نائب وزیرِ اعظم سینیٹر محمد اسحاق ڈار دی صدارت قومی اقتصادی کونسل دی ایگزیکٹو کمیٹی (ایکنک) دا اجلاس

اسلام آباد۔22اگست (اے پی پی) نائب وزیرِ اعظم اتے وزیرِ خارجہ سینیٹر محمد اسحاق ڈار ہفتے کوں اتھاں قومی اقتصادی کونسل دی ایگزیکٹو کمیٹی (ایکنک) دے اجلاس دی صدارت کیتی۔ نائب وزیراعظم دے آفس توں جاری بیان دے مطابق اجلاس اچ ترقیاتی منصوبیاں دے جامع ایجنڈے تے غور کیتا ڳیا جئیں اچ خوازہ خیلہ۔بشام ایکسپریس وے دی تعمیر، لیسکو، حیسکو تے پیسکو اچ بجلی دی تقسیم دے نظام دی استعداد کار اچ بہتری دے منصوبے، تربیلا ڈیم دا پنجواں توسیعی پن بجلی منصوبہ، جنوبی پنجاب اچ غربت اچ ڳھٹکی دا منصوبہ، فل برائٹ سکالرشپ سپورٹ پروگرام دے علاوہ پاݨی، رابطے تے بنیادی ڈھانچے بارے مختلف منصوبے شامل ہن۔  کمیٹی نظرثانی شدہ پی سی۔ ون (PC-Is) تے وی غور کیتا تے جاری ترقیاتی منصوبیاں تے پیش رفت تے انہاں تے عمل درآمد دا جائزہ گھدا تانجو انہاں منصوبیاں دی ویلے سر تکمیل تے ترقیاتی وسائل دے موثر استعمال کوں یقینی بݨایا ونڄ سڳے۔ نائب وزیرِ اعظم تمام متعلقہ حکام کوں ہدایت کیتی جو ترقیاتی منصوبیاں تے موثر عمل درآمد کیتے مربوط تے ویلے سر اقدامات یقینی بݨائے ونڄن اتے حکومت دے وسیع تر اقتصادی ترقی تے بہتر رابطے دے ایجنڈے کوں اڳوں ودھاوݨ دا عمل برقرار رکھیا ونڄے۔ اجلاس اچ وفاقی وزیر برائے خزانہ تے محصولات، وزیر برائے منصوبہ بندی، ترقی و خصوصی اقدامات، وزیرِ اعظم دے معاونِ خصوصی طارق باجوہ، کابینہ ڈویژن تے وزارتِ منصوبہ بندی دے سیکریٹریز، اقتصادی امور ڈویژن تے صوبائی حکومتاں دے نمائندگان سمیت وفاقی تے صوبائی حکومتاں دے اعلیٰ حکام شرکت کیتی۔