حکومت پاکستان اتے گوگل وچال ایم او یو، گوگل دا طلبہ کوں مفت جیمینائی اے آئی پلس اتے ݙیݙھ لکھ کیریئر سرٹیفکیٹس ݙیوݨ دا اعلان

اسلام آباد۔21 اگست(اے پی پی)حکومت پاکستان اتے گوگل ملک اچ ڈیجیٹل تبدیلی دے عمل کوں تیز کرݨ، ڈیجیٹل مہارتاں ودھاوݨ اتے اہم شعبیاں اچ مصنوعی ذہانت دا استعمال ودھاوݨ سانگے مفاہمت دی یادداشت (ایم او یو) تے دستخط کیتن۔ ایں تعاون دا مقصد پاکستان دی آئی ٹی برآمدات اتے مجموعی ڈیجیٹل معیشت کوں 2030ء تئیں 30 ارب ڈالر تئیں پچاوݨ اچ مدد ݙیوݨ اے۔ وزیراعظم گوگل دی اعلیٰ قیادت دے وفد کوں خصوصی استقبالیہ ݙتے اتے ایم او یو تے دستخط دی تقریب اچ شرکت کیتی۔ تقریب اچ وفاقی وزیر برائے آئی ٹی و ٹیلی کمیونیکیشن شزہ فاطمہ خواجہ، وزیر خزانہ محمد اورنگزیب، گوگل دے نائب صدر برائے حکومتی امور اتے پبلک پالیسی ولسن وائٹ، امریکی ناظم الامور نٹالی اے بیکر اتے ٻئے اعلیٰ حکام شرکت کیتی۔ اپݨے خطاب اچ وزیراعظم محمد شہباز شریف آکھیا جو پاکستان اتے گوگل دی شراکت داری ہک اہم قدم اے، جدید ذرائع، ٹیکنالوجی اتے نویاں مہارتاں نال نوجواناں کوں بااختیار ٻݨایا ویسی، ساݙا نوجوان ملک دی تقدیر بدلݨ اچ اہم کردار ادا کر سڳدے۔ وزارت آئی ٹی و ٹیلی کمیونیکیشن دے سیکرٹری ضرار ہاشم خان اتے گوگل دے سائوتھ ایسٹ ایشیا اتے سائوتھ ایشیا پبلک پالیسی دے سربراہ ڈیوڈ ویلر ایم او یو تے دستخط کیتن۔ ایم او یو دے تحت گوگل 2026ء اچ پاکستانی نوجواناں کوں ݙیݙھ لکھ گوگل کیریئر سرٹیفکیٹس ݙیسی جیندے نال نوجواناں کوں مارکیٹ دی لوڑھ دے مطابق ودھ مانگ آلیاں تکنیکی مہارتاں حاصل کرݨ دا موقع ملسی۔ ایں سہولت دا مقصد طلبہ کوں تعلیم اتے تحقیق اچ مدد ݙیوݨ، انہاں دی مسابقتی صلاحیت ودھاوݨ اتے آئی ٹی برآمدات اچ انہاں دے کردار کوں مضبوط بݨاوݨ اے۔ تقریب نال وفاقی وزیر آئی ٹی و ٹیلی کمیونیکیشن شزہ فاطمہ خواجہ، گوگل دے پاکستان، فلپائن اتے تھائی لینڈ دے کلسٹر ڈائریکٹر فرحان قریشی وی خطاب کیتے۔ بیان دے مطابق ݙوہائیں فریقاں اسلام آباد اچ ہک خصوصی اے آئی سینٹر آف ایکسی لینس قائم کرݨ تے اتفاق کیتے جتھاں پاکستانی نوجواناں اتے انسانی وسائل کوں عالمی ٹیکنالوجی مارکیٹ دے معیار دے مطابق تربیت ݙتی ویسی۔ ایم او یو دے تحت گوگل تے پاکستان مقامی ایپ ڈویلپرز تے گیمنگ سٹوڈیوز دی معاونت سانگے مل تے کم کریسن۔ ݙوہائیں فریق ڈیجیٹل پیمنٹس ایکو سسٹم کوں مضبوط بݨاوݨ تے ڈیجیٹل ٹریڈ کوں فروغ ݙیوݨ دے طریقیاں دا وی جائزہ گھنسن۔ حکومت، گوگل تے اہم صنعتی اداریاں دے نمائندیاں تے مشتمل ہک مشترکہ ٹاسک فورس وی قائم کیتی ویسی جیڑھی آئی ٹی برآمدات ودھاوݨ اچ رکاوٹاں اتے موقعیاں دی نشاندہی کریسی۔ ٹاسک فورس ہارڈویئر مینوفیکچرنگ تے آئی ٹی سروسز سانگے سرمایہ کاری دے فریم ورک، عالمی منڈیاں تائیں رسائی ودھاوݨ تے انسانی وسائل دی اپ سکلنگ سودھا ٻئے امور تے کم کریسی۔