھیا جو تصنیف آپݨے مصنف دی شخصیت دی عکاس تھیندی اے۔ انہاں ڈاکٹر انعام الحق جاوید دے پیشہ ورانہ تے ادبی سفر دا ذکر کریندے انہاں دی نو کتاباں تے مشتمل کلیات کوں “نو رنگاں دی قوسِ قزح” قرار ݙتا۔صدرنشین اکادمی ادبیات پاکستان پروفیسر ڈاکٹر نجیبہ عارف ڈاکٹر انعام الحق جاوید کوں کلیات دی اشاعت تے مبارخ ݙیندے آکھیا جو بامعنی مزاح اوہو شاعر تخلیق کر سڳدے جیڑھا معاشرتی درد تے جبر کوں محسوس کریندا ہووے۔ انہاں آکھیا جو ڈاکٹر انعام الحق جاوید دی شاعری وچ مزاح دے نال معاشرتی شعور تے انسانی احساس وی نمایاں اے۔ ڈاکٹر ارشد محمود ناشاد آکھیا جو مزاح زندگی دی اوکھ نال نبڑݨ دا ہک قرینہ اے تے ڈاکٹر انعام الحق جاوید دی شاعری دا سرچشمہ زندگی دا گہرا مطالعہ تے وسیع مشاہدہ اے۔ انہاں مزاح تے مذاق دے فرق کوں واضح کریندے کلیات کوں ڈاکٹر انعام الحق جاوید دی ادبی زندگی دے مختلف رنگاں دا مجموعہ قرار ݙتا۔بریگیڈیئر (ر) ڈاکٹر صفدر علی شاہ ڈاکٹر انعام الحق جاوید دی زبان تے گرفت، شائستگی تے بے باکی کوں انہاں دی نمایاں خصوصیات قرار ݙتا، جݙاں جو ڈاکٹر سید راغب علی کلیات وچ شامل منتخب اشعار پیش کریندے انہاں دی مزاحیہ شاعری دے مختلف پہلواں تے روشنی پاتی۔ آپݨے خطاب وچ ڈاکٹر انعام الحق جاوید آپݨی ابتدائی دور دی شاعری تے کلیات وچ شامل منتخب اشعار پیش کیتے تے تقریب دے انعقاد تے منتظمین دا شکریہ ادا کیتا۔