پاکستان تے ملائیشیا وچال قانون نافذ کرݨ تے سکیورٹی دے شعبیاں اچ تعاون ٻیا مضبوط بݨاوݨ دی لوڑھ اے: آصف علی زرداری

اسلام آباد۔22اگست (اے پی پی) صدرِ مملکت آصف علی زرداری پاکستان اتے ملائیشیا وچال قانون نافذ کرݨ، انسدادِ دہشت گردی، منشیات دی روک تھام، انسانی سمگلنگ تے تارکینِ وطن دی غیر قانونی نقل و حمل روکݨ دے شعبیاں اچ تعاون مزید مضبوط بݨاوݨ دی لوڑھ تے زور ݙتے۔ ہفتے کوں ایوانِ صدر دے پریس ونگ دے مطابق صدرِ مملکت اے ڳالھ ملائیشیا دے وزیرِ داخلہ سیف الدین نصرالدین بن اسماعیل نال ایوانِ صدر اچ ملاقات دے دوران آکھی۔ ملاقات اچ وفاقی وزیرِ داخلہ و انسدادِ منشیات سید محسن رضا نقوی وی موجود ہن۔ پاکستان اچ ملائیشیا دے ہائی کمشنر محمد اظہر مزلان، رائل ملائیشیا پولیس دی سپیشل برانچ دے ڈائریکٹر ابراہیم داروس تے ملائیشین محکمہ جیل خانہ جات دے ڈپٹی کمشنر جنرل برائے بحالیِ اصلاحات حفیظ عثمان سمیت ٻئے حکام وی معزز مزمان دے نال ہن۔ ملائیشین وزیر تے انہاں دے وفد دا خیرمقدم کریندیں ہوئیں صدرِ مملکت آکھیا جو پاکستان ملائیشیا دے نال آپݨے قریبی تے برادرانہ تعلقات کوں انتہائی اہمیت ݙیندے جو مشترکہ ایمان، ثقافت، باہمی احترام تے عوامی سطح تے مضبوط رابطیاں تے استوار ہن۔ ملاقات اچ ݙوپاسہ تجارت دے فروغ نال متعلق امور وی زیرِ بحث آئے۔ صدرِ مملکت ملائیشیا اچ پاکستانی مصنوعات کیتے ٻیا وسیع مارکیٹ رسائی دے امکانات ڳولݨ دی لوڑھ تے زور ݙتا۔ انہاں مصنوعات اچ چاول، آلو، کنک، پولٹری تے مال ݙنگر (زناوراں) دی خوراک سمیت ملائیشیا اچ طلب رکھݨ آلی ٻیاں شیاں شامل ہن۔ ملائیشیا دے وزیرِ داخلہ صدرِ مملکت کوں بتایا جو 2026ء پاکستان تے ملائیشیا وچال سفارتی تعلقات دے قیام دا 69 واں سال اے، ݙوہیں ملکاں وچال سفارتی تعلقات ملائیشیا دی آزادی دے بعد 1957ء اچ قائم تھئے ہن۔ انہاں آکھیا جو ایں ویلھے پاکستان دے مختلف شہراں تے ملائیشیا وچال ہفتہ وار 14 پروازاں چلدی پئن جݙاں جو پروازاں دی تعداد اچ مزید اضافے کیتے وی کوششاں جاری ہن۔